Գազային տրանզիտ՝ Հայաստանի տարածքով
BLOGՆարե Սարգսյանը Ֆեյսբուքյան իր էջում գրում է.
Իրանի նավթի նախարարության Ազգային գազի արտահանման ընկերության տնօրեն Ալի Ռեզա Քամելին հայտարարել է, որ Իրանն ու Վրաստանը նախնական պայմանավորվածության են եկել իրանական գազը Հայաստանի տարածքով Վրաստան արտահանելու հարցում:
Քամելին ասել է, թե նախատեսվում է տարեկան Վրաստան արտահանել մինչև 500 միլիոն խորանարդ մետր գազ: Ըստ նախնական հաշվարկների` նախատեսվում է, որ մատակարարումները կարող են կազմել օրական 8,5-14 մլն խմ։ Բարձրաստիճան պաշտոնյան ընդգծել է, որ պայմանավորվածությունը երկարաժամկետ է, սակայն այլ մանրամասներ չի հայտնել, այդ թվում՝ թե իրանական գազի հազար խորանարդ մետրի դիմաց վրացական կողմը որքան է վճարելու: Իրանական գազի հիմնական սպառողները դառնալու են Վրաստանում գտնվող էլեկտրակայանները։
Մինչ այս Իրանն Ադրբեջանի հետ գազի փոխադարձ մատակարարումների, իսկ Հայաստանի հետ գազի մատակարարման մասին համաձայնագրեր էր կնքել։
Նախատեսվում է Հայաստանի գազամուղը շահագործել ամբողջ հզորությամբ, ինչը Հայաստանի տնտեսության համար կունենա բավականին լուրջ խթան: Թեհրանում կարծում են, որ իրանա-վրացական գործարքը թույլ կտա ավելի մեծ ծավալով շահագործել հայ-իրանական գազատարը: