Ծծմբի զզվելի հոտ է գալիս. «Փաստ»

«Փաստ» օրաթերթը գրում է.

lentv24.ru-ն «Ծծմբի հոտ» վերնագրով հոդվածում գրում է, որ Հայաստանը Ռուսաստանից տարանջատելու խաղը նշանավորվել է նոր արարով: Նիկոլ Փաշինյանը «հինգերորդ շարասյան» դեմ պայքարելու կոչ է արել, և գործընթացը սկսվել է. արդեն մեկ օր անց հայտնվել է դավաճանների ցուցակը։ Առայժմ՝ հայկական Տելեգրամ-ալիքների տարածքում։ Ավելին, ցուցակը կազմողները, այն անվանելով «Հայկական քաղաքական հեռագրային քարտեզ», նկարագրել են այն չափանիշները, որոնցով հայկական Տելեգրամ-ալիքների մի շարք հեղինակներ արդեն իսկ գրանցվել են որպես դավաճաններ: «Չափորոշիչներն են. որպես հիմնական չափորոշիչ՝ բարեկամություն և դաշինք Ռուսաստանի հետ, ընդդիմություն Փաշինյանի ռեժիմին և Հայաստանի ողջ ժողովրդին, ազգայնականությամբ ուղեկցվող ատելություն Արևմուտքի նկատմամբ»։

Սկզբունքորեն, այստեղ արդեն կարելի էր վերջակետ դնել, բայց ճշտումներ մտցնենք։ Սկսենք Ռուսաստանի հետ բարեկամությունից, որը, «չափորոշիչներ» կազմողների տրամաբանությամբ, եթե Հայաստանում որևէ մեկի համար արժեք է ներկայացնում, ապա նա հաստատապես մեկ երրորդով դավաճան է։ Իրականում նման մարդիկ դեռ շատ են Հայաստանում, և ոչ միայն տելեգրամյան տարածքում։ Օրինակ՝ ռուսաց լեզվի ուսուցիչներն առայժմ շարունակում են աշխատել, թատրոնները դեռ բեմադրում են Չեխով… Արդյո՞ք նրանք բոլորը պետք է սկսեն անհանգստանալ: Հետաքրքիր է նաև «ընդդիմություն Փաշինյանի ռեժիմին և Հայաստանի ողջ ժողովրդին» չափորոշիչը, որին համապատասխանողները ևս մեկ երկրորդով դավաճան են համարվում:

Ինչպե՞ս հասկանանք, որ «Փաշինյանը Հայաստանն է», կամ՝ «մենք ասում ենք Հայաստան, հասկանում ենք Փաշինյան, ասում ենք Փաշինյան, հասկանում ենք Հայաստա՞ն»: Դե, դա, իհարկե, վարչապետին դուր կգա։ Իսկ նրա՞նց, որոնց դուր չի գալիս: Նրանք նույնպե՞ս մեկ երրորդով երկրի դավաճան են։ Թե՞ ավելի լայն ընդունենք՝ բոլոր հայերն են դավաճան: Իսկ եթե ինչ-որ մեկը լավ է վերաբերվում Ռուսաստանին ու Հայաստանը չի նույնականացնում Փաշինյանի հետ, ապա ստացվում է, որ նրա դեպքում ամեն ինչ արդեն երկու երրորդո՞վ է վատ։ Եվ վերջապես երրորդ չափորոշիչի մասին՝ «ազգայնականությամբ ուղեկցվող ատելություն Արևմուտքի նկատմամբ»։ Բավականին հետաքրքիր չափորոշիչ է։ Սա արդեն իմաստային բանալիների փոխարինման և աղավաղման այնպիսի դաս է, որ ուղղակիորեն կարելի է զգալ վարպետի ձեռքը։ Պարզապես տեխնիկայի հարց է. «Վատ խոսք ասացի՞ր Արևմուտքի հասցեին, դու ազգայնակա՛ն ես»:

Նշենք, որ արդեն իսկ վերը նշված չափանիշների համաձայն, «դավաճաններ» կատեգորիայի ցանկում գրանցվել է 39 Տելեգրամալիք։ Բայց հայկական տելեգրամյան տարածքում կա ևս մեկ խումբ, որոնք, ինչպես անմիջապես պարզել են ցուցակները կազմողները, միայն դիմակավորված են որպես «չափավորներ», բայց իրականում նրանք «ներթափանցողներ են դավաճանների խմբից»։ Գիտե՞ք՝ ովքեր են նրանք։ Նրանք են, ովքեր «թաքնվում են տեղեկատվական չեզոքության հետևում և/կամ ցուցադրում են գաղափարական անորոշություն»։ «Չափավոր և կեղծ-չափավոր» կատեգորիաներում, որը նույնն է, թե «դավաճաններից ներթափանցողներ», գրանցվել է 17 տելեգրամյան ալիք: Նրանց մեջ է, ի դեպ, Sputnik Արմենիա-ն։

Նշենք նաև, որ յուրաքանչյուր ցուցակի վերջում առանձին շեշտվում է. «Ցուցակը վերջնական չէ»։ Այնպես որ, Հայաստանում ամեն ինչ նոր է ծավալվում... և ծծմբի զզվելի հոտ է գալիս։

Մանրամասները՝ «Փաստ» օրաթերթի այսօրվա համարում