«Ոչ ոք չէր ասել, թե ինչքան դшժան հոգեբանական վիճակում եմ հայտնվելու, բոլորը նկարագրել էին մայրության միայն վարդագույն կողմը». Լարա Առաքելյան
LIFEՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Հեռսուտամեկնաբան, լրագրող Լարա Առաքելյանն ու ամուսինը՝ Հայկը ծանոթացել են հեռուստընկերությունում:
Նրանց սիրո պատմության մանրամասներն ու դստեր՝ Էդնայի ծնվելուց հետո դաժան փուլի, վերաիմաստավորված կյանքի ու ընտանեկան «գաղտնիքների» մասին անկեղծացել է Լարան՝ առաջին ընտանեկան ֆոտոշարքը վստահելով Tert.am Life-ին:
«Մի անգամ, կես կատակ, կես լուրջ, ասացի նրան, որ հազիվ թե կարողանայինք կառուցել հարաբերություններ, եթե տարբեր տեղերում աշխատեինք։ Մասնագիտական առանձնահատկություն է։ Հայկը ռեժիսոր է, ես՝ հեռուստամեկնաբան ու լրագրող։ Երկու մասնագիտություններն էլ մեծ նվիրում են պահանջում։ Երբեմն աշխատանքային օրվա ավարտին, որ մեր դեպքում, որպես կանոն, երեկոյան 22:00-ից հետո է լինում, պարզապես ուժ չի մնում անգամ խոսելու համար։
Պատկերացնո՞ւմ եք, եթե հարաբերությունների սկզբում ստիպված լինես մի հատ էլ հանդիպել սիրելիիդ ու նրան պատմել, թե ինչպես անցավ օրդ։ Իսկ երբ միասին եք աշխատում, ապրում եք նույն ռիթմով, նույն էմոցիաներով ու երբեմն՝ գործից հետո կարող եք պարզապես միասին լռել։ Դա հրաշալի է, օգնում է մի հայացքով հասկանալ իրար»,- Tert.am Life-ի զրույցում պատմեց Լարան:
Նա խոստովանեց, որ միասին աշխատելը նաև թերություններ ունի, ինչպես ամեն բան այս աշխարհում, բայց առավելություններն ավելի շատ են։
Կստեմ, եթե ասեմ, որ երեխայի ծնունդը բերկրանք է միայն...
Խոսելով իրենց առաջնեկի՝ Էդնայի լույս աշխարհ գալուց հետո վերափոխված կյանքի մասին՝ մեր զրուցակիցն ասաց, որ երեխան գլխի վրա է շրջում ամեն ինչ:
«Կստեմ, եթե ասեմ, որ դա բերկրանք է միայն, հեքիաթային է, ինչպես ընդունված է ասել։ 24/7 աշխատել սովոր մարդու համար դեկրետի շրջանը, տանը միայնակ փակված լինելը, կենսառիթմի կտրուկ անկումը որպես կանոն սթրեսի պատճառ են դառնում։ Գոնե իմ դեպքում այդպես էր»,- նշեց հաղորդավարուհին:
Երեխան անդադար լացում էր, անգամ լոգարան գնալու համար չէի կարողանալու հեռանալ նրա մոտից...
Անդրադառնալով հետծծնդյան դեպրեսիային, Լարա Առաքելյանը նշեց, որ մինչև դեպրեսիան ոչինչ չգիտեր դրա մասին:
«Ցավոք, ոչ ոք չէր ասել, թե ինչքան դաժան հոգեբանական վիճակում եմ հայտնվելու, բոլորը նախընտրել էին նկարագրել մայրության միայն վարդագույն կողմը։ Այդ պատճառով դեմ չեմ պատմել իմ փորձառության մասին՝ հուսալով, որ այդ ինֆորմացիան օգտակար կլինի ուրիշ նորաթուխ մայրիկների համար:
Ծննդաբերությունից հետո՝ կեսարյան հատման կարերը ահավոր ցավում էին, քնել հնարավոր չէր ո՛չ գիշերը, ո՛չ ցերեկը, ես չկարողացա խուսափել դեպրեսիայի բռնկումից։
Թվում էր, թե այդպես է լինելու միշտ. երեխան շարունակելու է անվերջ լացել, ես անգամ լոգարան գնալու համար չեմ կարողանալու հեռանալ նրա մոտից, իսկ աշխատանքի վերադառնալու մասին անգամ երազել չեմ կարողանալու»,- պատմեց մեր զրուցակիցը:
Մի կին պատմում էր, թե ինչպես է սկեսուրը ստիպել հենց դուրսգրման օրը սառը ջրով լվացք անել...
