«Ջիվան Ավետիսյանի հավատը վերացական չէ, այլ՝ ամենօրյա տառապանքով ապրած ճանապարհ». Վարդան Մկրտչյանը «20 20-ի հրեշտակները» ֆիլմի հերոսներից է

CULTURE 12 July, 2025 0:16

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Դերասան Վարդան Մկրտչյանը կմարմնավորի Ջիվան Ավետիսյանի նոր՝ «20 20-ի հրեշտակները» ֆիլմի գլխավոր հերոսներից մեկին։ Ֆիլմն անդրադառնում է Արցախյան պատերազմին, ազգային ցավին և մարդկային հերոսության լուսավոր կողմերին: Ֆիլմի հրգանքի տուրք է արցախյան պատերազմի ժամանակ իրենց կյանքը վտանգած բուժաշխատողներին:

Վարդան Մկրտչյանն ասում է՝ ֆիլմի ռեժիսորի մոտեցումը ոչ միայն արվեստի, այլև հավատքի դրսևորում է։

«Ես շատ եմ գնահատում ամեն արվեստագետի մեջ իր մաքրությունը, ազգայնությունը, իր ընտրած թեմաների հանդեպ նվիրումը։ Ջիվանի ֆիլմերում այդ ամենն ակնհայտ է։ Ամեն արվեստագետ չի, որ ցավի վրա է հենվում ստեղծագործելիս։ Բայց Ջիվանի ցավը՝ Արցախի ցավը, իրեն չի լքում։ Դա իր բնօրրանն է, իր հասցեն ու իր կոդը»,- Tert.am Life-ի հետ զրույցում ասաց դերասանը:

Դերասանի խոսքով՝ Ջիվան Ավետիսյանն ունի մի նպատակ՝ պատմել Արցախի մասին ամբողջ աշխարհին, ոչ միայն մեզ՝ հայերիս։

«Ես զգացողություն ունեմ, որ ինքը ուզում է այդ թեմայի շուրջ ամեն ինչ պատմել, ամեն անկյունից պատմել։ Եվ ունի ոչ սովորական հավատք դեպի Արցախը, դեպի իր ինքնությունը։ Ոնց որ Նարեկացին ասում էր՝«Հավատքը քո փրկեց քեզ»՝ Ջիվանի դեպքում դա ոչ միայն հավատք է, այլ զոհողություն՝ կոնկրետ աշխատանքով, ամենօրյա տառապանքով»,- Tert.am Life-ի հետ զրույցում նշեց նա:

Վարդան Մկրտչյանը վստահ է՝ այդ ճանապարհը, որն անցնում է ռեժիսորը առանց տրտնջալու, մի օր պիտի իրեն դարձնի երջանիկ մարդ։ Եվ ոչ միայն իրեն.

«Տա Աստված, որ ոչ միայն իրեն, այլ բոլորիս դարձնի երջանիկ մարդ։ Դրա համար եմ Ջիվանի կողքին՝ իմ համեստ հնարավորությունների շրջանակում»,- անկեղծացավ մեր զրուցակիցը:

Դերասանն իբրև խոստում՝ ներկայիս փուլում չբացահայտելով փոքրիկ, բայց կարևոր մանրուք, նշեց, որ նկարահանումներից հետո կբացի գաղտնիքը։

«Ինքն ինձ կանչեց, ասաց, կերպարի անունը Լևոն է... բայց մի փոքր նախախնամության պես բան կա, որը հիմա չեմ ասի։ Եթե ամեն ինչ լավ լինի՝ կասեմ»,- ամփոփեց Վարդան Մկրտչյանը:

«20/20-ի հրեշտակները» շարունակում է Ջիվան Ավետիսյանի ֆիլմաշարը՝ Արցախի մասին, ու միաժամանակ արձագանքում է մեր ժամանակի ցավալի իրողություններին։ Ֆիլմը խոստանում է լինել ոչ միայն գեղարվեստական արտահայտություն, այլև հոգևոր սիմվոլ։

Հետևեք մեզ՝ այստեղ