Հերմինե Նաղդալյանը վստահ է Երևանի տրանսպորտային բեռնաթափման վարկային ծրագրի արդյունավետության հարցում

 ԱԺ փոխխոսնակ Հերմինե Նաղդալյանն անդրադարձել է փետրվարի 3-ին խորհրդարանում Երևան քաղաքի բեռնաթափմանը ուղղված վարկային ծրագրի տրամադրման հարցի շուրջ բանավեճին: Ինչպես «Արմենպրես»-ին տեղեկացրին, անդրադառնալով ընդդիմադիր պատգամավորների բարձրացված մտահոգություններին՝ Նաղդալյանը նշել է.

«Կարծում եմ՝ ճիշտ չէ մայրաքաղաքի և մարզային բնակավայրերի հակադրումը, թեև ոչ ոք չի ժխտում, որ իսկապես մեր մարզային և շրջանային այլ քաղաքներում  բավականին լուրջ խնդիրներ ունենք: Բայց նման համեմատությունը անտեղի է, քանզի կասկածից վեր է, որ յուրաքանչյուր երկիր իր մայրաքաղաքին առավելապես ուշադրություն է հատկացնում, աշխատում է դարձնել այն հնարավորինս բարեկարգ ու հարմարավետ: Այդ իմաստով մեր երկիրը նույնպես բացառություն չէ, և դա ճիշտ մոտեցում է:

Երևան քաղաքում վերջին տարիներին հսկայական աշխատանքներ են կատարվում: Ե՛վ բարեկարգումը, և՛ հարմարավետությունը, և՛ քաղաքի գեղեցկությունը օրեցօր այն ավելի գրավիչ են դարձնում և տեսանելի բոլորի համար՝ թե՛ քաղաքի բնակիչների, և թե հյուրերի: Կարծում եմ, շատ կարևոր է նաև, որ այդ աշխատանքը շարունակական է: Ինչ վերաբերում է Երևանի բեռնաթափմանն ուղղված ձեռնարկվող քայլերին, ապա կարելի է ասել, որ այս վարկային ծրագրի նախաձեռնումը վերջին տարիներին դրան միտված, թերևս, ամենալուրջ ծրագրերից է: Սա նաև ընդհանուր Հյուսիս-հարավ գլոբալ ճանապարհաշինական ծրագ րի գաղափարի ամբողջացումն է, այսինքն՝ Երևանի շրջանցող ճանապարհի կառուցումը կհանգեցնի նրան, որ հյուսիս-հարավ ճանապարհի այդ ռազմավարական նշանակությունն ու արդյունավետությունն էապես բարձրանա: Այդ ճանապարհի կարևորությունն այսօր վիճելի չէ , որովհետև ներկայիս աշխարհաքաղաքական իրողությունները՝ Իրան, Իրաք, Չինաստան, Վրաստանի հետաքրքրություններ Իրանի նկատմամբ, ԵԱՏՄ-ի ստեղծում և այլն, վկայում են, որ մի քանի տարի առաջ մեր իշխանությունների կողմից Հյուսիս-հարավ ավտոմայրուղու շինարարության նախաձեռնումը ժամանակին կատարված շատ ճիշտ քայլ էր:

Իհարկե, հասկանալի է, որ խորհրդարանականների և հանրության շրջանում կա որոշակի նեգատիվ վերաբերմունք վարկային ծրագրերի նկատմամբ, և դա պարզ է, որովհետև որևէ մեկին հաճելի չէ նոր բեռի ավելացում թե՛ բյուջեի, թե՛ ապագա սերունդների վրա: Նույն կերպ մտածում է և՛ իշխանությունը, և՛ ընդդիմությունը, կիսում բոլոր մտահոգությունները, բայց դա ամեևին էլ չի նշանակում, որ չպետք է որևէ բան ձեռնարկել և ձեռքները ծալած նստել:  Այսօրվա զարգացող աշխարհում իրականում վարկային ծրագրերով բավական մեծ աշխատանքներ են կատարվում, պետք է թե՛ կառավարությունը և թե՛ խորհր դարանը իր վերահսկողական լծակներով, իր հնարավորություններով անընդհատ ուշադրության կենտրոնում պահեն և ստեղծեն այնպիսի միջավայր, որպեսզի այս ծրագրերը լավագույնս իրագործվեն և այն արդյունավետությունը, որ ակնկալում ենք, արդարանա:

Այս իմաստով Երևանի բեռնաթափմանն ուղղված վարկային ծրագիրը շատ կարևոր է, որովհետև քաղաքի բազմաթիվ փողոցներ պարզապես խցանված են և գերծանրաբեռնված՝ արդեն ոչ միայն աշխատանքային օրերին և երթևեկության պիկ ժամերին:

Մենք նաև ողջունում ենք Երևանի քաղաքապետարանին և մյուս այն մարմիններին, որոնք մասնակցել են այս վարկային ծրագրի մշակմանը, և վստահ ենք, որ սա լինելու է արդյունավետ նախագիծ, այնպես, ինչպես ժամանակին եղավ Սարալանջի մայրուղու կառուցումը»: