ԱՊՊԱ-ն կայացած և հանրային գիտակցության մեջ ձևավորված համակարգ է. Վահան Ավետիսյան

Հայաստանում 2015 թվականին ապահովագրական վճարները կազմել են 17 մլրդ 700 մլն դրամ: Այս ցուցանիշը 2014 թվականի համեմատ նվազել է 100 մլն դրամով: Ինչպես հաղորդում է «Արմենպրես»-ը, լրագրողների հետ հանդիպմանն այս մասին տեղեկացրեց Հայաստանի ավտոապահովագրողների բյուրոյի գործադիր տնօրեն Վահան Ավետիսյանը` ամփոփելով ԱՊՊԱ համակարգի գործունեությունը:

Նշված ժամանակահատվածում ապահովագրված ավտոմեքենաների քանակը կազմել է 457 հազար 878: Այս ցուցանիշը նույնպես 2014 թվականի համեմատ նվազել է: 2014 թվականին այն կազմել էր 464 հազար 61:

«Ապահովագրված ավտոմեքենաների թվի նվազումը պայմանավորված է ոչ կարգապահ վարորդներով: Նրանք պարզապես ժամանակին չեն դիմել ավտոմեքենան ապահովագրելու համար: Ուզում եմ նման վարորդներին կոչ անել ժամանակին դիմել, որովհետև դա հետագայում խնդիր է առաջացնում բյուրոյի համար: Ի դեպ, մենք նախատեսում ենք առաջարկել մի նախագիծ, ըստ որի, ավտոմեքենան ժամանակին չապահովագրելը կազդի նաև ոչ կարգապահ վարորդների վարկային պատմության վրա»,-ասաց Վահան Ավետիսյանը: Լրագրողների այն հարցին ի պատասխան, թե միգուցե վարորդը պարզապես գումար չունի, ՎահաÕ ¶ Ավետիսյանը նշեց, որ նման դեպքում օրենքը թույլ է տալիս դիմել ոստիկանություն և ավտոմեքնենան շահագործումից հանել:

Վահան Ավետիսյանի փոխանցմամբ` 2015 թվականին ապահովագրական հատուցումը կազմել է 8 մլրդ 800 մլն դրամ: 2014 թվականին այս ցուցանիշը կազմել էր 9 մլրդ 700 մլն: Նախորդ տարի հատուցվել է 41 հազար 203 դիմում: Հատուցման միջին գումարը կազմել է 212 հազար 661 դրամ: Նախորդ տարի գրեթե հազար հատուցման դիմում մերժվել է:

Բյուրոյի գործադիր տնօրենը որպես ձեռքբերում նշեց, որ  ԱՊՊԱ-ն կայացած և հանրային գիտակցության մեջ ձևավորված համակարգ է, որն էապես լուծեց իր առջև դրված սոցիալական խնդիրը: Նրա խոսքով, ԱՊՊԱ համակարգում կիրառվող գործընթացների տևողությունը և հարմարավետությունը դեռևս գոհացնող մակարադակի վրա չէ: Համակարգի ներդրումը մեծացրել է խցանումները երթևեկության մեջ, և վարորդների համար այս առումով ստեղծվել են որոշակի անհարմարություններ:

«Դա պայմանավորված է այն հանգամանքով, որ վթարի ենթարկված վարորդներին կարող են ցուցումներ տալ մի քանի մարմիններ` Ճանապարհային ոստիկանությունը, ապահովագրող ընկերությունը: Եվ մինչ վարորդն այդ հրահանգներին հետևում է ու նոր է ավտոմեքենան տեղաշարժում, որոշակի ժամանակ է անցնում: Մենք նախատեսում ենք այնպես անել, որ այդ բոլոր ցուցումները կենտրոնացվեն մեկ մարմնի ձեռքում»,-ասաց Վահան Ավետիսյանը:

Գործադիր տնօրենի խոսքով, հասարակական բավարարվածությունը դեռևս անհրաժեշտ մակարդակի չի հասել վնասների գնահատման և պատճառների փորձաքննության գործընթացներից: Այդ ուղղությամբ նույնպես նախատեսում ենք քայլեր ձեռնարկել: Անդրադառնալով առաջիկա ծրագրերին` Վահան Ավետիսյանը նշեց, որ նպատակ ունեն դյուրացնել ԱՊՊԱ պայմանագրերի կնքման գործընթացը: Դրանից բացի նախատեսում են ծանուցումների տրամադրման էլեկտրոնային համակարգ ներդնել: Ներկայում փոստային ծառայության միջոցով ծանուցումը վարորդին հասնում է 5-10 օրվա ընթացքում, իսկ էլեկտրոնային տարբերակ ով շատ արագ միանգամից վարորդը կստանա ամբողջական փաթեթ դեպքի վերաբերյալ:

Ավտոապահովագրողների բյուրոյի գործադիր տնօրենի փոխանցմամբ` շուտով շրջանառության մեջ կդրվի նախագիծ, որով նախատեսվում է գույքային վնասներով պատահարների փորձաքննությունների գործընթացը տեղափոխել ԱՊՊԱ ոլորտ: