Աշխարհի ամենամատչելի դրախտավայրերը

Shabat.am-ը գրում է.

Աշխարհում կան բազում հրաշալի վայրեր, ուր այցելելը շատ մատչելի է: Ծառայությունների և հյուրանոցների ցածր գները թույլ են տալիս կազդուրիչ հանգիստ անցկացնել՝ միաժամանակ խնայելով ֆինանսական միջոցները: Այս սքանչելի դրախտավայրերում ճանապարհորդական անկրկնելի փորձառությունների պակաս չի զգացվի:

1. Հարավային Աֆրիկա

Նելսոն Մանդելայի անվան հյուրանոցի ղեկավարությունը այս տարի անցյալ տարվանից 8 %-ով ավելի ցածր գին է սահմանել սենյակների և ծառայությունների համար: Դուք կարող եք վայելել սաֆարին կամ պարզապես ազատության մեջ թափառող պինգվինների հետ ժամանակ անցկացնել Քեյփթաունում գտնվող Բոուլդեր լողափում: Կրուգերի ազգային արգելոցում մուտքի վճարը 20 դոլար է: Արգելոցում Դուք կարող եք տեսնել Աֆրիկայի վայրի կենդանիներին, օրինակ՝ թռչկոտող սրնչակ, հովազային կրիա, մրջնառյուծ և այլն: Այս բոլոր կենդանիները այցելուներին հաճելի ակնթարթներ են պարգևում և թույլ տալիս ավելի մոտիկից առնչվել վայրի բնությանը: Հարավային Աֆրիկայի գրեթե բոլոր տեսարժան վայրերում ամեն ինչ արված է այցելուներին գոհացնելու համար: Այստեղ կարելի է լողալ և զբաղվել սերֆինգով, իսկ ջրափրկարարները մշտապես զգոն կանգնած են, որպեսզի հարկ եղած դեպքում օգնության հասնեն այցելուներին: Յոհաննեսբուրգի Սոուետո ավանում են գտնվում Նելսոն Մանդելայի թանգարանը և Ապարտեիդի թանգարանը, որոնց հյուրընկալ դռները բաց են այցելուների առաջ: Վիլիկազի փողոցի ռեստորաններում առաջարկվում է աֆրիկյան լավագույն սնունդը՝ շատ ցածր գներով:

2. Վենետիկ

Վենետիկը համարվում է աշխարհի ամենագեղեցիկ քաղաքներից մեկը, սակայն ի տարբերություն մի շարք այլ գեղեցիկ քաղաքների, այստեղի հյուրանոցների ու ծառայությունների գները շատ ցածր են: Վենետիկում Դուք կարող եք հեշտությամբ օգտվել առաջարկվող բոլոր հարմարություններից ու հիանալ քաղաքի շքեղությամբ: 3-աստղանի հյուրանոցում մի գիշեր անցկացնելու դիմաց պետք է վճարել նվազագույնը 19 դոլար, իսկ առավելագույնը՝ 110 դոլար: Վենետիկ կատարած ճանապարհորդության ընթացքում, ի թիվս այլ տեսարժան վայրերի, անպայման այցելեք Սան Մարկոյի հրապարակ: Հյուրանոցներում վարձերը նվազել են 7 %-ով, ուստի Վենետիկում արձակուրդ անցկացնելը ներկայումս ավելի մատչելի է, քան նախկինում:

3. Դոմինիկյան Հանրապետություն

Այստեղ հյուրանոցների գները գրեթե նույնն են, ինչ Վենետիկում: Օրինակի համար դիտարկենք Խուան Դոլիոյում գտնվող «Plaza Real» հանգստավայրը: Սենյակները հագեցած են զանազան ժամանակակից հարմարություններով, որոնք միտված են գոհացնել այցելուներին: Այս շքեղ հյուրանոցում մեկ գիշերվա գինը նվազագույնը 34 դոլար է: Այստեղի հանգստավայրերում հանգրվանելը բավականին մատչելի է: Դրանց պատուհաններից երևում են գեղեցիկ լողափերն ու օվկիանոսը: Դոմինիկյան Հանրապետությունում ճանապարհորդելիս արժե այցելել նաև «Los Haitises» ազգային արգելոց, որտեղ ընդամենը 3 դոլարով կարելի է կայակ (նավակի տեսակ) վարձել: Հավելենք նաև, որ գումարի մեջ մտնում են նաև լիցենզավորված զբոսավարի ծառայությունները:

4. Բուենոս Այրես

Որոշ մարդիկ Բուենոս Այրեսը կոչում են «Հարավային Ամերիկայի Փարիզ»: Այս ռոմանտիկ քաղաքում շատ ցածր գներով կարելի է օգտվել կատարյալ հանգստի համար անհրաժեշտ բոլոր հարմարություններից ու ծառայություններից: Այս վայրը պարզապես դրախտային անկյուն է, որն առանձնապես հայտնի է տանգոյով ու համեղ պիցցայով: Շատ քիչ գումար վճարելով՝ կարելի է նաև թանգարաններ ու այլ պատմական վայրեր այցելել: Խորհուրդ կտանք նախևառաջ այցելել Բուենոս Այրեսի լատինամերիկյան արվեստի թանգարանը: Կոլոնթատրոնում օպերայի և բալետի ներկայացումների տոմսերը մոտավորապես 9 դոլար արժեն, իսկ զբոսավարի ուղեկցությամբ անցկացվող էքսկուրսիաները՝ 10 դոլար:

5. Ատլանտյան Կանադա

Ատլանտյան Կանադայում հանգստացողները կարող են ըմբոշխնել համեղ ծովամթերք և ծանոթանալ այս վայրի հարուստ պատմությանը: Ատլանտյան Կանադայի գրեթե բոլոր հյուրանոցներում գործում են ճկուն զեղչային համակարգեր: «Country Hearth Inn» հյուրանոցում մի գիշերվա արժեքը կազմում է 48 դոլար: Այս հյուրանոցում առկա են Ձեր արձակուրդն անմոռանալի դարձնելու համար անհրաժեշտ բոլոր պայմաններով: