Ամենաթունդ խմիչքներից մեկը, որը համարվում է առավել «մարդասպան» կոկտեյլների հիմքը. «Փաստ»

«Փաստ» օրաթերթը գրում է.

Աշխարհի ամենաթունդ խմիչքներից մեկը Everclear լիկյորն է: Այն աշխարհի առավել «մարդասպան» կոկտեյլների հիմքն է հանդիսանում: Դրա վաճառքը Ամերիկայի 13 նահանգում նույնիսկ արգելված է: Ընդհանրապես, լիկյորները հայտնվել են միջնադարում որպես փիլիսոփայական քարը փնտրող ալքիմիկոսների հետազոտությունների «կողմնակի» արտադրանք: Հենց այդ ժամանակ են հայտնվել տարբեր խոտաբույսերի և մրգերի հիմքով հայտնի լիկյորները, որոնք հաճախ կրել են կրոնական օրդենների անուններ. օրինակ՝ գոյություն ունեցող ամենահին լիկյորներից մեկը Benedictine-ն է:

Սկզբնապես լիկյորները պատրաստվել են որպես դեղամիջոցներ, բայց աշխարհագրական մեծ հայտնագործությունների դարաշրջանում կորցրել են իրենց բուժական նշանակությունը: Դրանք սկսել են մեծամասամբ պատրաստել տարբեր մրգերից ու հատապտուղներից և ծառայել են որպես մարսողությունը խթանող ըմպելիքներ: Քսաներորդ դարում լիկյորների մեջ ալկոհոլի պարունակությունը նվազեցվել է մինչև 20 %, և լիկյորները ձեռք են բերել կանանց խմիչքի համբավ: Լիկյորների պատմությունը մի փոքր ուսումնասիրելուց հետո հարց է առաջանում՝ իսկ ինչու՞ է Everclear- ը համարվում լիկյոր, եթե այն հաճախ ավելի թունդ է, քան, օրինակ՝ օղին: Պարզապես այն պատճառով, որ արտադրողը կտրականապես խորհուրդ չի տալիս օգտագործել այդ ըմպելիքը մաքուր վիճակում և այն համարում է կոկտեյլների կամ այլ ավելի «մարդկային» լիկյորների հիմք: Այս լիկյորի ալկոհոլային պարունակությունը հասնում է 95 աստիճանի:

Ճիշտ է, ԱՄՆ-ի 13 նահանգում դրա թնդությունը օրենքի պահանջով ստիպված կրճատվել է մինչև 75 աստիճանի: Բուն Ամերիկայում Everclear-ը հսկայական ժողովրդականություն է ձեռք բերել հենց կոկտեյլների հիմք հանդիսանալով: Մի կարծեք, որ դա պարզապես սովորական ալկոհոլ է: Everclear-ը չունի արտահայտված համ ու հոտ, այդ իսկ պատճառով էլ բարմենները սիրում են այն: Նման չեզոքությունը ձեռք է բերվում բազմաթիվ զտումների, բարձրորակ հումքի, ինչպես նաև որոշ գաղտնիքների միջոցով, որոնք արտադրողը, բնականաբար, չի բացահայտում: Այս լիկյորը մտել է Գինեսի ռեկորդների գիրք՝ որպես ամենաթունդ ալկոհոլային ըմպելիք: Այնուամենայնիվ, վերջին տարիներին արտադրողները վերացրել են այդ խմիչքին ներկայացվող որոշ պահանջներ, և արդյունքում Everclear-ը, որը ժամանակին եղել է լավագույնը, ներկայում այդպիսին չէ: Այն պահպանել է իր առաջնությունը միայն լիկյորների շարքում:

Ընդհանուր հաշվարկով առաջատարը լեհական Spiritus-ն է: Այդ օղին (համենայն դեպս, լեհերը դրան այդպես են ասում) ունի 96 աստիճան թնդության ամենամաքուր ալկոհոլ: Ինչպես Everclear-ի դեպքում անհայտ է, թե արդյո՞ք կան այն առանց նոսրացնելու խմող մարդիկ: Համենայն դեպս, նշենք, որ լեհերը նախազգուշացնում են, որ այդ ըմպելիքի չարաշահումը կարող է հանգեցնել մի շարք կողմնակի բարդությունների, այդ թվում՝ կուրության: Ավելացնենք միայն, որ Everclear լիկյորը քիչ է հայտնի, քանի որ այն հիմնականում օգտագործում են բարմենները այլ լիկյորներ և կոկտեյլներ պատրաստելու համար:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում