Վանաձորը հայկական երգ ու պարով էր շնչում. «Իրական դպրոցի» շրջանավարտներին հանձնվեցին ավարտական վկայականները. «Փաստ»

«Փաստ» օրաթերթը գրում է

Շտապում էինք Վանաձոր՝ ներկա գտնվելու «Իրական դպրոցի» «Տարելրումն 2023» միջոցառմանը: Ծանոթ չլինելով Վանաձորի փողոցներին՝ հստակ կարող էիր հասկանալ, որ ժամանում ես միջոցառման վայր՝ Շառլ Ազնավուրի անվան մշակույթի պալատ: Կհարցնեք, թե ինչպե՞ս: Մայթերով քայլող երեխաների շապիկներին Մարաշի ասեղնագործության պատառիկներ էին՝ անասելի գեղեցիկ ու, ամենակարևորը, հայկական: Դե, իսկ հիմա՝ միջոցառման մասին: Մշակույթի պալատի բակում կազմակերպվել էին աշխատանքների ցուցահանդես-վաճառք, «Ճարտար» ակումբի վարպետաց դասեր և, իհարկե, «Իրական դպրոցի» սաների ավարտական աշխատանքների ներկայացում: Կավից պատրաստված աշխատանքներ, այդ թվում՝ Խնձորեսկի վիշապագորգը, գիտական փորձեր, «Մարտախաղի» ներկայացում, երգ ու երաժշտություն, մեկ էլ հանկարծ՝ «զինված ու քողարկված» մարտիկներ են հայտնվում դիմացդ: Ինչպես ասում են, հետաքրքիր, ուսուցողական ու, ամենակարևորն է, հայկական ժամանցն ապահովված էր:

«Ինստիգեյթ» խորհրդատվական ընկերության տնօրեն, «Իրական դպրոցի» հոգաբարձուների խորհրդի անդամ Աննա Գևորգյանը լրագրողների հետ զրույցում ասում է՝ Երևանում միջոցառում կազմակերպելը շատ ավելի դյուրին է, բայց իրենց ընկերության համար հիմնադրման առաջին օրվանից կարևոր է եղել մարզերի զարգացումը: «Ինստիգեյթն իր բոլոր տարեդարձերը նշել է մարզերում, 2020 թ.-ից հետո «Իրական դպրոցը» ևս հետևել է այս ավանդույթին: Մեր իրական նպատակը ոչ միայն ուղղակի ծննդյան տարեդարձ նշելն է, այլև ոչ ֆորմալ շփումները, ինչպես նաև մարզային ակտիվությունը: Այս միջոցառումների անցկացմամբ և մեր այցերով էապես փոխվում է մարզի և քաղաքի կյանքը, ինչպես նաև դպրոցն էլ ավելի ճանաչելի է դառնում»,- ասում է ընկերության տնօրենը: «Իրական դպրոց» կրթամշակութային հիմնադրամի մեկնարկը տրվել է 2016 թ.-ին Երևանում։ Սկզբում մասնաճյուղեր են բացել Գյումրիում և Վանաձորում, հետո, ընդլայնելով աշխարհագրությունը, հասել Գորիս, Իջևան ու Ստեփանակերտ: Հիմնադրամի նպատակներից մեկն է ունենալ 40-ից ավելի դպրոց Հայաստանի գյուղերում և քաղաքներում: Այն կոչվում է «Իրական դպրոց» Շուշիի Ռեալական ուսումնարանի հիշատակին:

Համակարգերի տեսություն (Systems Theory) մասնագիտությամբ քառամյա ուսումնական ծրագիրն իրականացվում է Առաջատար տեխնոլոգիաների ձեռնարկությունների միության (ԱՏՁՄ) և «Ինստիգեյթ ուսումնական կենտրոն հիմնադրամի» կողմից: «Իրական դպրոց» կարող են ընդունվել 9-րդ դասարանն ավարտած աշակերտները: Ուսումնառությունն իրականացվում է շրջված դասարանի կերպով և նախագծային ուսուցման ձևաչափով: Առաջին երկու տարին ներառում են հանրակրթական ավագ դպրոցի 10- 11-րդ դասարանների ուսումնական ծրագրերը, ընդ որում՝ ուսումնառության երկրորդ տարվանից սկսած ուսանողներն աշխատում են իրական նախագծերի վրա և անցնում պրակտիկա ՏՏ ոլորտի տարբեր ընկերություններում: Ուսումնական 3-4-րդ տարիներին նրանք ստանում են մասնագիտական կրթություն, որն իրականացվում է նախագծային ուսուցման ձևաչափով: Իրական դպրոցը բազմաթիվ գործընկերներ ունի, այդ թվում՝ ՈՄԱ-ն, «Խորոտը», «Ազատազէնը», «Կայթ» մշակութային հանգույցը, «Ինստիգեյթ» ընկերությունը և այլք: «

Տարելրման» համերգային մասն ապահովեցին «Ճարտար» ակումբի սաները: Այն հիմնվել է 2019 թ.-ին, մշակութային ծրագիրը մշակվել է ավագ դպրոցների և քոլեջների՝ արվեստում չմասնագիտացող սաների համար: Ծրագիրը ներդրվել է «Իրական դպրոցում»: Ի դեպ, 2021 թ.-ին ակումբի սաների ներգրավմամբ հիմնադրվել է «Շիվք» նվագախումբը, որը հանդես է գալիս ֆոլկ-ֆյուժն ժանրում և ներկայացնում է հայկական ֆոլկ երաժշտությունը սեփական մշակումներով: Նվագախումբը ելույթ ունեցավ ավարտական համերգի ժամանակ, «Խլփանեն» նրանց կատարմամբ հրաշալի էր: «Ճարտարը» «Կայթ» մշակութային հանգույցի՝ կյանքի կոչված գաղափարներից մեկն է: «Կայթի» հիմնական նպատակը արվեստի կրթությունն ու հայ մշակույթը բոլորին հասանելի դարձնելն է՝ անկախ սոցիալ-տնտեսական հնարավորություններից ու բնակության վայրից:

Օրինակ՝ մեկնարկում է նրանց «Արև է ելել» համայնքային զարգացման կրթամշակութային ծրագիրը, որն ուղղված է սահմանամերձ և գյուղական համայնքներում մշակութային կրթության և ժամանցի հնարավորությունների ստեղծմանն ու զարգացմանը: Միջոցառման ավարտին շրջանավարտներին հանձնվեցին վկայականները, ըստ ավանդույթի՝ զենքեր նրանց, ովքեր հասցրել էին հանձնել համապատասխան քննությունները, նաև թույլ էր տալիս օրենքը: Միջոցառումն ավարտվեց Հայաստանի օրհներգով և Կարնո քոչարիով:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում