«Չկա տղամարդ, չկա պրոբլեմ». բեմում կանայք են, բայց անակնկալ պահերի բեմ են հրավիրվում նաև հանդիսատեսի շարքում նստած տղամարդիկ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կամերային թատրոնում կայացավ «Չկա տղամարդ, չկա պրոբլեմ» ինտերակտիվ ներկայացման պրեմիերան: Պիեսի հեղինակն Արա Երնջակյանն է, ներկայացման բեմադրիչը՝ Դավիթ Աբրահամյանը:

Չնայած բեմում միայն կանայք են, սակայն ներկայացման ընթացքում անակնկալ պահերի բեմ են հրավիրվում նաև հանդիսատեսի շարքում նստած տղամարդիկ, ովքեր դառնում են գործողության մասնակից։

Հերոսուհիներին մարմնավորում են Եվա Խաչատրյանը, Էրմինա Զախարովան, Վիկտորյա Սահակյանն ու Ժաննա Քոչարյանը:

Tert.am Life-ը ներկա է եղել պրեմիերային, զրուցել դերասանների հետ ու առանձնացրել երեկոյի հետաքրքիր դրվագները:

«Ներկայացումը ոչ ֆեմինիստական է, ոչ էլ հակատղամարդ». Դավիթ Աբրահամյան

Բեմադրիչ Դավիթ Աբրահամյանի խոսքով՝ այս գործը ստանձնելը հեշտ չէր․

«Տարիներ առաջ այն բեմադրել էր Արա Երնջակյանը՝ իմ ուսուցիչը։ Շատ բարդ է անել մի բան, որը կարող է համեմատվել նրա աշխատանքի հետ։ Այդ պատճառով փորձել եմ ամեն ինչ անել ազնվորեն՝ առանց ավելորդություններ մոգոնելու։ Պահել ենք պիեսի ոգին, ժամանակի շունչը, բայց ներկայացումը նաև թարմացրել ենք, դարձրել ավելի արդիական»,- Tert.am Life-ի հետ զրույցում ասաց ռեժիսորը:

Դավիթ Աբրահամյանը նաև նշեց, որ բեմում միայն կանայք են, ինչը և՛ հաճելի, և՛ պատասխանատու էր․

«Աղջիկների հետ միշտ հաճելի է աշխատել, բայց նաև դժվար․ նրանք երբեմն չափազանց սրտանց են մոտենում տեքստերին, մինչդեռ սա հումորային ներկայացում է։ Նպատակը՝ ցույց տալ, թե ինչպես կանայք յուրահատուկ ձևով ընկալում են աշխարհը և ցանկացած իրավիճակ կարող են շրջել իրենց օգտին։ Ներկայացումը ոչ ֆեմինիստական է, ոչ էլ հակատղամարդ․ այն կանանց մտածողության, նրանց տեսակետների մասին է»,- ընդգծեց բեմադրիչը:

Ներկայացման հերոսուհիները ներկայացնում են կանանց տարբեր տիպեր։ Աբրահամյանը վստահ է՝ յուրաքանչյուր տղամարդ բեմում կգտնի իր կյանքի կնոջ «պրոտոտիպը»․

«Հաճախ հանդիսատեսի տղամարդիկ ասում են, որ այս կամ այն կերպարը հիշեցնում է իրենց կնոջը։ Սա է ներկայացման հետաքրքրությունը»,- նշեց մեր զրուցակիցը:

«Վերնագրից վախենալ պետք չէ, ներկայացումից մարդիկ դուրս են գալու լիցքավորված, կարծես վիտամին C ստացած». Եվա Խաչատրյան  

