Պարզ, փոքրիկ, բայց և... չափազանց հարմար ու անփոխարինելի դարձած իր. «Փաստ»

«Փաստ» օրաթերթը գրում է.

Բանջարեղենամաքրիչի (կեղևահան) օգտագործումը հեշտացնում է տնային տնտեսուհիների կյանքը: Առաջին հայացքից պարզ թվացող այդ գործիքը ավելի արդյունավետ է հանում բանջարեղենի կեղևը, քան սովորական դանակը, և խնայում է ժամանակը: Դրա հիմնական նպատակն է հեռացնել կեղևը բանջարեղենից և մրգերից, իսկ սովորական դանակի նկատմամբ առավելությունը անվտանգ լինելն է, մինիմալ է մատները կտրելու հնարավորությունը, գործընթացն արագ է, իսկ թափոնների ծավալը շատ ավելի քիչ է լինում, ինչը թույլ է տալիս խնայել սննդամթերքը:

Ներկայում շուկայում կա կեղևահանների հսկայական ընտրանի: Կարող եք ընտրել ըստ ձևի, գույնի, սայրի դիրքի և այլն։ Բացի սովորականներից, կան հատուկ որևէ տեսակի բանջարեղենի կամ մրգի համար նախատեսվածներ, որոնցով հնարավոր է նաև դեկորատիվ տեսք տալ՝ մաքրել, կտրել ու անգամ փորագրություններ անել բանջարեղենի ու մրգերի վրա:

Բանջարեղենամաքրիչները կարող են լինել մետաղական կամ կերամիկական: Վերջիններս իրենց փխրունության պատճառով թանկ են ու նաև ունեն կարճ ծառայության ժամկետ: Կերամիկական բանջարեղենամաքրիչները, ի տարբերություն մետաղականների, սրված են միայն մի կողմից, ուստի անհարմար են ձախլիկների համար։ Շեղբերը կարող են լինել ազատ շարժվող կամ ֆիքսված, ուղիղ կամ ատամնավոր: Ուղիղ շեղբերովները հաստ կեղևների համար են, ատամնավորները՝ բարակ կեղևների համար: Բանջարեղենամաքրիչներից շատերը չեն կարող սրվել, և վեց ամիս օգտագործելուց հետո դրանք դառնում են անօգտագործելի: Հետևաբար, ավելի լավ է ընտրել բանջարեղենի շարժական շեղբով նման սարքեր, որը հեշտությամբ կարելի է հեռացնել պտուտակահանով:

Բանջարեղենամաքրիչները առաջին անգամ հայտնվել են 19-րդ դարի վերջին Գերմանիայում։ Դրանց նպատակն էր արագ մաքրել բանջարեղենն ու մրգերը ճաշի ժամանակ, այսինքն՝ դրանք օգտագործվում էին որպես սպասքի յուրատեսակ հավելամիջոց: Դրանք ամենամեծ ժողովրդականությունն են ձեռք բերել ֆրանսիացի խոհարարների շրջանում, քանի որ դրանց օգտագործմամբ խոհարարները սկսել են զգալի խնայել ժամանակը սնունդ պատրաստելիս: 1929 թվականին հենց Ֆրանսիայում է սկսվել բանջարեղենամաքրիչների զանգվածային արտադրությունը L'Econome ապրանքանիշով: Ամենահայտնի «Sparschaler Rex» բանջարեղենամաքրիչը, որը մշակվել է դեռ 1947 թվականին, դեռևս արտադրության մեջ է։ Անգամ դրա պատվին 2004 թվականին Շվեյցարիայում փոստային նամականիշ է թողարկվել։

Բանջարեղենամաքրիչները լայն տարածում են գտել միայն մի քանի տասնամյակ առաջ, բայց այդ ժամանակից ի վեր դրանք անընդհատ կատարելագործվել են։ Այժմ խանութներում կարող եք գտնել անսովոր ձևի բռնակով կամ մի քանի շեղբերով մոդելներ, որոնք թույլ են տալիս մաքրել բանջարեղենը երկու ուղղությամբ՝ դեպի ձեզ և հակառակը: Հայտնվել են պտտվող դանակով մոդելներ, որոնց սայրը կարելի է փոխել՝ կախված բանջարեղենի տեսակից, ոմանք ունեն սրածայր հատված, որը թույլ է տալիս, օրինակ՝ հանել կարտոֆիլի «աչքերը»։

Բանջարեղենամաքրիչի ժամանակակից կիրառությունները բազմազան են: Այն կարող է ոչ միայն արագ մաքրել բանջարեղենը, զգուշորեն կտրատել սոխը կամ ավոկադոն փոքր կամ մեծ շերտերով, այլ նաև նույնիսկ օգտագործվել աղանդեր պատրաստելու համար: Բանջարեղենամաքրիչների օգնությամբ հնարավոր է ստեղծել ամբողջական գլուխգործոցներ։ Յուրաքանչյուր տնային տնտեսուհի պետք է ունենա նման փոքրիկ և բազմակողմանի իր:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում