Բեռլինում պաշտոնապես ներկայացվել Է «Բեռլինալե-2016» կինոփառատոնի ծրագիրը

SOCIETY 3 February, 2016 15:20

Բեռլինալե կինոփառատոնի կազմկոմիտեն պաշտոնապես ներկայացրել Է դրա ծրագիրը, այն տարի տեղի Է ուենալու փետրվարի 11-ից մինչեւ 21-ը, տեղեկացնում Է «Արմենպրես»-ը:

Այս տարի փառատոնը կբացի Ջոել եւ Իթան Քոեն եղբայրների «Կեցցե Կեսարը» կինոնկարը: Ընդամենը մրցութային ծրագրում 23 ֆիլմ Է: Մրցանակների՝ ոսկե եւ արծաթե արջերի, համար կպայքարեն 18 կինոնկարներ, մնացածներն արտամրցութային են, այդ թվում՝ Քոենների ֆիլմը: 23 ֆիլմերից 19-ը համաշխարհային պրեմիերաներ են:

Միջազգային ժյուրին կգլխավորի դերասանուհի Մերիլ Սթրիփը: Ժյուրիի անդամներն են դարձել գերմանացի դերասան Լարս Էյդինգերը, կինոքննադատ Նիք Ջեյմսը, լուսանկարիչ Բրիջիտ Լակոմբը, բրիտանացի դերասան Քլայվ Օուենը, դերասանուհի Ալբա Ռորվահերը՝ Իտալիայից եւ լեհ ռեժիսոր Մալգոժատա Շումովսկան:

Այս տարի փառատոնի մրցութային ծրագրում տեղ գտած ֆիլմերի թվում են «24 շաբաթ» (ռեժիսոր՝ Աննե Զորա Բերրաշեդ, Գերմանիա), «Հանդիպական հոսանք» (Յան Չաո, Չինաստան), «Նորություններ Մարս մոլորակից» (Դոմինիկ Մոլ, Ֆրանսիա/Բելգիա), «Սենտ-Ամուր» (Բենուա Դելիպին եւ Գյուստավ Քերվեռն, Ֆրանսիա/Բելգիա), Soy Nero (ռեժիսոր՝ Րաֆի Փիթս, Գերմանիա/Ֆրանսիա) կինոնկարները:

Մրցութային ծրագրի մյուս ֆիլմերը հայտարարվել Էին ավելի վաղ, դրանց թվում են՝ «Մեկը՝ Բեռլինում» (ռեժիսոր՝ Վենսան Պերես, Գերմանիա/Ֆրանսիա/Մեծ Բրիտանիա), «Բորիսը՝ առանց Բեատրիսի» (ռեժիսոր՝ Դենի Կոտե, Կանադա), «Վիշապը ժամանեց» (ռեժիսոր՝ Մանի Հագիգի, Իրան) կինոնկարները եւ ուրիշներ:

Ցուցակում տեղ են գտել նաեւ «Կրակ՝ ծովում» (ռեժիսոր՝ Ջանֆրանկո Ռոզի, Իտալիա/Ֆրանսիա), «Հանճարը» (Մայքլ Գրանդաջ, Մեծ Բրիտանիա/ԱՄՆ), «Տխրալի գաղտնիքի օրորոցայինը» (ռեժիսոր՝ Լավ Դիաս, Ֆիլիպիններ/Սինգապուր), «Կոմունա» (Թոմաս Վինտերբերգ, Դանիա/Շվեդիա/Նիդեռլանդներ), «Երբ դու տասնյոթ տարեկան ես» (ռեժիսոր՝ Անդրե Տեշինե, Ֆրանսիա), «Մահը Սարաեւոյում» (ռեժիսոր՝ Դանիս Տանովիչ, Ֆրանսիա/Բոսնիա եւ Հերցեգովինա) եւ այլ ֆիլմեր:

Բեռլինյան միջազգային կինոփառատոնն առաջին անգամ անցկացվել Է 1951 թվականի հունիսի 6-ին: Դրա հիմնադիրներն են դարձել Երկրորդ համաշխարհային պատերազմի դաշնակիցները՝ ԱՄՆ-ը, Մեծ Բրիտանիան եւ Ֆրանսիան: Կաննի եւ Վենետիկի փառատոնների հետ միասին այն ամենախոշորն ու հեղինակավորն Է համարվում կինոյի աշխարհում:

«Բեռլինալե»-ն հիմնականում միտված Է այսպես կոչված հեղինակային կինոյին: Փառատոնի մրցութային ծրագրին մասնակցում են գեղարվեստական լիամետրաժ եւ կարճամետրաժ ֆիլմեր, որոնք նկարահանվել են փառատոնի սկսվելուց առաջ 12 ամսվա ընթացքում եւ չեն ցուցադրվել այլ ստուգատեսներում, հաղորդել Է ՌԻԱ Նովոստին:-