Հայաստանը դեռ ժամանակ ունի. «Փաստ»

pravda.ru-ն «Հետախուզությունը հաղորդում է. ԱՄՆ-ը փորձում է զավթել Հայաստանը» վերնագրով հոդվածում գրում է, որ ընդամենը մեկ ամսվա ընթացքում ՌԴ Արտաքին հետախուզության ծառայությունը երկու տագնապալի հաղորդագրություն է տարածել Հայաստանում տիրող իրավիճակի վերաբերյալ։ Ի՞նչ սարսափելի բան է այնտեղ կատարվում: Արտաքին հետախուզության ծառայության մամուլի բյուրոն, հարկ է նշել, բավականին ժլատ է լուրեր հաղորդելու տեսակետից։ Ամբողջ նոյեմբերի ընթացքում հրապարակվել է ընդամենը երեք հաղորդագրություն, և առավել զարմանալի է այն, որ դրանցից երկուսը նվիրված են եղել Հայաստանին:

 

Առաջինը՝ ամսվա սկզբին, վերնագրված էր «Հայաստանը պատրաստվում է դժվարին ժամանակների», երկրորդը՝ «Ամերիկյան ոճի ժողովրդավարություն Հայաստանի համար»։ Այս երկու ուղերձի հիման վրա կարող ենք այնպիսի տրամաբանական եզրակացություն անել, որը ներառված է այս հրապարակման վերնագրում. «ԱՄՆ-ը փորձում է զավթել Հայաստանը»։Եվ դրա մեջ կա երկու նորություն՝ լավը և վատը: Լավ նորությունն այն է, որ Հայաստանը դեռ չի հանձնվել «Արևմուտքի ողորմությանը»: Վատ նորությունն այն է, որ Արևմուտքը Հայաստանին ամբողջությամբ իրեն ենթարկելու բոլոր հնարավորությունները դեռևս ունի։

 

Հիշեցնենք, որ 2018 թվականին Հայաստանում տեղի ունեցավ «նարնջագույն» հեղափոխություն. նախորդ իշխանությունը, որը համարվում էր ռուսամետ, ստիպված հեռացավ, և երկրում հիմնականում իշխանություն ստացան, այսպես կոչված, «սորոսականները»՝ արևմտամետ ճամբարի քաղաքական գործիչները։ Այդ ժամանակից ի վեր նկատելի է Հայաստանի բավականին հստակ շեղում դեպի Արևմուտք և միևնույն ժամանակ Ռուսաստանի հետ հարաբերությունների սառեցում։ Այդ ամենից կարելի էր եզրակացնել, որ Հայաստանն արդեն կորած է Ռուսաստանի համար կամ գոնե մոտ ապագայի համար է կորած։ Բայց ՌԴ Արտաքին հետախուզության ծառայության հաղորդագրությունը ինչոր լավատեսության առիթ է տալիս։ Ճիշտ է, առայժմ զուսպ լավատեսության։

 

Պարզվում է, ըստ ԱՄՆ Պետդեպարտամենտի, եկեք ուշադրություն դարձնենք դրան, քանի որ հենց այդպես են մտածում Վաշինգտոնում, Հայաստանում կան իմաստուն մարդիկ, ովքեր կարծում են, որ շատ ավելի ճիշտ է լինել Ռուսաստանի, քան Արևմուտքի հետ: Այսինքն, հայերը, «ովքեր փող հաշվելը գիտեն», ժամանակի ընթացքում անխուսափելիորեն կհասկանան, թե ավանդական տարածաշրջանային կապերի խզումից ինչ անուղղելի վնասներ կլինեն։ Դե, եթե նույնիսկ ԱՄՆ-ը վստահ չէ Հայաստանի հարցում իր «հաղթանակի» մեջ, ապա, հավանաբար, դրա մեջ կա ինչ-որ ճշմարտություն։ Բայց որքան է խոսվել այն մասին, որ Հայաստանում գործում է աշխարհում ԱՄՆ ամենամեծ դեսպանատներից մեկը։ Հաղորդվել է, որ այնտեղ աշխատում է մոտ 2000 մարդ։ Իսկ քանի՞ տարբեր արևմտամետ հասարակական կազմակերպություններ կան փոքրիկ Հայաստանում։