«Եվ սա այն դեպքում, երբ ես վայելում էի ամուսնուս ու ընտանիքիս լիակատար աջակցությունը։ Սա ասում եմ, որովհետև պատկերացնում եմ՝ հարյուրապատիկ դաժան է իրավիճակը այն կանանց համար, որոնց ամուսինները պատրաստ չեն գիտակցել վիճակի ամբողջ նրբությունը։
Երբ հաղթահարեցի չարաբաստիկ օրերը, սկսեցի այս թեմաներով կարճ հոլովակներ հրապարակել իմ ինստագրամյան բլոգում»,- պատմեց Լառա Առաքելյանը: Նրա խոսքով՝ դրանք լայն արձագանք ունեցան։ «Կանայք գրում էին ինձ իրենց պատմությունները։ Մեկը պատմում էր, թե ինչպես է սկեսուրը ստիպել հենց դուրսգրման օրը սառը ջրով լվացք անել, մեկ ուրիշը պատմում էր ամուսնու անտարբերության մասին։
Ես այս ամենն ասում եմ՝ իբրև խնդրանք երիտասարդ կանանց՝ ձեր ապագա կողակիցներին ընտրեք գիտակցաբար՝ հասկանալով, թե որքան ծանր օրեր պետք է ապրեք միասին։ Ասում եմ նաև՝ իբրև խնդրանք երիտասարդ տղամարդկանց՝ մի քիչ շատ կարդացեք, որ ավելի լավ պատկերացնեք, թե ինչ կարող է զգալ ու ապրել ձեր կինը»,- նշեց նա:
Անքուն գիշերները, լացը, դեպրեսիան արագ անցնում են, երբ ճուտիկդ առաջին անգամ նայում է աչքերիդ մեջ ու ժպտում
Լարա Առաքելյանը պատմեց, որ առայժմ չի ավարտվել իր արձակուրդը։
Հեռուստաեթեր կվերադառնա ապրիլին։
«Քանի որ ասելիքս մի տեսակ գորշ ստացվեց, կուզենայի հատուկ նշել, որ անքուն գիշերները, լացը, հետծննդաբերական դեպրեսիան, այդ բոլորը շատ արագ են անցնում, իսկ մոռացվում են՝ էլ ավելի արագ՝ հենց այն վայրկյանին, երբ ճուտիկդ առաջին անգամ նայում է աչքերիդ մեջ ու ժպտում։
Պետք է ամենադժվար պահին էլ թեկուզ երկու րոպե գտնես ինքդ քեզ համար, անես սրտիդ ուզածը»,- ասաց Լարան ու հավելեց, որ ինքը ակտիվ
բլոգ էր վարում: Դա ստիպում էր հետևել իր տեսքին ու պինդ մնալ։
«Հիմա լիարժեք պատրաստ եմ աշխատել հին ռիթմով։ Հիշողությունս դեռ այն չէ, բայց վստահ եմ, որ գործընկերներս կօգնեն արագ վերականգնվել նաև այդ առումով»,- նշեց Լարան:
Որոշեցինք ընտրել մի անուն, որը «կրակ» կնշանակի
Քանի որ իրականացավ երազանքս, ու աղջիկս պետք է ծնվեր աղեղնավորի նշանի տակ, ինչպես ես, իսկ դա, ինչպես գիտեք, կրակի նշան է, որոշեցինք ընտրել մի անուն, որը «կրակ» կնշանակի։ Դիտարկեցինք, հավանաբար, բոլոր հնարավոր տարբերակներն ու ի վերջո ընտրեցինք Էդնան։ Բառի ծագումնաբանությունը տանում է կելտերեն, թարգմանվում է իբրև «կրակ»։ Ես վստահ եմ, որ անունը շատ բան է տալիս մարդուն, ու Էդնայիս իր անունը կտա բոցավառ միտք ու անսպառ էներգիա։
Հեղինակ՝ Անի Մնացականյան
Հետևեք մեզ՝ այստեղ
