Թրամփը հայտարարել է, որ արտաքսման իր ծրագիրը կարող է անտեսել պատշաճ դատավարության իրավունքը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ նախագահ Դոնալդ Թրամփը NBC News հեռուստաալիքին տված հարցազրույցում հայտարարել է, որ զանգվածային արտաքսումներ արագ իրականացնելու իր հավակնոտ նախընտրական խոստման կատարումը կարող է գերակայել ներգաղթյալներին Սահմանադրության համաձայն պատշաճ իրավական ընթացակարգի իրավունքի տրամադրումից, ինչպես պահանջում են դատարանները։

Թրամփի օրակարգի կենտրոնական մասն է ԱՄՆ պատմության մեջ «արտաքսման խոշորագույն գործողություն» իրականացնելը, ինչպես նա խոստացել է 2024 թվականի նախընտրական քարոզարշավի ժամանակ։ Այս նպատակին հասնելու համար նրա վարչակազմը դատարաններից ձգտում է հասնել այն ներգաղթյալների անհապաղ արտաքսմանը, որոնց մեղադրում է վենեսուելական հանցախմբին պատկանելու մեջ՝ նրանց հնարավորություն չտալով իրենց գործը շարադրել դատավորի առջև։

Անցյալ ամիս պետքարտուղար Մարկո Ռուբիոն պատասխանել էր. «Այո, իհարկե», երբ նրան հարցրել էին, արդյոք Միացյալ Նահանգներում յուրաքանչյուր մարդ իրավունք ունի՞ պատշաճ իրավական ընթացակարգի։

Թրամփը, սակայն, այդքան վստահ չէ։ «Ես չգիտեմ։ Ես իրավաբան չեմ։ Ես չգիտեմ», - պատասխանել է Թրամփը, երբ հաղորդավարուհի Քրիստեն Ուելքերը հարցրել է, թե արդյոք նա համաձա՞յն է Ռուբիոյի հետ։

Ինչպես ընդգծում է լրատվամիջոցը, Սահմանադրության հինգերորդ փոփոխությունը սահմանում է, որ «ոչ մի անձ» չի կարող «զրկվել կյանքից, ազատությունից կամ սեփականությունից՝ առանց պատշաճ իրավական ընթացակարգի»։ Դրանում չի ասվում, որ այդ անձը պետք է լինի ԱՄՆ քաղաքացի, և Գերագույն դատարանը վաղուց ճանաչել է, որ ոչ քաղաքացիներն ունեն որոշակի հիմնարար իրավունքներ։

ԱՄՆ նախագահը նաև հայտարարել է, որ թեև «մենք միշտ պետք է պահպանենք օրենքները», սակայն կցանկանար, որ Սալվադոր ուղարկեին նաև «տեղական հանցագործներին», և այս առաջարկը լայն աջակցություն է ստացել իրավաբան փորձագետների կողմից։ Երբ հաղորդավարուհին փորձել է մատնացույց անել  այն, ինչ ասվում է Հինգերորդ փոփոխության մեջ, Թրամփը ենթադրել է, որ նման գործընթացը չափազանց կդանդաղեցնի իրեն։

«Ես չգիտեմ։ Թվում է, թե դա կարող է ասված լինել, բայց եթե դուք դրա մասին եք խոսում, ապա մենք ստիպված կլինեինք անցկացնել մեկ միլիոն, կամ 2 միլիոն, կամ 3 միլիոն դատավարություն», - ասել է նա։ - «Մենք ունենք հազարավոր մարդիկ, որոնք մարդասպաններ են, թմրավաճառներ և Երկրի վրա ամենավատ մարդկանցից են։ Ես ընտրվել եմ, որպեսզի նրանց այստեղից դուրս շպրտեմ դեպի գրողի ծոցը, իսկ դատարանները հետ են պահում ինձ դրանից»։

«Բայց նույնիսկ հաշվի առնելով այն թվերը, որոնց մասին դուք խոսում եք, մի՞թե դուք, որպես նախագահ, պարտավոր չեք պահպանել Միացյալ Նահանգների Սահմանադրությունը», - հարցրել է հաղորդավարուհին։

«Ես չգիտեմ։ Ես պետք է պատասխանեմ՝ կրկնելով, որ ինձ մոտ աշխատում են փայլուն իրավաբաններ, և նրանք, ակնհայտորեն, կհետևեն նրան, ինչ ասել է Գերագույն դատարանը», - պատասխանել է ԱՄՆ նախագահը։

Գերագույն դատարանն արդեն հասկացրել է Թրամփի վարչակազմին երեք տարբեր վերջին որոշումներում, որ նա պետք է ներգաղթյալներին տրամադրի հիմնական ընթացակարգային իրավունքներ՝ հիմնված օրենքների վաղեմի ըմբռնման վրա։ Դա չէր պահանջի լիարժեք դատական քննություն, ինչպես առաջարկում էր Թրամփը։ Դրա համար կպահանջվեր ներգաղթի հարցերով դատավորի առջև կանգնելու հնարավորություն։ Նման դատավորները դատական իշխանության մաս չեն կազմում։ Նրանք Արդարադատության նախարարության աշխատակիցներ են։

Հետևեք մեզ՝ այստեղ