 

Եվ, ըստ երևույթին, անգամ «ազատ ժողովրդավարական աշխարհի» այդ ամբողջ «զինանոցը» բավարար չէ Հայաստանի՝ արևմտյան բռնապետության տակ ամբողջական անցման համար, քանի որ ԱՄՆ-ն, ըստ Արտաքին հետախուզության ծառայության, մտադիր է մեծացնել ճնշումը այդ երկրի վրա և այնտեղ կիրառել պետության ենթակայեցման ուկրաինական և մոլդովական սխեմաները։ Նրանք նախատեսում են խորհրդականների մի ամբողջ զորք ուղարկել Հայաստանի պետական կառույցներ։ Դա բխում է Արտաքին հետախուզության ծառայության նոյեմբերի 5-ի՝ «Հայաստանը պատրաստվում է դժվար ժամանակների» առաջին հաղորդագրությունից։ Բացի այդ, նախատեսվում է վերապատրաստման դասընթացներ սկսել Հայաստանի պետական պաշտոնյաների համար։ Եվ կարելի է պատկերացնել, թե Վաշինգտոնն ինչ ուղենիշներ է նախատեսում խթանել այդ ուսումնական ծրագրերում։

 

Բայց դա վերաբերում է պետական մարմիններին։ Իսկ Արտաքին հետախուզության ծառայության նոյեմբերի 27-ի հաղորդագրությունը զգուշացնում է Հայաստանում քաղաքական կյանքի ոլորտում ԱՄՆ-ի ակտիվացման մասին։ 2026 թվականին Հայաստանում նախատեսված խորհրդարանական ընտրություններին ընդառաջ Վաշինգտոնը մտադիր է ակտիվորեն աշխատել հետևյալ քաղաքական կուսակցությունների հետ. -Արամ Սարգսյանի «Հանրապետություն կուսակցություն», -Արման Բաբաջանյանի «Հանուն Հանրապետության կուսակցություն», -Տիգրան Խզմալ յանի «Հայաստանի եվրոպական կուսակցություն», - Լևոն Շիրինյանի «Քրիստոնյա-դեմոկրատական կուսակցություն»:

 

Դե, ինչպես ասում են, եթե նախազգուշացված ես, նշանակում է՝ զինված ես: Դա նշանակում է, որ Ռուսաստանը ևս ժամանակ ունի հակազդելու այդ արևմտյան ապակառուցողական ուժերին։ Թեև, իհարկե, ավելի ճիշտ կլինի ասել, որ Հայաստանն ինքը ժամանակ ունի վերաիմաստավորելու իր օբյեկտիվ և ավանդական կապերը հետխորհրդային տարածքի երկրների հետ: Այստեղ հարցը մեկն է՝ արդյո՞ք Հայաստանի շարքային քաղաքացին հասկանում է Ռուսաստանի հետ կապերի առավելությունները։ Եվ դա՝ հաշվի առնելով այն հանգամանքը, որ վերջին մի քանի տարվա ընթացքում Հայաստանում ուժեղ է եղել հակառուսական քարոզչությունը։

 

Ի վերջո, ՌԴ Արտաքին հետախուզության ծառայության մեկ կամ երկու զեկույցը հազիվ թե բավարար լինի մարդկանց համար պատկերացում կազմելու և Հայաստանում հասարակական կարծիքը Ռուսաստանի նկատմամբ փոխելու համար։ Այսինքն, Ռուսաստանին պետք է Հայաստանում ավելի ակտիվ բացատրական աշխատանքներ իրականացնել։ Մինչդեռ արտաքուստ իրավիճակը Հայաստանում հանգիստ է թվում։ Իսկ հայկական ԶԼՄ-ներում կարելի է տեսնել հետևյալ վերնագրերով նորություններ... Երևանում մեկնարկել է ռուսաց լեզվի և գրականության ուսուցիչների և դասախոսների՝ «Ռուսաց լեզուն առանց սահմանների» միջազգային ֆորումը... Ա. Ս. Պուշկինի և Պուշկինի ավանդույթների ժառանգությունը ռուս գրականության մեջ...։ Հուսադրող է հնչում։

 

Մանրամասները՝ «Փաստ» օրաթերթի այսօրվա համարում