Հետծննդաբերական դեպրեսիա․ ինչու է այս երեւույթը հաճախ կանանց համար ճակատագրական դառնում

LIFE 1 February, 2016 23:26

Ծննդաբերել՝ մահանալու համար։ Ինչու են կանայք այդքան հաճախ տառապում հետծննդաբերական դեպրեսիաներից։ Ամանորի տոներին հաջողակ դիզայներ, 31-ամյա Գալինա Միլոսերդնայան ինքնասպան եղավ՝ իրեն ցած նետելով բնակարանի պատուհանից։

Կինը երկու երեխա ուներ՝ 4-ամյա աղջիկն ու 6 ամսական որդին։ Ոստիկանները պարզեցին՝ ինքնասպանության պատճառը հետծննդաբերական դեպրեսիան է․․․ ու վերջ։ Ինչու է հաջողակ, կայացած կինը, երկու երեխաների մայրը, նման քայլի դիմել եւ կա արդյոք հետծննդաբերական դեպրեսիան հաղթահարելու հեշտ միջոց։ Ռուսական լրատվամիջոցները հեղեղվեցին լուրերով, որ Գալինան ինքնասպան է եղել։

Ընկերներն ասում են՝ սովորական աղջիկ էր, երկնքից աստղեր չէր իջեցնում։ Աշխատանք ուներ, բայց անընդհատ ձգտում էր ավելի շատ ունենալ՝ կարիերա, հայտնիություն, փող, սեր, ընտանիք, երեխաներ։ Կարիերայի եւ ընտանիքի միջեւ չգիտեր որն ընտրել։ երկորդ երեխայով հղիացավ, երբ դուստրը 4 տարեկան էր։

«Երբ Գալյան 7-րդ ամսում էր հղիության, նրա հետ տարօրինակ բաներ սկսեցին կատարվել։ Նա բարկանում էր, սոցկայքերում անընդհատ բողոքում կյանքից, կոպտում մարդկանց։ Երբ նրան խորհուրդ էին տալիս, բարկանում էր։ Նախկինում նա այդպիսին չէր։ Շատ էր անհանգստանում, որ գիրացել է, չի կարողանալու կրկին նիհարել։ Մի անգամ էլ սոցկայքում գրել էր՝ ես դժոխքում եմ ապրում»,- հիշում է նրա ընկերուհին։ «Բարի գալուստ դժոխք, ես որդի եմ ունեցել» Սովորական ընտանիք էին, նորմալ ապրում էին։ Սթրեսի լուրջ պատճառ չկար։ Կամաց-կամաց սոցկայքերի նրա էջում վատատեսական գրառումներ հայտնվեցին։

Հատկապես՝ որդու ծնունդից հետո։ Նա գրում էր, որ հոգնում է, չգիտի՝ ինչպես գումար վաստակել, հատկապես, երբ երկու երեխա ունի։ Հետո գրել էր, որ ոմանք ամեն ինչ ունեն, ոմանք՝ ոչինչ եւ չեն էլ ունենա։ Ծանոթները ասում են, որ դստեր ծնվելուց հետո Գալինան երջանիկ էր, նրա հանդեպ հոգատար, ուրախ։ Որդու ծնվելուց հետո կամաց-կամաց փոխվեց։ «Բարի գալուստ դժոխք» գրել էր մի անգամ կինն ու իր գրածը մեկնաբանել՝ «Որդի եմ ունեցել»։ «Գալինան շատ էր փոխվել, նրա հետ շփումն անտանելի էր դարձել։ Վատ էր քնում, ուզում էր կրծքով կերակրումից հրաժարվել։

Մտածում էինք՝ բոլորն էլ երեխա են ունենում, դժվարությունների մեջ հայտնվում, բայց անցնում է»,- պատմում է նրա ընկերուհին։ «Իմ մահվան մեջ մեղադրեք նորածին երեխային» Հետծննդաբերական դեպրեսիան կամակորություն չէ, հոգնածություն չէ, լուրջ ախտորոշում է։

Կանանց 15-25 տոկոսը ծննդաբերությունից հետո հակված է այս երեւույթին, հաճախ դա ողբերգության է բերում։ Մասնագետները պնդում են՝ նոր ծննդաբերած կանանց հետ պետք է աշխատեն հոգեբանները։ Իսկ այն կանայք, ովքեր ծննդաբերելուց հետո դեպրեսիայի մեջ են ընկնում, պետք է բուժվեն հատուկ մասնագիտացված կլինիկաներում։ Բայց նման պրակտիկան ընդունված չէ, իսկ հետծննդաբերական դեպրեսիայի մեջ գտնվող կանանց ողբերգությունը սարսափեցնող է։

Նախորդ տարի 28-ամյա Աննա Պոլիկարպովան նա խեղդել էր երկու երեխաներին՝ նորածին դստերն ու 7 տարեկան որդուն, ապա կախվել։ Ստարկովոյի 26-ամյա բնակչուհի Եկատերինա Յուրկովան նորածին երեխայի հետ ցած էր նետվել պատուհանից։ Հարազատ մայրը հունվարի 9 ին լոգարանում խեղդել էր երկու որդիներին, ապա զանգահարել ամուսնուն ու ասել, թե ինչ է արել։

Դեպքը տեղի էր ունեցել Իրկուտսկում։ Հոգեթերապեւտ Օլեգ Մորոզն ասում է, որ հետծննդաբերական դեպրեսիան լուրջ հիվանդություն է, այն կարելի է ախտորոշել միայն նորմալ հետազոտությունից հետո։ Դրա ազդեցության տակ կանայք ինքնասպան են լինում, սպանում երեխաներին կամ հրաժարվում փոքրիկներից։ Ռիսկի խմբում են այն կանայք, ովքեր հոգեբանորեն պատրաստ չէին կյանքի նման լուրջ փոփոխությունների, երկրորդ պատճառը հորմոններն են, երրորդը՝ ժառանգական հակումը։

Նման իրավիճակի են բերում նաեւ երկարատեւ սթրեսը հղիության ընթացքում, վախերը, դեպրեսիան։ Նման հակում ունեն նաեւ այն կայանք, ովքեր երեխա ունենալուց հետո ոչ մի աջակցություն չեն ստանում, միայնակ են մնում։ Հոգեբանը խորհուրդ է տալիս հղիների հարազատներին հետծննդաբերական դեպրեսիա հիշեցնող նշաններ տեսնելու դեպքոմ անմիջապես դիմել մասնագետի օգնությանը։ Նման նշաններից են՝ անընդհատ հոգնածություն, անհանգստություն, ջղագրգիռ վիճակ։ Եթե կինը երկու շաբաթից ավելի՝ ունի այդ նշանները, դիմեք մասնագետի։