Ատեստավորումը չանցած ուսուցիչները բաց նամակով դիմել են Փաշինյանին վերանայել որոշումը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

 

Ատեստավորումը չանցած ուսուցիչները բաց նամակով դիմել են ՀՀ վարչապետ Նիկոլ Փաշինյանին՝ խնդրելով վերանայել իրենց նկատմամբ կայացված որոշումը եւ վերականգնել աշխատանքի․

 «Հարգելի՛ պարոն վարչապետ

 Ձեզ ենք դիմում միջին մասնագիտական կրթություն և երկար տարիների մանկավարժական փորձ ու վաստակ ունեցող ուսուցիչների անունից, որոնք կանգնած են աշխատանքից հեռացման շեմին կամ արդեն ազատվել են աշխատանքից: Մենք չենք կարողացել աշխատելու հետ մեկտեղ ապահովել մեզ ներկայացված պահանջները, որովհետև ուսուցչի չնչին աշխատավարձը թույլ չի տվել վճարել վարձավճարները, որոնք միշտ եղել են շատերիս համար անհասանելի և անիրատեսական: Ուրախ ենք, որ մեր պետությունը վերջապես պատրաստվում է աջակցել մեզ այդ հարցում և պետական մոտեցում ցուցաբերել գործող ուսուցիչներին: Սակայն մեր շարքերում կան բազմաթիվ պատկառելի տարիքի ուսուցիչներ, որոնք աշխատանքի են ընդունվել այդ օրենքի ընդունումից առաջ, երբ բարձրագույն կրթություն ունենալը պարտադիր պահանջ չէր:

Նրանք այդ բազմամյա մանկավարժական գործունեության ընթացքում շարունակ զբաղվել են ինքնակրթությամբ, որին գումարվել է նաև բազմամյա մանկավարժական փորձն ու հմտությունները և նրանց գործունեությունը կարելի է ասել հավասար է մի քանի բուհի վկայականի մակարդակի և արժեքի: Ուստի խնդրում ենք, որ այդ պատկառելի տարիքում գտնվող բազմափորձ ուսուցիչներին, որոնց մի քանի տարի է մնացել կենսաթոշակային տարիքի անցնելուն, թույլ տալ շարունակել իրենց գործունեությունը իրենց հաստիքներում, իրենց սիրելի աշակերտների հետ և գնալ վաստակած հանգստի:

 Միևնույն ժամանակ խնդրում ենք, որ այն ուսուցիչները, որոնք աշխատանքի են ընդունվել օրենքի ընդունումից հետո, ընձեռել բարձրագույն կրթություն ստանալու հնարավորություն, որից համոզված եմ կօգտվենք շատերս:
 Սակայն այս ամենն այդպես էլ կմնա թղթի վրա, եթե չպահպանվեն ստանձնած հաստիքները, որոնք հենց կդառնան մեզ համար և՛ մոտիվացիա, և՛ միջոց այդ ճանապարհին: Դա հնարավորութոյւն կընձեռի նաև պահպանել աշխատատեղերը:
 Թույլ տվեք նշել նաև, որ կրթության նախարարի վերջին առաջարկից հետո, այն է՝ տեղավորվել դպրոցներում առկա այլ հաստիքներում, հետաքրքրվեցինք և պարզեցինք, որ գրեթե ոչ մի դպրոցում թափուր չեն նշած հաստիքները (գրադարանավար, օպերատոր, լաբորանտ), որի համար բարձրագույն կրթության պահանջ չկա:

 Գաղտնիք չէ, որ, եթե հայտարարվի մրցույթ այն հաստիքների համար, որոնք մենք ենք զբաղեցնում, և նոր մասնագետի հետ կնքվի պայմանագիր՝ անորոշ ժամկետով, մեր հետագա վերականգնումը կդառնա անհնարին: Այդ դեպքում պետության հատկացրած միջոցները՝ ստանալու բարձրագույն կրթություն, կդառնա աննպատակ:
 Մենք պատրաստ ենք օգտվել այս հնարավորությունից, բայց խնդրում ենք ապահովել աշխատանքի շարունակականություն այդ ընթացքում: Այդ պարագայում նաև չի խաթարվի ուսուցչի կապը իր սիրելի աշակերտների հետ, որոնք ունեն այդ ուսուցչի կարիքը:

Ցանկանում ենք նշել նաև այն գլխավոր գործոնը, որի հետևանքով նաև հայտնվել ենք այս իրավիճակում. թեստերը, որոնք ներկայացված էին մեզ, ունեին բազմաթիվ թերություններ ու սխալներ, դուրս էին մեզ ներկայացված ուղեցույցի պահանջներից և չէին արտացոլում տվյալ կրթական աստիճանին ներկայացվող պահանջները:

Ցանկանում ենք տեղեկացնել, որ ԳԹԿ կայքում նախապես ներկայացված ուղեցույցի հիման վրա են բոլոր ուսուցիչները ինքնուրույն պատրաստվել ատեստացիային, այդ ուղղությամբ վերապատրաստումներ չեն ունեցել, միևնույն ժամանակ՝ քննությանը հատկացված ժամանակը եղել է խիստ սահմանափակ և անիրաստեսական: Նշված բոլոր գործոնները պատճառ են հանդիսացել մեր ձախողման, որից հետո մասսայաբար բողոքարկել ենք թեստերի արդյունքները: Բողոքարկման արդյուքները ևս մեզ չեն բավարարել, քանի որ ուղղման ենթական բազմաթիվ հարցեր այդպես էլ չեն ուղղվել:

 Այս ամենը հիմք ընդունելով պնդում ենք, որ այդ թեստերը չեն, որ պետք է ստուգեն ուսուցչի մասնագիտական գիտելիքները, դեռ մի բան էլ հիմք ընդունվեն աշխատանքից ազատման համար: Որպես ապացույց կից ներկայացված է նաև շախմատ առարկայի թեստերի չափազանց խնդրահարույց լինելու մասին փաստող թեստերի պատասխանների ձևաթուղթը, որի վրա մեկ վանդակում երևացող մեկից ավելի թվանշանները ուղղումներ են:

Լիահույս ենք, որ մանրամասն կուսումնասիրեք դրանք և հստակ պատկերացում կկազմեք դրանց որակի մասին: Այդ պատկերն էին արտացոլումն նաև մնացյալ առարկաների թեստերը, որոնք էլ մեծ վրդովմունք են առաջացրել ուսուցիչների շրջանում: 

Հուսով ենք, որ վերջնական որոշում կայացնելիս հաշվի կառնեք բոլոր ուսուցիչների տարիքային առանձնահատկությունները, կարիքները, արժանիքներն ու վաստակը, և, որավելի կարևոր է՝ նրանց աշակերտների կարիքները:

 Հարգելի պարոն Փաշինյան, ներկայացրինք մեր բոլոր գործընկերների արդարացի պահանջը և մտահոգությունը և ակնկալում ենք Ձեր արդարացի որոշումը»: