Փորձում են մեղմել քաղաքացիների սոցիալական դժգոհությունը՝ հարկային տեռորի և սոցիալական թալանի հետ կապված. «Փաստ»

«Փաստ» օրաթերթը գրում է.

eadaily.com–ը «Փաշինյանի «եվրոհետսողալը» նրա՝ ԱՄՆ կատարած վերջին ձախողված այցի հետևանքն է» վերնագրով հոդվածում գրում է, որ, ըստ երևույթին, Հայաստանի իշխանությունները որոշել են «թաքնվել» և, «կոռումպացված պաշտոնյաներից» ապօրինի ձեռք բերված գույքի «բռնագրավման» վերաբերյալ հիմար և ծիծաղելի բովանդակությամբ հայտարարություններից բացի, առայժմ ոչինչ չանել, գրել է լրագրող Արման Աբովյանը VERELQ պորտալում։ Փորձագետի կարծիքով, այն, ինչը շքեղորեն կոչվում է «կոռուպցիայի դեմ պայքար», կոչված է մեղմելու քաղաքացիների սոցիալական դժգոհությունը՝ հարկային տեռորի և սոցիալական թալանի հետ կապված, որը իրականացրել են Հայաստանի ներկայիս իշխանությունները։ Եվ եթե դրան գումարենք տնտեսվարող սուբյեկտների նկատմամբ տարբեր տուգանքների համատարած կիրառումը, ապա իրավիճակը դառնում է առավել քան կրիտիկական։ Եվ այդ ամբողջ քաոսի ֆոնին Նիկոլ Փաշինյանը բիզնեսի ներկայացուցիչներին կոչ է անում երկխոսության։ Բայց դա չէ կարևորը: Կարևորն այն է, որ Փաշինյանի կառավարության արտաքին քաղաքականության ողջ գաղափարախոսությունն է լիովին ձախողվել՝ սկսած ռուսաֆոբիայով Հայաստանի բնակչությանը լցնելուց, թուրք-ադրբեջանական տանդեմի առաջ նվաստացուցիչ պահվածքից և վերջացրած արտաքին խաղացողների կամքի հնազանդ կատարմամբ։

Այս համատեքստում շատ հետաքրքիր է «Ընկեր գեներալ» Telegram ալիքի հեղինակի դիրքորոշումը, որը հետևողականորեն քննադատում է Հայաստանի իշխանությունների՝ եվրամիութենական նկրտումները:

«Իհարկե, Փաշինյանը մի փոքր հետ է սողացել եվրաինտեգրման նախագծից։ Ամենևին պատահական չէ, որ ԱԺ եվրոպական ինտեգրման հարցերի հանձնաժողովի նախագահ Արման Եղոյանն ասել է, որ, պարզվում է, խորհրդարանը չէր էլ մտածում որևէ հանրաքվեի մասին, և որ Եվրոպայի հետ գործընկերությունը տեղի է ունենալու «Համապարփակ և ընդլայնված գործընկերության մասին» համաձայնագրի շրջանակներում։ Հիմնական հարցն այն է, թե ո՞ւմ է ուղղված այդ ապաշխարությունը: Շատ կասկածելի է, թե Պուտինին: Նման բանավոր ակրոբատիկայով Պուտինին չես համոզի: Եվ դա նրան պետք էլ չէ։ Պուտինը սպասում է այս հայկական ծաղրածուների վերջին, որից հետո էլ կերևա, թե ինչ անել:

Ամենայն հավանականությամբ, Փաշինյանի «եվրոհետսողալը» ԱՄՆ կատարած ձախողված այցի և փոխնախագահ Վենսի հետ երկխոսության հետևանքն է։ Նիկոլ Վովաևիչին իրեն հասկանալի լեզվով ասել են, որ Եվրամիության հետ հարաբերություններն այսօր քաղաքականապես վնասակար են Միացյալ Նահանգների համար, որը որոշել է «ծերուկ Եվրոպան» հռչակել անազատության և ոչ ժողովրդավարական կառավարման տարածք: Եվ ինքնիշխան Հայաստանն անմիջապես ճշգրտել է իր ընթացքը, որը, ինչպես մինչև վերջերս պնդում էին ամենատարբեր ալենսիմոնյաններ, համապատասխանում է ժողովրդի ձգտումներին։ Ժողովուրդը կսպասի, եթե Թրամփն է ասել»։

Մանրամասները՝ «Փաստ» օրաթերթի այսօրվա համարում