Հայկական սիրո խոստովանություն կամ Artuyt-ի «Փարաջանով 100» նոր հավաքածուն
PHOTOՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Սերգեյ Փարաջանովի հարյուրամյակի կապակցությամբ հայկական Artuyt ապրանքանիշը ներկայացրել է վարպետի ստեղծագործությունների հիման վրա ստեղծված աքսեսուարներ։ NEWS.am STYLE-ը ներկա է եղել ցուցադրությանը:
Ուրբաթ երեկոյան քաղաքի կենտրոնական հրապարակը, թերեւս, Երեւանի ամենաբանուկ վայրերից մեկն է։ Անցորդների անսպառ հոսքին ավելանում են նաեւ երեկոյան զգեստներով տիկնայք եւ կոստյումներով տղամարդիկ:
Ազգային պատկերասրահի նեղ ճեմասրահում մեկ-մեկ լսվում են ձեռքսեղմումների ու հագուստների խշշոցը, մարդիկ ողջունում են միմյանց ու ծանոթներ փնտրում։ Օծանելիքի ամպը խառնվում է օդում, կրունկների զնգոցը եւ կանաց ձեռքերին ու պարանոցին փայլող ծանր զարդերի թխկոցը լցնում է դահլիճը:
Հուզմունքի ստվերում նստած է սեւ կոստյումով մի կին, որի ուղիղ եւ խիստ սիլուետը ստեղծում է բարձրահասակ եւ, միեւնույն ժամանակ, փխրուն ուրվագիծ։ Հավաքված մազերը բացահայտում են մեծ ականջօղերը, իսկ գանգուրները նրբագեղ տեսք են հաղորդում:
Նրանից ոչ հեռու մի կին էր՝ ձյունաճերմակ հագուստով, որը բաղկացած էր կարճ զգեստից եւ երկար բաճկոնից։ Նիհար ուրվագիծը՝ հյուսվածքային գործվածքով, հիշեցնում է հերոսուհու, որը դուրս է եկել ձմեռային լանդշաֆտի նկարից, իսկ նեոնային լուսավորությունը ստեղծում է փխրուն ձյան փայլը նրա ուսերին:
Կաշվե տաբատի եւ կազակների ծանր պատկերները խառնվում էին մինչեւ հատակ հասնող, օդային երեկոյան զգեստների հետ, ինչը պատահական անցորդի համար դժվարացնում էր միջոցառման շարժառիթը գուշակելը:
Այսպես, մայրաքաղաքում տեղի ունեցավ հայկական հայտնի Artuyt ապրանքանիշի «Փարաջանով 100» հավաքածուի մասնավոր ցուցադրությունը, որը մասնագիտացած է հայ նկարիչների եւ արհեստավորների աշխատանքների տպագրությամբ՝ մետաքսե շարֆերի վրա։
Երկար պատկերասրահում էլեկտրոնային ռիթմը խլացնում է հյուրերի շշուկները, իսկ շոուն բացվում է ժամանակակից պարով: Փարաջանովը հայտնի է վառ գույների ու բարդ հյուսվածքների համադրման սիրով։ Սպիտակազգեստ փխրուն պարուհիները պարզել էին վառ կապույտ շղարշը եւ սահուն շարժումներով հոսում էին պոդիումի երկայնքով՝ նյարդային ջութակի ուղեկցությամբ։ Նույն պահին հայտնվեցին երկու սպիտակազգեստ երիտասարդներ՝ կրծքերին ասեղնագործված կապույտ ծիծեռնակներ, եւ ներկայացումը վերածվեց ժամանակակից պարի։
Հավաքածուի հիմնական երանգները դարձան օդային մշուշով արծաթագույնը եւ վառ կապույտը։
Արտույտը ներկայացրեց 16 «լուք», որոնցում բաց, նազելի զգեստներն ու կիսաշրջազգեստներն արձագանքում էին պաշտոնական կոստյումներին, իսկ Փարաջանովի աշխատանքների դրվագները հազիվ երեւում էին գոտկատեղին կապած գոտիներին եւ բաճկոնների կրծքի գրպաններում չփակված շարֆերին։ Բացի աննկատ դետալներից, մեծ զարդանախշերն ու գործվածքների վրա ասեղնագործությունները ներկայացված էին նաև վարպետի ամենաճանաչելի կոլաժներից դրվագների տեսքով։
Ու թեեւ Փարաջանովն իր կյանքի մեծ մասն անցկացրել է Վրաստանում եւ Ուկրաինայում, հայ հանդիսատեսի սերը նրա ստեղծագործության հանդեպ զգացվում է յուրաքանչյուր ժեստում ու տարերքում։ Վարպետի ստեղծագործություններում դրսեւորված կյանքի հասկացությունը կարմիր թելի պես անցնում է մեր երկրի պատմության մեջ, ինչի շնորհիվ Փարաջանովի ստեղծագործությունն այնքան է ոգեւորում հայ հանրությանը։
Ցուցադրությունից հետո պատկերասրահի հարակից սրահում ներկայացվեց վարպետի ստեղծագործությունների վառ պատկերների եւ շրջանակների տեսահոլովակը, որը միավորված էր նրա ամենահայտնի մեջբերումով՝ «Ես վրեժխնդիր կլինեմ աշխարհից սիրով»: Հենց դա էլ դարձավ շոուի կարգախոսը, իսկ Artuyt-ի նոր հավաքածուն արտացոլում էր բրենդի սերը վարպետի նկատմամբ՝ բառացիորեն թաքնված մոդելների կերպարների գույների եւ հյուսվածքների տակ՝ լրացնելով դրանք շարֆերի, գոտիների եւասեղնագործության տեսքով:
Ռեգինա Մելիքյան
Առավել մանրամասն` այստեղ.
https://t.me/+l9xjL01DqrowZjUy
