Նիկոլ Փաշինյանը և Մհեր Գրիգորյանը դավաճան են, մեր ճանաչված սահմաններից թշնամուն հատվածներ են հանձնել․ Արամ Սարգսյան

Եթե սա կարելի է կոչել քաղաքականություն, պարզ երևում է, թե այն ինչին է հակված։ Թուրքիայի նախագահ Էրդողանը բացահայտ և միանշանակ ասում է, թե որն է իր նպատակը, այն է՝ վեց թուրքալեզու պետությունների միավորումը մեկ ազգ դառնալու նպատակով։ Մեր աչքի առջև թուրքալեզու պետությունները որոշում են կայացրել և ստեղծում են Մեծ Թուրանի բանակ։ Սահմանել են «Զանգեզուրի միջանցք» հասկացությունը, որ այն անընդհատ հնչի, և դրա անվան տակ պարզ խոսում են իրենց միավորման հնարավորության մասին։ Նախիջևանը դարձել է ռազմականացված տարածք։ Այնտեղ կուտակված է մեծ բանակ, հարևանությամբ՝ Իգդիրում, թուրքական զինվորական կորպուս կա։ 168TV-ի «#ՕրաԽնդիր» հաղորդման ժամանակ նման կարծիք հայտնեց Հայաստանի դեմոկրատական կուսակցության նախագահ Արամ Սարգսյանը:

«Այս պարագայում Հայաստանը պարտավոր է լուրջ հետևություններ անել՝ հասկանալու, թե մենք ի վերջո ինչպես ենք կանխելու այս ամենը։ Այն ագրեսիան, որը պատրաստվում է մեր նկատմամբ և պետք է իրականացվի, արվելու է «Զանգեզուրի միջանցքի» բացման անվան տակ։ Սիրիայի դեպքերի օրինակով մենք արդեն պարզ տեսանք, թե ինչպես է Թուրքիան իրականացնում իր ծրագրերը։ Պետք է խելագար լինես, որ հավատաս, թե Թուրքիան մեզ հետ ուզում է խաղաղ ապրել։ Միայն սիրիական Իդլիբում վեց տարի շարունակ 16 հազարանոց թուրքական բանակ էր կանգնած, այսինքն՝ նրանք նախապատրաստվում էին։ Բոլոր նրանք, ովքեր զարմացան, թե որքան միանգամից Սիրիայում նման փոփոխություն եղավ, պետք է հասկացած լինեին, թե ինչպես դրանից առաջ Թուրքիան Աֆրինը գրավեց և դա մարսեց»,- ասաց քաղաքական գործիչը:

«Սիրիայի այս սցենարը նախապատրաստված էր, Թուրքիան և Իսրայելը միասին՝ ԱՄՆ-ի շնորհիվ, հարցը լուծեցին։ Բլինքենը հայտարարում է, որ իրենք Թուրքիայի հետ որոշեցին, թե ինչպիսին է լինելու Սիրիայի ապագան։ Չեն էլ թաքցնում դա, սա այսօրվա ցինիզմի աշխարհն է։ Երբ այս ֆոնի վրա վերադառնում ենք մեր խելագարներին, ստացվում է՝ մենք Հայաստանն ուղղակիորեն կործանում ենք, տալիս ենք թուրքերին։ Նիկոլն ասել է, թե ուրախ կլինի, եթե իրեն մեղադրեն։ Նա բացահայտորեն մեղադրվում է պետական դավաճանության համար, այդ հաղորդումն ուղարկված է գլխավոր դատախազություն։ Իշխանությունը պնդում է, թե ՀԱՊԿ-ի համար մեր սահմանները պարզ չեն։ Բայց չէ՞ որ այս իշխանությունն է թշնամուն հանձնել Գորիս-Կապան ճանապարհը, որի իրավունքը չուներ։ Այդ ճանապարհը կառուցվել է Խորհրդային Հայաստանի տարածքում և մեր միջոցներով»,- նշեց ընդդիմադիր գործիչը:

Սարգսյանի կարծիքով՝ անհասկանալի է, թե ինչո՞ւ է այս իշխանությունը զբաղվում Հայաստանի սահմանազատմամբ, եթե այդ ամենն արդեն արվել է 1980-ական թվականներին.

«Խորհրդային Միության փլուզման պահին Հայաստանի սահմանազատված սահմանին 1466 սյուն արդեն տեղադրված է եղել։ Իշխանությունն ինքն է հարցականի տակ դրել դա։ Սկզբում խոսում էին Ալմաթիի հռչակագրի մասին, հիմա դա էլ չեն ասում, հասկացել են, որ դա որևէ կապ չունի այսօրվա գործընթացի հետ։ Եթե կար Հայաստանի՝ միջազգայնորեն ճանաչված սահման, ինչո՞ւ եք գնացել սահմանազատման և սահմանագծման։ Եթե այդ սահմանը չկա, ուրեմն չկա նաև Ալմաթիի հռչակագիրը»:

«Նիկոլ Փաշինյանը և Մհեր Գրիգորյանը մեղավոր են դավաճանության համար։ Դրա փաստաթղթային բազան կա։ Այն, ինչ կատարվեց Կիրանցում, մեր ունեցածի բացահայտ հանձնում էր։ Այսօր մեր գազատարի մի հատվածն արդեն թշնամու տարածքով է անցնում։ Երբ Փաշինյանը հայտարարում է, թե Արցախը մերը չէր, հետո ռուսներից պահանջում է, որ նրանց խաղաղապահ ուժերը մեր փոխարեն պաշտպանեն մեր քաղաքացիներին, դա նույնպես դավաճանություն է։ Եթե այդպես էր, ինչո՞ւ էր նա ստորագրում նոյեմբերի 9-ի եռակողմ հայտարարությունը»,- ամփոփեց Արամ Սարգսյանը:

Մանրամասները՝ տեսանյութում