Դպրոցների ու մանկապարտեզների վերաբացումից հետո կստուգվեն երեխաները, ժամանակավորապես չեն գործի բուֆետները

Փետրվարի 1-ից դպրոցների ու նախադպրոցական ուսումնական հաստատությունների վերաբացումից հետո խոզի գրիպի բռնկման երկրորդ ալիքից խուսափելու համար մի շարք կանխարգելիչ քայլեր են տարվում: Այս մասին լրագրողների հետ հանդիպմանը հայտնեց ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը: Նրա խոսքո` կարևոր է, որ նշյալ հաստատություններում պահպանվի ջերմային ռեժիմը, որի նպատակով արդեն այսօրվանից մոնիտորինգ է իրականացվում: «Դպրոցներում ու մանկապարտեզներում ջերմային մոնիտորինգը սկսվել է, վաղն էլ կիրականացվի, մյուս օրն էլ, որպեսզի լիարժեք պատկերը ստանանք: Կարևոր է պահպանել ջերմային ռեժիմը, հակառակ դեպքում լուրջ խնդիրներ կունենաք»,-«Արմենպրես»-ի  փոխանցմամբ` հայտնեց Վանյանը:

ԱՆ ներկայացուցիչը տեղեկացրեց, որ դպրոցներում և մանկապարտեզներում բուժաշխատողներ են լինելու, ովքեր մեկշաբաթյա մոնիտորինգի միջոցով հայտնաբերելու են հիվանդության ախտանիշներ ունեցողներին: «Երեխաները, ովքեր ունենալու են թեթևակի հարբուխ, մեկուսացվելու են, դա առաջին հերթին, տվյալ երեխայի առողջության պահպանման համար է: Եթե թեթև նախանշաններ լինեն, մենք խորհուրդ կտանք ծնողներին նրանց չտանել մանկապարտեզ կամ դպրոց»,-շեշտեց Արտավազդ Վանյանը` հավելելով, որ Կրթության ու գիտության նախարարության հետ պայմանավորվել են բացակայությունների հարցը ժամանակավորապես անտեսել:

Նա նաև նշեց, որ սկզբնական շրջանում խորհուրդ են տվել դպրոցներում չգործեն բուֆետները, ուր կարող են աշակերտների կուտակումներ լինել:

2016 թվականի հունվարին, հիմնականում, տոնական և հետտոնական օրերին, արձանագրվել է սուր շնչառական վարակների աշխուժացում, որին էլ նպաստել են ջերմաստիճանի կտրուկ նվազումը, տոնական օրերին ակտիվ շփումները և գրիպի շրջանառող հարուցիչը (հիմնականում՝ գրիպի Ա տեսակի  H1N1  ենթատեսակ):

Առողջապահության նախարարի միջնորդությամբ` ԿԳՆ ենթակայության ներքո գտնվող նախպադպրոցական, դպրոցական, միջին մասնագիտական կրթական հաստատություններում դասերը հետաձգվել էին ընդհանուր առմամբ հունվարի 11-ից մինչև փետրվարի 1-ը: