Ստեղծվել է ադրբեջանական ագրեսիվ գործողությունների հավելյալ սպառնալիք. Հայ դատ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայ Դատի կենտրոնական խորհուրդն իր խոր մտահոգությունն է հայտնում, տարածաշրջանային էսկալացիայի պայմաններում, Ադրբեջանի կողմից Հայաստանի Հանրապետության Սյունիքի մարզի նկատմամբ ահագնացող սպառնալիքների առնչությամբ։ Իրանաիսրայելական հակամարտության համատեքստում աշխարհաքաղաքական անկայունությունը խորացել է՝ ստեղծելով ադրբեջանական ագրեսիվ գործողությունների հավելյալ սպառնալիք, որոնք վտանգում են Հայաստանի ինքնիշխանությունը։ Մենք կոչ ենք անում միջազգային հանրությանը՝ անհապաղ միջոցներ ձեռնարկել, որպեսզի կանխվի Հայաստանի դեմ հերթական ագրեսիան։

Ադրբեջանի նախագահ Իլհամ Ալիևը բազմիցս հայտարարել է, որ «Զանգեզուրի միջանցքն» իրականացվելու է «անկախ Հայաստանի կամքից»։ Նա պարբերաբար սպառնում է ուժ կիրառել այդ նպատակին հասնելու համար, իսկ 2022թ․ սեպտեմբերից Ադրբեջանի զինված ուժերն արդեն օկուպացրել են Հայաստանի Հանրապետության ավելի քան երկու հարյուր քառակուսի կիլոմետր տարածք: Այս հայտարարությունները, Հայաստանի սահմաններին անցկացվող զորավարժությունների ավելացման ու Միջին Արևելքում վերջին զարգացումներից առաջացած ուշադրության շեղման համակցությունը ակնհայտ սպառնալիք են ներկայացնում Հայաստանի տարածքային ամբողջականության համար:

Ստեղծված իրավիճակի համար կարևոր են հետևյալ բնութագրիչներն և անհրաժեշտ գործողությունները․

1. Ադրբեջանի կողմից թշնամանքի աճը. Ադրբեջանի շարունակական ծավալապաշտական քաղաքականության պայմաններում՝ Հայաստանը կանգնած է անմիջական սպառնալիքի առաջ։ Իր այդ քաղաքականության համաձայն՝ Ադրբեջանը նպատակ ունի վերահսկողություն սահմանել ռազմավարական տարածքների նկատմամբ՝ «տարածաշրջանային հաղորդակցություն» անվան տակ։ Այս առումով, «Զանգեզուրի միջանցքի» շինծու հիմնավորմամբ Հայաստանի որևէ տարածքի գրավման ցանկացած փորձ հանդիսանալու է միջազգային իրավունքի խախտում։
2. Տարածաշրջանային էսկալացիայի վտանգը. Իսրայել-Իրան հակամարտության շարունակությունը ավելացնում է Հարավային Կովկասի անվտանգային բնապատկերի բարդությունը։ Ադրբեջանի ագրեսիվ դիրքորոշումը՝ արտերկրյա դաշնակիցների աջակցությամբ, մեծացնում է մտահոգությունը, որ Հայաստանը կարող է լինել թիրախ՝ տարածաշրջանային վերադասավորման անվան տակ։ Միջազգային հանրությունը պետք է անհապաղ հանդես գա, որպեսզի կանխվի նման որևէ ռազմական սադրանք։
3. Կոչ միջազգային անհապաղ գործողությունների համար. Մենք դիմում ենք Եվրոպայի անվտանգության և համագործակցության կազմակերպությանը, հատկապես դրա Մինսկի խմբի համանախագահող պետություններին, Միավորված ազգերի կազմակերպության Անվտանգության խորհրդին և հատկապես դրա հինգ մշտական անդամներին ու Եվրոպական Միությանը, ինչպես նաև Հայաստանի դաշնակից և գործընկեր պետություններին՝ կանխելու համար Ադրբեջանի կողմից միջազգային հակամարտությունները շահագործելու ցանկացած փորձ՝ Հայաստանի նկատմամբ իր տարածքային հավակնությունները իրականացնելու նպատակով։ Դիվանագիտական ճնշումներ ու կոնկրետ գործողություններ պետք է ձեռնարկվեն՝ պաշտպանելու Հայաստանի տարածքային ամբողջականությունը։ Նույնանման դիմումներով հանդես գալու և դիվանագիտական ու ռազմաքաղաքական զսպման մեխանիզմների ապահովման կոչ ենք անում նաև Հայաստանի Հանրապետության իշխանություններին։
4. Ռազմական ու դիվանագիտական բարձր մակարդակի աջակցության անհրաժեշտություն. Հայաստանը կարիք ունի իր դաշնակիցների ու գործընկերների ուժեղացված աջակցության՝ հնարավոր ցանկացած սպառնալիք կանխելու համար։ Մենք կոչ ենք անում բարեկամ պետություններին վերստին հաստատել իրենց հանձնառությունը Հայաստանի ինքնիշխանությանը և տարածքային ամբողջականությանը՝ ապահովելով անվտանգության միջոցառումներ, դիվանագիտական լուծումներ ու ռազմավարական գործընկերություն։

Հայ Դատի կենտրոնական խորհուրդը հաստատակամորեն հավատարիմ է Հայաստանի ինքնիշխանությունն ու տարածքային ամբողջականությունը պաշտպանելու իր հանձնառությանը։ Մենք կոչ ենք անում միջազգային կազմակերպություններին ու առաջնորդներին հաշվի առնել իրավիճակի լրջությունը, չանտեսել իրական սպառնալիքները և ձեռնարկել անհապաղ քայլեր՝ նպաստելու խաղաղությանն ու կայունությանը Հարավային Կովկասում։

Հետևեք մեզ՝ այստեղ