«Ոտքերի և իրանի հագուստ». կապրիի և շորտերի յուրատեսակ «խառնուրդ». «Փաստ»

«Փաստ» օրաթերթը գրում է.

Շորտերից երկար՝ մինչև ծնկները հասնող տաբատը, որը բավականին կիպ հպվում է ոտքերին, կոչվում է բրիջի: Երբեմն դրանք համարվում են շորտի տարբերակ, թեև ավելի տրամաբանական է բրիջին վերագրել կտրված տաբատների դասին։ Ի դեպ, «բրիջի» անվանումը գալիս է հին ֆրանսիական broc բառից, որը նշանակում է «ոտքերի և իրանի հագուստ»։ Բրիջին հայտնվել է 1700-ականներին: Այն ժամանակ դրանք հագնում էին և՛ տղամարդիկ, և՛ կանայք: Դրանք կարճեցված կիպ տաբատներ էին, որոնք կրում էին վերնազգեստի տակ։ Կանանցը կոչվում էր բլումեր, իսկ տղամարդկանցը՝ կյուլոտ։ Դասական բրիջի տաբատները հայտնվել են 18-րդ դարի վերջին ձիավարության համար։ Դրանք հագնում էին երկարաճիտք կոշիկներով։ Բրիջիները բնական ձևով էվոլ յուցիայի ենթարկված կուլոտներ էին՝ կարճ տաբատներ, որոնք Եվրոպայում կրում էին ազնվական դասի մարդիկ 17-18-րդ դարերում:

Տղամարդկանց զգեստապահարանում երկար տաբատների տարածման հետ մեկտեղ բրիջին դեռ պահպանել է իր կարևորությունը ձիասպորտում: Քսաներորդ դարի կեսերից բրիջին սկսում է «ձգվել» դեպի սպորտ, լողափ, ամենօրյա ամառային նորաձևություն: Բրիջիի ժողովրդականությունը վրա է հասել 20-րդ դարում, երբ շատ կինոաստղեր սկսել են դրանք օգտագործել ինչպես առօրյայում, այնպես էլ հեռուստաէկրաններին։ 1940 թվականին հայտնվեց բրիջիի մեկ այլ տեսակ՝ բրիջի-կապրի (մինչև սրունքի կեսը կտրված կիպ տաբատ): Անունը գալիս է տեղանքից, որտեղ նրանք հայտնվել են (Կապրի՝ իտալական կղզի): 70-ականների սկզբին բրիջիի նկատմամբ հետաքրքրությունը թուլացավ, բայց արդեն 90-ականների կեսերին ժողովրդականության նոր աճ արձանագրվեց:

Վերջին բումերից մեկը բրիջիի ներառումն էր նոր Gap հավաքածուի մեջ: Այդ նորաձև բրիջիները շատ մոտ են կապրի տաբատին. խնդիրն այստեղ երկարությունն է: Բրիջիի սովորական երկարությունը մինչև ծնկները կամ մի փոքր ավելի բարձր է, սակայն այդ սեզոնին նորաձևության տների և դիզայներների պոդիումներում հայտնված գրեթե բոլոր մոդելները ծնկից ցածր էին, ինչը նրանց հավասարեցնում էր կապրիին։ Բրիջիները հիմա էլ չեն կորցնում իրենց ժողովրդականությունը և սեզոնից սեզոն հայտնվում են նոր դիզայներական տատանումներով, գույներով և անսովոր ձևերով։ Հիմա դրանք տարբերվում են երկարությամբ, ոճով և կտորի նյութով։ Շատ կարճ բրիջին վիզուալ կարճացնում է այն կրողի ոտքերը։

Մինչև սրունքների կեսը հասնող բրիջիները զգալիորեն մեծացնում են կոնքերը և ոտքերի ամբողջ վերին մասը։ Կան բիզնես բրիջիներ, որոնք ամենից հաճախ պատրաստվում են զուսպ գույների կոստյումի գործվածքից: Առօրյա ոճում օգտագործվում են ջինսից, բամբակից, ատլասից, թավշից և շատ այլ գործվածքներից կարված բրիջիներ: Սպորտային բրիջին կարվում է առաձգական շնչող գործվածքից, որի մեջ հարմար և հիգիենիկ է սպորտով զբաղվել, վազք կատարել կամ օգտագործել բացօթյա աշխատանքների ժամանակ։ Տղամարդկանց բրիջին կանանցինից ոչ պակաս է տարածված, թեև առավել հաճախ տղամարդիկ դրանք հագնում են ամռանը կամ սպորտով զբաղվելիս:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում