Չինաստանի արտգործնախարարը խոսել է Ռուսաստանի, ԵՄ-ի և ԱՄՆ-ի հետ հարաբերությունների մասին

​Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Չինաստանի արտաքին քաղաքականության առաքելությունը մնում է անփոփոխ. Պեկինը կաշխատի բոլոր երկրների հետ՝ պաշտպանելու արդարությունը և նպաստելու աշխարհում խաղաղությանը և կայունությանը։ Ինչպես «Արմենպրես»-ը տեղեկանում է China Daily պարբերականից, այս մասին հայտարարել է Չինաստանի արտաքին գործերի նախարար Վան Ին երկրի գլխավոր քաղաքական իրադարձության՝ «Երկու նիստ»-ի շրջանակներում տեղի ունեցած մամուլի ասուլիսում։

Ի պատասխան հարցի՝ արդյոք ԱՄՆ-ի հետ Ռուսաստանի բանակցությունները կազդեն Պեկին-Մոսկվա ռազմավարական համագործակցության վրա, Վան Ին հայտարարել է, որ Չինաստանի և Ռուսաստանի բարեկամությունը նույնքան ամուր և կայուն կմնա, որքան նախկինում՝ անկախ միջազգային ասպարեզում տեղի ունեցող զարգացումներից։

«Երկկողմ հարաբերությունները կմնան հասուն, ամուր և կայուն այս անհանգիստ աշխարհում։ Հիմնվելով իրենց պատմական փորձի վրա՝ Չինաստանը և Ռուսաստանը որոշել են հետևել միմյանց նկատմամբ մշտական ​​բարիդրացիությանը և բարեկամությանը և շարունակել համապարփակ ռազմավարական համագործակցությունը՝ հիմնված փոխադարձ շահի վրա», – ասել է Չինաստանի արտգործնախարարը։

Բացի այդ, նախարարն անդրադարձել է Չինաստանի և ԵՄ-ի փոխգործակցությանը՝ նշելով, որ դա ռազմավարական մեծ նշանակություն ունի, և որ կողմերի հարաբերություններն ազդում են ողջ աշխարհի վրա։

«Չինաստանի և Եվրոպայի ընդհանուր տնտեսության ծավալը գերազանցում է համաշխարհային տնտեսության մեկ երրորդը, և Չինաստան-ԵՄ համագործակցությունը մեծ ռազմավարական նշանակություն և ազդեցություն ունի ամբողջ աշխարհի վրա», – ասել է Վան Ին։

Նա խոսել է նաև Չինաստանի և ԱՄՆ-ի հարաբերությունների մասին՝ շեշտելով, որ պետք չէ «ունենալ պատրանքներ», թե հնարավոր է ճնշում գործադրել Չինաստանի վրա և միաժամանակ լավ հարաբերություններ պահպանել նրա հետ։

«Չինաստանը և Միացյալ Նահանգներն ունեն մեծ ընդհանուր շահեր և համագործակցության տարածություն և կարող են դառնալ գործընկերներ՝ հանուն համատեղ զարգացման և բարգավաճման: Չինական կողմը կշարունակի առաջ մղել Չինաստան-ԱՄՆ հարաբերությունները դեպի կայուն և առողջ զարգացում` նախագահ Սի Ծինփինի կողմից առաջադրված փոխադարձ հարգանքի, խաղաղ գոյակցության և փոխադարձ շահավետ համագործակցության սկզբունքներին համապատասխան», – Վան Իի խոսքերն է մեջբերում Չինաստանի արտգործնախարության մամուլի ծառայությունը:

Պեկինում անցկացվում է Ժողովրդական ներկայացուցիչների համաչինական ժողովի 14-րդ գումարման 3-րդ նստաշրջանը, ինչպես նաև Չինաստանի ժողովրդական քաղաքական խորհրդատվական խորհրդի 14-րդ գումարման նստաշրջանը։ Դրանց բացմանը մարտի 4-ին մասնակցել են երկրի նախագահ Սի Ծինփինը և այլ պետական ու կուսակցական ղեկավարներ։ Քանի որ երկու մարմիններն էլ իրենց նստաշրջաններն ամեն տարի սկսում են նույն ժամանակահատվածում, այն հավաքական կերպով ստացել է «Երկու նիստ» անվանումը։ Նստաշրջանը կավարտվի մարտի 10-ին։ Նիստերի օրակարգում է կառավարության աշխատանքի վերաբերյալ ամենամյա զեկույցի քննարկումը։