Լաթաքիայում կացությունը մտահոգիչ է․ վստահ չեմ, որ քրիստոնյա ժողովրդի անվտանգությունը երաշխավորված է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Սիրիայի Լաթաքիայում՝ նախկին իշխանությանը հարող ալավիների և նոր իշխանության կողմնակիցների միջև ծայր առած բախումների պատճառով տեղի հայ համայնքը  բնակարաններից դուրս չի գալիս, քանի որ քաղաքում ու գյուղական բնակավայրերում շարունակ լսվում են կրակոցների ձայներ։ 

Հայաստանում Սիրիայի դեսպանատունն իրավիճակի մասին տեղեկություն չփոխանցեց։ Աշխատակիցը հորդորեց գրավոր հարցում ուղարկել։ Մեկ այլ աշխատակից, սակայն, ասաց, որ սիրիահայերի շրջանում տարհանման տագնապ չկա։ 

MediaHub-ը կապ հաստատեց սիրիաբնակ Գևորգ-Հովհաննես Ճոսլակյանի հետ։ 

«Այստեղ կացությունը նորից մտահոգիչ է։ Մենք կարծում էինք Ահմեդ Ալ-Շարաան միայն կայունություն կբերի մեր երկրին, քանի որ Սիրիան տարիներ շարունակ եղել է տարբեր հակամարտությունների թատերաբեմ։ Հիմա էլ Թուրքիայի աջակցությամբ կոտորած է իրականացվում ալավի մեր եղբայրների դեմ։ Սիրիան հիմա դարձել է թուրք-իսրայելական հակամարտության էպիկենտրոն, որից տուժում են միայն սիրիացի խաղաղ բնակիչները»,- նշեց մեր զրուցակիցը։ 

Նա Լաթաքիայում բնակվող բարեկամների հետ խոսել է այսօր առավոտյան։ Քաղաքում նախորդ 3 օրերի համեմատ ավելի հանգիստ է։ Կենտրոնական հատվածներում տեղակայված են անվտանգային ուժեր, որոնք հնարավոր վտանգները կանխելու համար խուզարկում են անցորդներին ու նրանց տրանսպորտային միջոցները։

«Հայկական դպրոցները, եկեղեցիները փակ են։ Լաթաքիայում չեն գործում հիվանդանոցները, որոշ շրջաններում չեն աշխատում նույնիսկ դարմանատներն ու խանութները։ Բնակչությունը տնտեսական դժվարությունների մեջ է, որովհետև աշխատատեղերը չեն գործում։ Ջրի տագնապը շարունակվում է։ Մենք առաջարկել ենք հորաքրոջս դուրս գալ քաղաքից, բայց չեն կարողանում»,- նշեց նա։

Լաթաքիայում տեղի ունեցող զանգվածային սպանդի ֆոնին բնակչության ալավի ուղղության շիաները լքել են իրենց բնակարաններն ու տեղափոխվել անտառներ, հեռվից տեսել, թե ինչպես են զինված ապստամբները հրկիզում իրենց բնակարանները։ 

«Ալավիների նկատմամբ հետապնդումները, դաժանորեն սպանություններն ու բախումները դեռ շարունակվում են։ Քրիստոնյաներին, իմ տեղեկություններով, չեն թիրախավորում։ Նախորդ օրը Լաթաքիայում հայր և որդի ազգությամբ հայ Պուտրոսները սպանվել են զինյալների էյֆորիայի պատճառով, ոչ թե քրիստոնյա լինելու համար։ Բայց վստահ չեմ, որ քրիստոնյա ժողովրդի անվտանգությունը երաշխավորված է»,- հավելեց Ճոսլակեանը։

Նշենք, որ այսօր MediaHub-ը դիմել էր ՀՀ ԱԳՆ՝ տեղեկանալու՝ անհրաժեշության դեպքում ՀՀ արտգործնախարարությունն արդյո՞ք պատրաստ է տարհանել ՀՀ քաղաքացիներին ու ազգությամբ հայերին, ինչին ի պատասխան ԱԳՆ խոսնակը նշեց. «ՀՀ քաղաքացիների կողմից հյուպատոսությանն ուղղված դիմումները հիմնականում վերաբերում են ընթացիկ հյուպատոսական բնույթի հարցերին։ Այս պահին սա է»։

Հունան Թադևոսյան

 Հետևեք մեզ՝ այստեղ