Ռուս զբոսաշրջիկները սկսել են կարճատև հանգստի համար Հայաստան այցելել

 Tert.am-ը գրում է.

Գարնան և նաև ամռան ամիսներին մայրաքաղաքի ու մարզերի տեսարժան վայրերում ու սրճարաններում կարելի է հանդիպել ռուսաստանցի զբոսաշրջիկների հոծ խմբերի, որոնք, պարզվում է, Հայաստանն իրենց ճամփորդական քարտեզներում ներառել են ոչ միայն երկարաժամկետ հանգստի, այլև՝ ուրբաթ-շաբաթ-կիրակի օրերի համար:

«100 հազարանոց տուրեր, են գալիս են` «մայովկայի», ուրբաթ-շաբաթ-կիրակի օրերին մնում են, գնում»,- Tert.am-ին ասաց Երևանի կենտրոնում գտնվող սրճարանի մատուցողը:

Քաղաքացիական ավիացիայի գործակալության մամուլի քարտուղար Ռուբեն Գրձելյանը տեղեկացրեց, որ հունվարից ապրիլ Հայաստանի «Արմենիա» և «Շիրակ» օդակայանները սպասարկել են 501 հազար 822 ուղևոր, ինչը շուրջ 2000-ով ավելի է նախորդ տարվա նույն ժամանակահատվածի ցուցանիշից։

«Անցած տարվա համեմատ գրեթե նույն թիվն է, չի ավելացել: Սակայն ես սա բացատրում եմ նրանով, որ անցած տարի շատ աշխույժ էր, այս տարի` ճգնաժամային երևույթներ կան: Իսկ անցած տարի Ռուսաստանից շատ մեծ հոսքեր ունեինք՝ կապված տուրիզմի զարգացման հետ: Եվ այս տարի մի քիչ խեղճ է հատկապես այդ ուղղությունը»,-ասաց Ռուբեն Գրձելյանը:

Քաղավիացիոն գլխավոր վարչությունում այս պահին ամփոփված են միայն ապրիլի, ոչ մայիսի տվյալները.  մյուս կողմից էլ՝ նա չի կարող ասել, թե ուղևորներից որոնք են զբոսաշրջիկներ, սակայն ինչ-ինչ անձնական դիտարկումներ արել է:

«Ուղղակի երևում է, որ զբոսաշրջիկներ են, ռուս զբոսաշրջիկներ, նաև որ հետևեք մասնագիտացված կայքերին, նրանք գրում են, որ ռուսաստանյան տուրիստները կարճատև այցելությունների ժամանակ նախընտրում են Երևանն ու Մինսկը»,-ասաց Ռուբեն Գրձելյանը:

Yandex.ru-ում օրինակ` «ռուսաստանցիների համար հանգիստ» որոնումը տանում է զբոսաշրջությամբ զբաղվող մասնագիտական կայքերի հղումների, որոնցում ծավալուն տեղեկատվություն է զետեղված ոչ միայն Հայաստանում հանգստի պայմանների, տեսարժան վայրերի, ռեստորանների ու հյուրանոցների, այլև դեպի Հայաստան և Հայաստանից դուրս եկող ավիատոմսերի գների վրա: Այլ խոսքով՝ մի ողջ համակարգ, որը ռուս զբոսաշրջիկին կարող է սպառիչ տեղեկատվություն տրամադրել Հայաստան կատարվելիք ուղևորության վերաբերյալ։

Հայտնի TripAdvisor կայքում կան բավականին շատ արձագանքներ կան Հայաստանում անցկացված week-end-ների վերաբերյալ։ 

Իսկ go2armenia.com կայքում հուլիսի 4-ը առանձնացված է որպես թթի փառատոնի օրեր, որի ժամանակ խորհուրդ է տրվում լինել Հայաստանում:

«Փառատոնը կանցկացվի Երևանից 240 կմ հեռավորության վրա գտնվող  Գորիսում: Հյուրերը կարող են հետևել թթի օղու պատրաստման գործընթացին, ինչպես նաև տեղում համտեսել այս ըմպելիքը: Իսկ փառատոնի շրջանակներում կլինի նաև այլ խմիչքների ու ուտեստների, մասնավորապես, սյունյաց ուտեստների համտեսում»,-նշված է փառատոնի վերաբերյալ տեղեկատվությունում:

Այս կայքեր հնագիտության սիրահարների համար  որպես Հայաստանի հիմնական տեսարժան վայրեր նշում են Սանահինը, Կեչառիսը, Տաթևը, Նորավանքը, Առիճավանքը, վանական համալիրները, Զվարթնոց տաճարի ավերակները, Գառնին, Գեղարդը,  Տաթևի ու Ծաղկաձորի ճոպանուղիները, Երևանում՝ Մատենադարանը, Պատմության և մի քանի այլ պետական թանգարաններ, «Տղամարդկանց արձանը» և այլ պատմության և մշակույթի հուշարձաններ:

Իսկ Հայաստանի համար նման փաթեթներ ապահովում են մեծ թվով ռուսաստանյան զբոսաշրջային ընկերություններ՝ QO2ARMENIA, Алеан, BTA TRAVEL, Chip Trip, HIP WAY, ICS Group տուրիստական ընկերությունը և այլք:

Չնայած սրան, ռուսական «Բելնովոստի» լրատվականը,  ներկայացնելով, թե հետխորհրդային տարածքի ո՞ր երկրներ են ամենաշատը այցելում ռուսաստանցիները, առաջին տեղում նշել էր Ղրիմը, որը հիմա փաստացի Ռուսաստան է: Իսկ երկրորդ տեղում առանձնացրել էր Բելառուսը՝ նշելով, որ Ադրբեջան, Ղրղըզստան,Մոլդովա և Տաջիկստան ռուսները գրեթե չեն այցելում: