Եգիպտոսում հնագետները 3500-ամյա երեք դամբարաններ են հայտնաբերել. Daily Mail

CULTURE 31 May, 2025 0:14

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Եգիպտացի հնագետները հայտնել են երեք հին դամբարանների հայտնաբերման մասին, որոնք թվագրվում են ավելի քան 3500 տարվա վաղեմությամբ, գրում է Daily Mail-ը։ Պեղումները կատարվել են Լուքսորի արևմտյան ափի Դրա Աբու էլ-Նագա դամբարանի տարածքում։ Այդ վայրը պատմականորեն օգտագործվել է վերին դասի անդամների, դրանց թվում՝ պաշտոնյաների, գրագիրների և վերակացուների թաղման համար։

Երեք դամբարաններն էլ պատկանել են թագավորական ընտանիքի հետ որևէ առնչություն չունեցող տղամարդկանց։ Գիտնականները դամբարանների ներսում պահպանված հիերոգլիֆային արձանագրությունների շնորհիվ կարողացել են պարզել նրանց անուններն ու պաշտոնները։ Նրանցից ոմանք եգիպտական հասարակության մեջ կարևոր պաշտոններ էին զբաղեցնում։

Նրանցից մեկը Ամուն-եմ-Իպետն էր, որը աշխատում էր Ամոն աստծո սրբավայրում։ Նրա դամբարանը թվագրվում է 19-րդ կամ 20-րդ դինաստիային։ Դամբարանի ներսում պահպանվել են որմնանկարների բեկորներ, որոնց թվում՝ խնջույքի տեսարան և հուղարկավորության պարագաներ կրողների պատկեր։

Մեկ այլ դամբարանում էր թաղվել հացահատիկի պահեստի վերակացու Բաքին։ Դամբարանը թվագրվում է 18-րդ դինաստիային, որը Հին Եգիպտոսի պատմության ամենաբարգավաճ շրջաններից մեկն է։ Դամբարանն ունի մուտքի բակ, որը երկար միջանցքով տանում է դեպի ներքին խցիկ։

Երրորդ դամբարանը զբաղեցնում է «Ս» անունով մի մարդ, որը միաժամանակ եղել է գրագիր, Ամոնի տաճարի վերակացու և հյուսիսային օազիսների քաղաքապետ։ Այս տարածքներն անապատային պայմաններում որպես գյուղատնտեսական հողեր են օգտագործվել։

Պեղումների ընթացքում գիտնականները հայտնաբերել են տարբեր արտեֆակտներ՝ գործիքներ, մանրանկարչական մումիաներ, որոնք հայտնի են որպես ուսաբտի, ինչպես նաև թաղման պարագաների տարրեր։ Այդ առարկաները հնարավորություն են տալիս պատկերացում կազմել այն ժամանակների ծեսերի մասին և օգնում ըմբռնել Հին Եգիպտոսի հոգևոր և մշակութային ավանդույթները։

Դամբարանները լքված են եղել ավելի քան երեք հազար տարի, բայց բավականաչափ լավ են պահպանվել մանրամասն ուսումնասիրության համար։ Հնագետները հայտնել են, որ հետազոտությունների ավարտից հետո արդյունքները կհրապարակվեն գիտական հանդեսներում։

Հետևեք մեզ՝ այստեղ