«Տարակուսելի» խմիչք, որն ունի աշխարհում ամենաթունդ տեսակը. տարեկան 10 մլն շիշ՝ ընդամենը 35 աշխատակցով. «Փաստ»

Մեր երկրում (և ոչ միայն մեր) Ավստրիայի ազգային խմիչքի մասին թեկուզ ինչ-որ բաներ գիտեն միայն քչերը։ Մարդկանց մեծամասնությունը երբեք չի էլ լսել դրա մասին, այդ պատճառով էլ պատմենք ավստրիական Stroh ռոմի մասին (կարդացվում է Շտրո): Գուցե շատերին հետաքրքիր լինի այն, որ Ավստրիայում կա նման ըմպելիք: Այդ ըմպելիքն ստեղծվել է դեռ 1832 թվականին Սեբաստիան Շտրոյի կողմից։ Եվ նա հազիվ թե սպասեր, որ իր մտահղացումը հայտնի կմնա ավելի քան 190 տարի: Այդ ժամանակ հարավային Ավստրիայում ալկոհոլի արտադրությունը սաղմնային փուլում էր, և երիտասարդ Սեբաստիան Շտրոն որոշեց դառնալ առաջին գործարարներից մեկը, ով բացեց ալկոհոլի արտադրության սեփական ձեռնարկությունը։ Նրա մահից հետո Stroh ռոմի արտադրությունը դարձավ ընտանեկան բիզնես, որը կայուն աճում էր:

 

Հարկ է նշել, որ հետագայում համաշխարհային շուկա դուրս գալուց հետո էլ այդ խմիչքի որակը ոչ մի կերպ չի տուժել։ Այսօր ընկերության գլխամասային գրասենյակը գտնվում է Կլագենֆուրտ քաղաքում։ Շատերի համար «ավստրիական ռոմ» արտահայտությունը տարակուսանք է առաջացնում։ Իրոք, Ավստրիան (այն ժամանակ՝ Ավստրո-Հունգարիան) երբեք հարավային գաղութներ չի ունեցել, իսկ ռոմը սովորաբար արտադրում են շաքարեղեգից։ Այն ժամանակներում ռոմ արտադրողները հաճախ փոխարինում էին շաքարեղեգի մելասի համը տարբեր խոտաբույսերի խառնուրդներով և ներկանյութեր ավելացնում։ Նման «ռոմային» հավելումներով ալկոհոլային հիմքը կոչվում էր Inlanderrum:

 

Ներկայում Stroh ռոմի արտադրության մեջ օգտագործվում է շաքարեղեգի ենթամթերք: Ստացված ռոմը հնեցվում է տակառներում 3 տարի։ Հիմա Շտրոյի մի քանի տեսակներ արտադրվում են տարբեր չափերի շշերով։ Նրանք ունեն թվային նշում, որը ցույց է տալիս խմիչքի մեջ ալկոհոլի պարունակությունը: Արտադրվում են Stroh 38, 40, 54, 60, 80: Stroh 80-ը աշխարհի ամենաթունդ ռոմն է: Ընդ որում, անգամ այլ տեսակի ալկոհոլային խմիչքներից քչերը կարող են համեմատվել նրա հետ թնդությամբ։ Բնականաբար, Շտրոյի ամենաթունդ տեսակները չեն սպառվում իրենց մաքուր տեսքով, թեև արտադրողն ինքը խորհուրդ է տալիս չնոսրացնել այն: Շատ դեպքերում Շտրոն տարբեր կոկտեյլների բաղադրիչ է: Ի դեպ, Ավստրիայում հայտնի B-52 կոկտեյլը պատրաստվում է հենց այդ՝ համեմված ռոմի հիման վրա։

 

Դրանից հաճախ պատրաստվում են Jagartee (որսորդական թեյ) և պունչ։ Բացի այդ, այն ավստրիական թխվածքների անբաժանելի բաղադրիչն է։ Չնայած այն հանգամանքին, որ Շտրոն դեռ այնքան էլ հայտնի չէ շատ երկրներում, բայց այն մեկ անգամ չէ, որ արտերկրում տարբեր մրցանակների է արժանացել։ Առաջին անգամ ընկերությունը ոսկե մեդալ է ստացել 1900 թվականին Փարիզի ալկոհոլային ցուցահանդեսում։ Իսկ այն փաստը, որ ընկերությունն ունի ընդամենը 35 աշխատակից, չի խանգարում նրան տարեկան արտադրել մոտ 10 միլիոն շիշ ռոմ և ուրախացնել նուրբ ալկոհոլի սիրահարներին աշխարհի հիսուն երկրում։

 

 

Մանրամասները՝ «Փաստ» օրաթերթի այսօրվա համարում