«Ալիևը բացահայտ ասում է՝ պատրաստվում է պատերազմի, «Զանգեզուրի միջանցք» է ուզում բացել, մենք չպետք է ապրենք զուգահեռ տիեզերքներում». Գրիգորի Այվազյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ալիևը տարին մեկնարկել է՝ Հայաստանին ներկայացնելով հերթական պահանջներն ու սպառնալիքները։ Ադրբեջանական լրատվամիջոցների հետ հանդիպման ժամանակ նա հայտարարել է. «Հայաստանը ֆաշիստական երկիր է։ Իսկ  «Զանգեզուրի միջանցքը» Ադրբեջանին պետք է, և այն պետք է բացվի։ Խաղաղության պայմանագիրն էլ եթե Հայաստանին անհրաժեշտ չէ, ապա Ադրբեջանին առհասարակ պետք չէ»։

Ի պատասխան Ալիևի այս հայտարարություններին, Նիկոլ Փաշինյանը հարցազրույց է տվել «Արմենպրեսին» ու ասել, թե «Ադրբեջանի ագրեսիվ հայտարարություններին համարժեք հայտարարություններով չեն պատասխանի, քանի որ հավատարիմ են մնալու խաղաղության օրակարգին»։

Ադրբեջանի հարցերով փորձագետ, պատմական գիտությունների թեկնածու Գրիգորի Այվազյանի խոսքով՝ Ալիևը մինչև այս հայտարարությունները, Ամանորին իր շնորհավորանքի ժամանակ բավականին մեծ ժամանակ է հատկացրել կրկին Հայաստանին՝ փնովել հայկական պետականությունն ու հայ ազգին։

«Ալիևն ասում էր, որ «ռազմական բյուջեին այնքան գումար է հատկացնում, որքան չի հատկացնում Արցախին ու Արցախում վերաբնակեցման հարցերին։ Ասում է՝ հարգելի ադրբեջանցի թոշակառուներ, դուք թոշակ քիչ եք ստանալու, բայց մեղավորը ես չեմ, այլ հայերն են, պետք է նրանց ագրեսիային անընդհատ դիմակայելու համար»։ Կարճ ասած՝ Ալիևը կրկին հայ ազգին նշանակեց մեղավոր՝ իր հանցավոր քաղաքականության համար։

30 տարի շարունակ Ալիևն ու իր հայրն ադրբեջանցիներին ասում էին՝ դուք վատ եք ապրում Արցախի պատճառով, հիմա փաստորեն արդեն արդարանալու բան չունի։

Ալիևը մինչև Նոր տարի իր հանրությանն ասել էր, որ Հայաստանի հետ պատերազմ է լինելու, մարդը բացահայտ ասում է՝ նա ուղղակի տենչում է այդ պատերազմը, նա «Զանգեզուրի միջանցք» է ուզում բացել ու այդ մասին հստակ ասում է։ Ալիևն ակնհայտորեն սպառնում է մեր երկրի ոչնչացմամբ»,- 168.am-ի հետ զրույցում նշեց Գրիգորի Այվազյանը։

Այս ամենին զուգահեռ՝ Հայաստանի իշխանությունը ոչ թե ադրբեջանական ագրեսիային դիմագրավելու պատրաստություն է տեսնում, այլ փորձում է երկրի ներսում ճնշել հայ հասարակությանը, նրա վրա դնելով ծանր սոցիալական բեռ՝ հանրային տրանսպորտի ուղեվարձն է թանկացնում, գույքահարկը, աղբահանության վճարը։ Իրավիճակը կոլապսի է վերածում, իսկ հանրության գործողություններից այնպիսի տպավորություն է, որ չի փորձելու ընդվզել՝ համակերպվել է։

«Ստացվում է, որ մենք Ադրբեջանին զուգահեռ իրականության մեջ ենք ապրում՝ Ադրբեջանը տենդագին պատրաստվում է նոր պատերազմի, իսկ Հայաստանում ժողովուրդը գտնվում է խորը սոցիալ-քաղաքական ծանր վիճակի մեջ, սա մահացու վտանգ է թե՛ մեր պետականության, թե՛ հայ ազգի հետագա գոյությանը։

Կարծում եմ՝ այս ամենից պետք է համապատասխան եզրակացություններ անել ու պատրաստվել անխուսափելիին, ինչն Ադրբեջանը չի թաքցնում։ Չգիտեմ՝ էլ ինչպես ասեմ, որ ի տարբերություն Հայաստանի, Ադրբեջանում իրենց խնդիրները լուծելու հարցում հետևողական են, այն էլ պատերազմի միջոցով»,- հավելեց փորձագետը։

Գրիգորի Այվազյանը վստահ է՝ Հայաստանում իշխանափոխության միակ ճանապարհն ընտրություններն են, և հույս ունի, որ այդ ընտրություններում ժողովուրդն իր վճռական խոսքը կասի, թե արդյո՞ք ՀՀ իշխանության քայլերը համարժեք են Ադրբեջանի իշխանությունների վարած քաղաքականությանը Հայաստանի դեմ։

«Երբ մեր դեմ պատրաստվում են պատերազմի, մենք չպետք է ապրենք զուգահեռ  տիեզերքներում։ Եթե հայ ազգը կարծում է՝ Ադրբեջանի հետ հնարավոր է խաղաղ ապրել, սխալվում է, պետք է հասկանալ պատասխանատվություն ստեղծված իրավիճակի համար։

Հայ ազգը, ի վերջո, իր վերաբերմունքը պետք է ցույց տա ստեղծված իրավիճակին համարժեք։

Ինչ վերաբերում է պատերազմին, ապա Հայաստանն ու հայ ազգը պետք է հույսը միայն իր վրա դնի։ Արցախը կորցնելուց հետո, Հայաստանի անվտանգային խնդիրներն ավելի մեծացան, հայկական Արցախը բավականին լուրջ գործոն էր տարածաշրջանում, շատերն այս փաստը թերագնահատել են։ Հիմա հայ ազգը դրա արդյունքն է ճաշակում։ Այնպես որ, ազգը պետք է հույսն իր վրա դնի, սթափվի ու իրավիճակին գործի համարժեք։ Եթե ցանկանում է, որ իրեն հարգեն, ապա առաջին հերթին ինքն իրեն պետք է հարգի, իր խոսքն ու դիրքորոշումը ցույց տա»,- ընդգծեց Գրիգորի Այվազյանը։