Ամենագեղեցիկ ամրոցները(Լուսանկարներ)

Ամենագեղեցիկ ամրոցներ, սփռված աշխարհի անծայրածիր վայրերում, որոնք զարմացնում են ճարտարապետական դիմագծի յուրօրինակությամբ, խրոխտ արտաքին տեսքով և պաշտպանվածության աստիճանով:

Այն տեսակետը, թե աշխարհի ամենագեղեցիկ ամրոցները տեղակայված են Եվրոպայում, որոշակիորեն է ճիշտ. դրանք ամենուրեք են, և եթե եվրոպական ամրոցների ճարատարապետական գծի մեջ անցկացվում են նմանության եզրեր, ապա ասիական ամրոցները կտրուկ տարբեր են:

Ի դեպ, գոյություն ունի ամրոցների գնահատման մի չգրված ճշմարտություն. ամրոցի գեղեցկությունը հասկանալու համար նախ հարկավոր է ծանոթանալ ամրոցին ներսից, ավելի ճիշտ` իմանալ ամրոցի գաղտնիքը կամ կառուցման խորհրդավոր պատմությունը:

ՆՈՅՇՎԱՆՇՏԱՅՆ, ԳԵՐՄԱՆԻԱ

Գերմանիայի, ոչ, թերևս աշխարհի ամենահեքիաթային և իրական ամրոցը

Ձմռան օրերին Գերմանիայի այս ամրոցը հատկապես գեղեցիկ է, ոմանց համար այն հիշեցնում է գերմանական կանոնավորություն, ոմանց համար էլ՝ իսկական հեքիաթների ամրոց: Սակայն գրեթե բոլոր ճարտարագետները և զբոսաշրջիկները համակարծիք են, որ այն յուրատեսակ խաղաղություն է հաղորդում:

Խորհուրդ` այս ամրոց այցելելիս լուռ շրջել ներսի սրահներով և հմայվել ամրոցի աննկարագրելի արտաքին գեղեցկությամբ մի փոքր հեռավորությունից: Այն հիասքանչ է: Ամրոցի պատմությունը, որը 19րդ դարում ծառայել է որպես Ռիխարդ Վագների նստավայր, այժմ բաց է այցելությունների համար: Ամրոց է այցելում տարեկան շուրջ 1.3 մլն զբոսաշրջիկ:

Ի դեպ, այս ամրոցը ոգեշնչման աղբյուր է հանդիսացել Դիսնեյլենդի «Քնած գեղեցկուհի» ամրոցի կառուցման համար:

Ինչպե՞ս հասնել` ամրոց հասնելու համար մեկնում ենք Մյունխեն, գնացք նստում մինչև Ֆյուսեն, իսկ այնուհետև ավտոբուսով տեղափոխվում մինչև Հոհենշվանգաու կայարան, որտեղից ոտքով հասնում մինչև հեքիաթային ամրոց: Այսօր դա խնդիր չէ` հատկապես հաշվի առնելով, որ թե՛ Մյունխենի հյուրանոցները, թե՛ գնացքի տոմսերը, թե՛ նույնիսկ ավտոբուսի երթուղիները կարելի ամրագրել առցանց կայքերում:

ՊԵՆՅԱ ԱՄՐՈՑ, ՍԻՆՏՐԱ, ՊՈՐՏՈՒԳԱԼԻԱ

Գունեղ մի ամրոց` շատմատաձև աշտարակներով, որն իրավամբ համարվում է ոչ միայն Եվրոպայի, այլև աշխարհի ամենագեղեցիկ և հին ամրոցներից մեկը: Պորտուգալիայի այս գեղեցկուհուն առավել յուրահատկություն է հաղորդում քարե հսկայի շուրջը փռված էկզոտիկ այգին:

Ինչպե՞ս հասնել` Պորտուգալիայի Լիսաբոն քաղաքից գնացքով ուղևորվել դեպի Սինտրա: Իսկ արդեն Սինտրայում ոտքով հասնել ամրոցի տարածք:

ARG-E BAM ԱՄՐՈՑ, ԲԱՄ, ԻՐԱՆ

Ամենատպավորիչ բերդ-ամրոցը ՅՈՒՆԵՍԿՈ-ի համաշխարհային ժառանգության պատմամշակութային օբեյկտների ցանկում է: Ամրոցն այժմ վերակառուցման ակտիվ փուլում է 2003թ. Իրանի ավերիչ երկրաշարժից հետո: Ամրոցի երբեմնի գեղեցկությունն ու նախնական ճարտարապետական շուքը վերականգնելու գործում միավորվել են Համաշխարհային ժառանգության մասնագետներ Իտալիայից, Ֆրանսիայից, Ճապոնիայից, ովքեր աշխատում են ամրոցի եռաչափ հատակագծի նախագծի հիման վրա:

Ինչպե՞ս հասնել` ուղևորվել Իրանի Բամ քաղաք, որը գտնվում է երկրի հարավարևելյան Քերման նահանգում:

ՀՈՀԵՆՎԵՐՖԵՆ ԱՄՐՈՑ, ԱՎՍՏՐԻԱ

Դժվարանցանելի այս ամրոցը թոփ տեսարժան վայրերից է ոչ միայն զբոսաշրջիկների համար, այլև հոլիվուդյան ֆիլմերի ռեժիսորների համար: Այս ամրոցը բազմիցս հանդես է եկել կինոնկարահանման հրապարակի դերում:

Ինչպե՞ս հասնել` Հոհենվերֆեն ամրոցը գտնվում է ավստրիական Վերֆեն քաղաքում` Զալցբուրգից մոտավորապես 40 կմ հեռավորության վրա:

