Իշխանությունը չի մարսելու նոր կապիտուլյացիա ստորագրելը, 6 ամիս ունենք՝ մարդկանց անհնազանդության պատրաստելու համար․ Իշխան Սաղաթելյան
POLITICSՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Այն, ինչ երեկ հայտարարել է Նիկոլ Փաշինյանը, մեզ համար անակնկալ չէր։
Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Իշխան Սաղաթելյանը՝ անդրադառնալով երեկվա ասուլիսում Նիկոլ Փաշինյանի հնչեցրած հայտարարություններին։
Սաղաթելյանը նշեց, որ դեռ մեկ տարի առաջ էին իրենք բարձրաձայնում այդ վտանգների մասին։
«Վերջին օրերին Նիկոլ Փաշինյանը հայտարարել է Արցախը և Հայաստանը հանձնելու ճանապարհային քարտեզը և ժամանակացույցը։ Ինձ թվում է՝ ամսի 25-ին Մոսկվայում հանդես կգան եռակողմ նոր հայտարարությամբ, որից հետո այդ ամեն ինչը կշարունակվի Քիշնևում, այնուհետև Բրյուսելում կփորձի պայմանավորվել կապիտուլյացիայի պայմանագրի նոր սկզբունքների շուրջ, հոկտեմբերի հանդիպման մասին ևս հայտարարվել է, կփրձեն ունենալ ամբողջական կապիտուլյացիայի պայմանագիր, ապա կվավերացնեն։ Հայ ժողովուրդը, մտահոգ քաղաքացիները ունեն ընդամենը 5-6 ամիս ժամանակ երկիրը հանձնելու գործընթացը կասեցնելու համար»,- ասաց նա։
Անդրադառնալով ընդդիմության գործողություններին, պատգամավորը ասաց․
«Մենք այն քաղաքական ուժն ենք, որ հայտարարություններից բացի վերջին երեք տարիների ընթացքում շատ կոնկրետ քայլեր ու գործողություններ ենք արել, այս իրավիճակի հետ մենք չենք համակերպվելու, չենք հանձնվելու, պայքարելու ենք մինչև վերջին շունչ։
Այն բոլոր խոսակցությունները, որ ընդդիմությունը դադարեցրել է պայքարը, վստահեցնում եմ, որ այդպես չի լինելու։ Այն ինչ արել ենք անցած տարի, հետաձգել է այս գործընթացը։ Մեր խնդիրն է նոր թափով Հայաստանում, Արցախում և Սփյուռքում ձևավորել համաժողովրդական դիմադրություն, մարդկանց պատրաստել անհնազանդության, դուրս գալ ու կանխել այս իրավիճակը: Ես ձեզ վստահեցնում եմ, որ այս իշխանությունը չի մարսելու նոր կապիտուլյացիա ստորագրելու փասը, ինչ հնարավոր է, անելու ենք դրա համար, հայրենիքի համար պայքարելու բոլոր մեթոդները արդարացված են»։