Եվա Խաչատրյանն ընդգծեց, որ պիեսում բարձրացված թեմաները միշտ արդիական են․

«Ներկայացումը կանանց զգացմունքային աշխարհի մասին է։ Կինը շատ ավելի էմոցիոնալ է, իմպուլսիվ, ամեն բան ավելի խոր զգացողությամբ է ընդունում։ Այս ամենը մատուցվում է հումորով, ինտերակտիվ միջավայրում։ Առանց տղամարդկանց այս ներկայացումը պարզապես չի կարող կայանալ»,- նշեց դերասանուհին:

Եվա Խաչատրյանը պատմեց, որ սկզբում պիեսը գրվել էր որպես մոնոներկայացում, բայց հետո բաժանվեց չորս մասի՝ դառնալով չորս տարբեր կանանց խոսք:

«Մենք տեսնում ենք կանանց, որոնք բարձրացնում են այն հարցերը, որոնք միշտ տանջել են՝ ինչո՞ւ է տղամարդը երբեմն առավել կամ պակաս որևէ հարցում։ Տղամարդիկ սովորաբար սառը դատող են, որոշումները երկար մտածելուց հետո են կայացնում, մինչդեռ կինը կարող է մի պահի ազդեցությամբ որոշում ընդունել ու հետո փոշմանել։

Այս ամենը ներկայացվում է հումորով։ Ներկայացումը շատ ինտերակտիվ է․ ոչ միայն դիմում ենք հանդիսատեսին, այլև նրանց բեմ ենք բարձրացնում։ Առանց տղամարդկանց այն պարզապես չի կայանա։ Եթե դահլիճում միայն կանայք լինեն, խաղը չի ստացվի»,- նշեց դերասանուհին:

Եվա Խաչատրյանի խոսքով՝ պիեսը տարիներ առաջ արդեն մեծ հաջողություն է ունեցել․

«Արա Երնջակյանի բեմադրությամբ այն խաղացվել է դեռևս 2017-ին և չորս տարի շարունակ անընդմեջ սիրով ընդունվել է հանդիսատեսի կողմից։ Հիմա ներկայացումն ունի նոր ռեժիսորական ձեռագիր, բայց նյութը նույնն է։ Հույս ունեմ, որ այս անգամ էլ երկար կյանք կունենա։

Մենք հանդիսատեսին խոստանում ենք լավ տրամադրություն ու լիքը ծիծաղ։ Ներկայացումից մարդիկ դուրս են գալու լիցքավորված, կարծես վիտամին C ստացած լինեն։ Վերնագրից վախենալ պետք չէ․ այն ավելի շատ կատակային ու սարկաստիկ է։ Ներկայացման ընթացքում պարզ է դառնում, որ առանց տղամարդու կյանք չկա, ինչպես նաև առանց կնոջ։ Սա հավասարակշռության ու սիրո մասին պատմություն է»։

«Միաժամանակ ցույց է տրվում, որ առանց տղամարդու կյանք չի լինում». Էրմինա Զախարովա

«Իմ հերոսուհին ավելի հախուռն կին է, որը սովոր է ամեն ինչի մեջ խառնվել։ Դա նոր փորձ էր ինձ համար։ Ներկայացումը կանանց խնդիրների մասին է, որոնք հաճախ ուռճացվում են, բայց միաժամանակ ցույց է տրվում, որ առանց տղամարդու կյանք չի լինում։ Վերջում ամեն ինչ հանգում է այն գաղափարին, որ տղամարդու և կնոջ հարաբերությունների հիմքում սերն է»,- նշեց դերասանուհի Էրմիրնա Զախարովան:

«Չկա տղամարդ, չկա պրոբլեմ»-ը կատակերգական ներկայացում է, որն իր մեջ համադրում է կանանց մտածելակերպի յուրահատկությունները, նրանց անհանգստությունները և հարաբերությունների մասին հումորային դիտարկումները։ Կամերային թատրոնի հանդիսատեսին սպասվում է լավ տրամադրություն ու մեծ չափաբաժնով ծիծաղ։ 

Լուսանկարները՝ Ռոբերտ Աբրահամյանի

Հետևեք մեզ՝ այստեղ