Եթե այսօրվա գլխացավանքը լուծվում է Ադրբեջանի ձեռքով ՀՀ-ին չեզոքացնելով, բոլորը դրան համաձայն կլինեն. Արտակ Զաքարյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Բոլորը վաճառելու են Հայաստանը: Այս մասին NEWS.am-ի հետ զրույցում նշեց ՀՀԿ Գործադիր մարմնի անդամ, պաշտպանության նախկին փոխնախարար Արտակ Զաքարյանը՝ անդրադառնալով հարցին, թե արդյոք գերտերություններին այս պահին Հայաստանը Սյունիքով հետաքրքիր է:

«Եթե Իրանը և Թուրքիան ասում են, որ պետք է մի հատ քննարկենք Զանգեզուրի խնդիրը և դրա մասին Հայաստանի հարցը չկա, այսինքն ի՞նչն ենք քննարկում: Պարզ է, որ Թուրքիային պետք է անխոչնդոտ ճանապարհ դեպի Կենտրոնական Ասիա, դեպի, այսպես ասած, միջին միջանցք: Իսկ Հայաստանը այս ծրագրերի համար կարող է ստոպ լինել, հատկապես, որ Հայաստանը ինքնուրույն չի: Այսօրվա դրությամբ, այդ ստոպի կոճակը կարող է լինի Արևմուտքում, Ռուսաստանում, կարող է լինի այլ տեղ, և դրա համար թուրքերը մտածում են, որ ավելի հեշտ է ռազմական ուժով վերցնելը, հատկապես, որ Հայաստանը իշխանություն չունի»,-ասաց նա:

Զաքարյանի խոսքով, Հայաստանի իշխանությունը նման զարգացումների պայմաններում ոչ մի արձագանք չի անում. «Ոչ Թուրքիայի հայտարարություններին է արձագանքում, ոչ Ադրբեջանի, ոչ մի բանի չի խառնվում, իրենց համար անգլերեն են սովորում, հեծանիվ են քշում:

Ամբողջ ողբերգությունը նա է, որ ընդդիմության մոտ էլ չի երևում հարցի լուծման բանալին, հանգուցալուծումը և այսպես ընդդիմության որոշ մանր-մունր էլեմենտներ, դրանից փորձում են օգտվել՝ այլ ինչ մերկանցիլ շահեր առաջ տանելու համար։

Հանրապետականի համար այսօր իհարկե իշխանափոխությունը շարունակում է մնալ թիվ մեկ օրակարգը, որովհետև դա է լուծման տանող ճանապարհը: 

Մյուսը այն է, որ այսօր, այո, կան հնարավորություններ, կան քաղաքական լուծումներ, որոնցով հնարավոր է գոնե մի քանի տարի բալանսը պահել, եղածը պահել, մինչ որ համաշխարհային որոշակի ստաբիլիություն կլինի»,-ասաց ՀՀԿ-ական գործիչը:

Նա նկատեց, որ Նիկոլ Փաշինյանին հեռացնելը այսօր արդեն ոչ թե նպատակ է, որ նրան կհեռացնեն ու բոլոր հարցերը կլուծվեն, այլ նպատակը երկիրը այս աղետալի վիճակից դուրս բերելն է, իսկ այդ նպատակին հասնելու թիվ մեկ միջոցը իշխանափոխություն է. «Այսինքն պետք է վարորդին իջեցնես ղեկից, որ կարողանաս հասնես քո ուզած տեղը»:

Նրա խոսքով, ԱՄՆ-ն ինչքան էլ քննադատում էր Ադրբեջանի ռեժիմը, հիմա արդեն Թրամփի իշխանության օրոք դա կարող է ամբողջությամբ փոփոխվել և չոր շահերի հաշվարկի հիման վրա Ադրբեջանը դառնա կարևոր։ «Ադրբեջանը Ռուսաստանի համար կարևոր է, Միացյալ Նահանգների համար կարևոր է, իր համար Թուրքիայի միջոցով ստեղծում է նաև Արևմուտքի հետ դաշնակցություն: Տարածաշրջանում ինքը համարվում է Ռուսաստանի շահերի կրողը, Իրանի հետ իր խնդիրները կարծես թե ինչ-որ ձևով կարողանում է լուծել, կարողանում է խուսափել Իսրայելի առջև ստանձնած իր պարտավորություններից և դրա փոխարեն այլ ծառայություններ մատուցել, և արդյունքում ի՞նչ է իրեն պետք՝ այդ բոլորի շահերը ապահովելու համար Հայաստանին չեզոքացնել։  Այդ մեծ գլոբալ մեծ գլոբալ շահերի մեջ այդ խոշոր պետությունները աչքը կփակեն Ադրբեջանի այդ շահի վրա:

Իհարկե, դրանով շատ ավելի մեծ պրոբլեմ կստեղծեն հետագայում պանթուրանիզմի և թուրքախոս երկրներից կախվածության մեջ դնելով և ռուսներին, և արևմուտքին, և Չինաստանին և Հնդկաստանին, բայց այսօր դա արդեն հետագայի գլխացավանք է, այսպես ասած, այսօրվա գլխացավանքը, եթե լուծվում է Հայաստանին չեզոքացնելով և դա լուծվում է Ադրբեջանի ձեռքով, այսօր համաձայն կլինեն բոլորը»,- հայտարարեց Զաքարյանը:

 Հետևեք մեզ՝ այստեղ