ՄԱՑՈՒՄՈՏՈ ԱՄՐՈՑ, ՃԱՊՈՆԻԱ

Մացումոտո ամրոցը նաև անվանում են «Սև ագռավի ամրոց». ամրոցի սև պատերն ու տանիքը նմանեցնում են սև ագռավի թևերի: Մացումոտո ամրոցն աշխարհի ամենագեղեցիկ և պատմական ամրոցներից մեկն է, որը տարբերվում է մյուսներից փայտե դիզայնով և մի քանի հարկանի պատվանդաններով և տանիքներով:

Ինչպե՞ս հասնել` ուղևորվել Տոկիո, որտեղից կարճ ժամանակում կարելի է հասնել Նագանո շրջանի Մացումոտո քաղաք:

ԿՈԿԱ ԱՄՐՈՑ, ԻՍՊԱՆԻԱ

Եթե թվենք հիացմունքի հոմանիշները, ապա այս ամրոցի հարցում դրանք միանշանակ տեղին են: Ոչ ստանդարտ (այս ամրոցի հիմնական հատկանիշը ոչ ստանդարտ լինելն է, այն, ինչ առավել է գրավում և շեղում թեկուզ և գեղեցիկ, բայց փոքր-ինչ միօրինակ նման կառույցներից): Այս ամրոցի ճարտարապետական դիմագիծը յուրահատուկ է, սրածայր, բայց միևնույն ժամանակ կլորավուն և բազմագմբեթավոր:

Ինչպե՞ս հասնել` Կոկա ամրոցը գտնվում է կենտրոնական Իսպանիայի Սեգովիա նահանգում: Կոկա ամրոց հասնելու համար ուղևորվել դեպի Կոկա (Սոսա) քաղաք:

ՇԱՄԲՈՐ ԱՄՐՈՑ, ՖՐԱՆՍԻԱ

Ճերմակ գեղեցկուհին. մենք նույնպես այն նման կերպ որակեցինք: Վերածննդյան ժամանակաշրջանի այս ամրոցը համարվում է աշխարհի ամենագեղեցիկ ամրոցներից մեկը և ամենաճանաչելին, բայց, հետաքրքիր է, միևնույն ժամանակ պաշտպանվածության առումով ոչ այդքան ապահովը: Ժամանակին ամրոցի կառուցման գործում ներգրավված է եղել մոտ 1800 աշխատող՝ ամրոցը հնարավորինս կարճ ժամանակում կանգնեցնելու համար: Եվ նման ռեկորդ հաջողվել է գրանցել. ամրոցը կառուցվել է ընդամենը 8 ամսվա ընթացքում:

Ինչպե՞ս հասնել` Փարիզից Շամբոր ամրոց կարելի է հասնել Աուստերլից կայարանից, ուղևորությունը միջինում կտևի մոտ 1.5 ժամ: Երկրորդ կարգի խցիկում նստատեղի տոմսի գինը կկազմի մոտավորապես 25.60 եվրո:

ՎԻՆՁՈՐՅԱՆ ԱՄՐՈՑ, ՄԵԾ ԲՐԻՏԱՆԻԱ

Այս վեհաշուք թագավորական ամրոցին հասցրել են շնորհել լավագույն տիտղոսները` ընդհուպ մինչև աշխարհի «ամենառոմանտիկ ամրոցի» անվանակարգը:

Ինչպե՞ս հասնել` Լոնդոնից գնացք նստել դեպի Ուինսդոր, որտեղ ավտոբուսներով կարելի է հասնել ամրոցի տեղանք և կարճ տարածք անցնել ոտքով:

ՀՈՀԵՆՇՎԱՆԳԱՈՒ, ԳԵՐՄԱՆԻԱ

Կարապ-գեղեցկուհին

Այս ամրոցը նաև կոչում են կարապ ամրոց, որտեղ կարելի է տեսնել նաև կարապի ձև ունեցող ֆոնտան ու ասպետների սրահ:

Ինչպե՞ս հասնել` կրկին մեկնել Ֆյուսեն քաղաք, որտեղից ավտոբուսներով կարելի է ուղևորվել դեպի Շվանգաու գյուղ, իսկ այնտեղ արդեն ամրոցը տեսանելի կլինի:

ՄՈՆ ՍԵՆ ՄԻՇԵԼ ԱՄՐՈՑ, ՖՐԱՆՍԻԱ

Մոն Սեն Միշել քաղաք ամրոցը նույնպես համարվում է աշխարհի ամենաճանաչելի ամրոցներից մեկը: Այն հասցրել են որակել որպես նոր հրաշալիք: Տարեկան մոտ 3 մլն զբոսաշրջիկ է այցելում այս կղզյակ ամրոց:

Ինչպե՞ս հասնել` գնացքով հասնել մինչև Ռեն, իսկ այնուհետև ավտոբուսով դեպի Մոն Սեն Միշել:

ԼՅՈՎԵՆԲՈՒՐԳ, ԳԵՐՄԱՆԻԱ

Առյուծ-ամրոցը

Այս ամրոցը բոլորն ավելի շատ անվանում են առյուծի ամրոց: Այս ամրոցում, որն իսակական թանգարան է` միջնադարյան բազում և յուրօրինակ առարկաներով, սրահների մեծ մասը ազատ է զբոսաշրջիկների այցելությունների համար:

Ինչպե՞ս հասնել` ամրոցը գտնվում է Կասել գերմանական քաղաքում: