Կարո՞ղ են «AI բժիշկները» փոխարինել բժիշկներին. ի՞նչ են ասում բժշկական տեխնոլոգիաների մասնագետներն ու գիտնականները

LIFE 11 March, 2025 21:53

Օրերս մենք անդրադարձել էինք այն թեմային, թե որքանով կարող է ապագայում արհեստական բանականությունը փոխարինել մարդուն գրականության, երաժշտության, նկարչության և, ընդհանրապես, արվեստի մեջ: Ներկայացրել էինք Չինաստանի մի շարք արվետսագետների կարծիքը: Այժմ թարգմանաբար ներկայացնում ենք չինացի բժիշկների, բժշկական տեխնոլոգիաների մասնագետների ու գիտնականների տեսակետը, թե որքանով կարող է «AI բժիշկը» փոխարինել բժիշկներին:

2025 թվականին անցկացվում է Չինաստանի Ժողովրդական ներկայացուցիչների համաչինական ժողովը և ժողովրդական քաղաքական խորհրդատվական խորհուրդը։ Ինչպիսի՞ կայծեր կառաջանան արհեստական բանականության և առաջատար բժշկական տեխնոլոգիաների «բախումից»։ Ի՞նչ քննարկումներ են իրականացվել բժշկական ոլորտի մասնագետների ու գիտնականների կողմից երկու նիստերի ընթացքում։

Կարո՞ղ է «AI բժիշկը» փոխարինել բժիշկներին

«Նախկինում, երբ մենք հայտնաբերում էինք դեղամիջոցների նոր մոլեկուլներ, սովորաբար վերցնում էինք դեղամիջոցի թիրախը, հիմնականում՝ սպիտակուցը, դեղամիջոցների մոլեկուլների բանկը զննելու համար։ Այժմ, արհեստական բանականության ի հայտ գալով, իրավիճակը կտրուկ փոխվել է։ Օրինակ՝ հիմա, երբ ձեռք ենք բերում դեղամիջոցի թիրախը, կարող ենք AI-ի միջոցով կանխատեսել, թե որոնք են սպիտակուցի ակտիվ կետերը և որոնք կարող են դառնալ դեղամիջոցի մոլեկուլների միավորման հատվածներ։ Այնուհետև AI-ի միջոցով կարող ենք նույնիսկ կանխատեսել փոքր մոլեկուլների կառուցվածքը, որոնք կարող են միավորվել։ Ներկայում այս ամենն աստիճանաբար իրականություն է դառնում»,- ասել է Չինաստանի ժողովրդական քաղաքական խորհրդատվական խորհրդի համաչինական կոմիտեի անդամ Շը Ի Կոնը։

Չինաստանի ժողովրդական քաղաքական խորհրդատվական խորհրդի համաչինական կոմիտեի անդամ Ցիաո Ծիեն ասել է. «Այժմ մենք հաճախ ենք օգտագործում «օգնություն» բառը։ Պետք է ասել, որ արհեստական բանականությունը կարող է շատ լավ օգնել բժիշկներին՝ բարելավելու բժշկության որակը, սակայն նրանց ամբողջությամբ փոխարինելն անիրատեսական է»։

«Շատ հիվանդներ կարող են ասել, որ իրենց հետ ամեն ինչ կարգին է, սակայն իրականում նրանց դեմքի տխուր և հոգնած արտահայտությունից կարելի է նկատել հիվանդության որոշ ախտանշաններ։ Այս աննկարագրելի դրսևորումները դժվար է հայտնաբերել, սակայն բժիշկներն, ի տարբերություն AI-ի, իրենց կլինիկական փորձի շնորհիվ կարող են բացահայտել որոշ ախտանշաններ, որոնց մասին հիվանդներն իրենք տեղյակ չեն»,- Չինաստանի ժողովրդական քաղաքական խորհրդատվական խորհրդի համաչինական կոմիտեի անդամ Սոն Շու Լի։

«Մենք պետք է բաց պահենք մեր վերաբերմունքը տեխնոլոգիաների ուսումնասիրության և զարգացման նկատմամբ։ Հետազոտական մակարդակում, կարծում եմ, պետք է խթանել դրանց ուսումնասիրությունն ու գործածումը։ Սակայն, երբ դրանք իրոք օգտագործվում են մարդկանց վրա և իրական ախտորոշման ու բուժման ժամանակ, պետք է զգույշ լինել։ Ներկայում մենք դեռ խորհուրդ չենք տալիս արհեստական բանականությունն օգտագործել որպես ախտորոշման հիմնական չափանիշ կամ միակ հիմք»,- ասել է Չինաստանի ժողովրդական քաղաքական խորհրդատվական խորհրդի համաչինական կոմիտեի անդամ Ճաո Հոնը։

Կարո՞ղ է AI-ը դառնալ չինական բժշկության «թվային վարպետ»

Դժվար չէ նկատել, որ կոմիտեի անդամներից շատերի կարծիքով, արհեստական բանականությունը չի փոխարինում բժիշկներին, այլ օգնում է նրանց որոշումներ կայացնել, վերափոխել նոր դեղամիջոցների զարգացման գործընթացը և գործնական կիրառման այլ սցենարներ: Ի՞նչ դեր կունենա արհեստական բանականությունը չինական բժշկության ժառանգության մեջ:

«Իրականում մենք բոլորս մտածում ենք DeepSeek-ի կամ այլ մեծ մոդելների օգտագործման, ինչպես նաև սեփական մեծ մոդելների ստեղծման մասին։ Այս գործընթացում մոդելների վարժեցման միջոցով կարող ենք կյանքի կոչել չինական բժշկության ժառանգությունը։ Այս ժառանգությունը բանավոր փոխանցումից փոխվել է մեքենայականի։ Ես դեռ վարժեցնում եմ մեքենաներ, և դրանք անընդհատ կատարելագործվում են։ Այժմ մենք նույնպես սկսել ենք ուսումնասիրել ժառանգության այս մեթոդը»,- նշել է Չինաստանի ժողովրդական քաղաքական խորհրդատվական խորհրդի համաչինական կոմիտեի անդամ Լյո Ցին Ցյուեն։

Ի՞նչ առաջընթացներ են սպասվում բժշկական տեխնոլոգիաների ոլորտում

«Ես հավատում եմ, որ ապագայում գիտության և տեխնոլոգիաների առաջընթացի շնորհիվ մենք կկարողանանք ավելի խոր պատկերացում կազմել հիվանդությունների մասին, ավելի արագ և հեշտ կիրականացնենք ախտորոշումները, և բուժման արդյունքներն ավելի լավը կլինեն։ Իհարկե ես չեմ կարծում, որ տեխնոլոգիաներն ամեն ինչ են բժշկության մեջ։ Մարդու հոգեվիճակը և տրամադրությունը նույնպես առողջության պահպանման կարևոր գործոններ են»,- ասել է Չինաստանի ժողովրդական քաղաքական խորհրդատվական խորհրդի համաչինական կոմիտեի անդամ Սոն Շուլին։

Սկզբնաղբյուր՝ https://health.gmw.cn/2025-03/10/content_37895569.htm