«Գոռն իմ առաջարկով համաձայնեց Լեոյին ընտրել այս դերի համար». Ռաֆայել Երանոսյանը՝ «Mallորվածը» ֆիլմի մասին

CULTURE 22 September, 2025 19:26

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հոկտեմբերի 9-ից մեծ էկրաններ կբարձրանա ռեժիսոր Գոռ Կիրակոսյանի նոր ֆիլմը՝ «Mallորվածը»։ Այն ընտանեկան ժանրի ֆիլմ է, որը, ըստ ստեղծագործական խմբի, հանդիսատեսին ամանորյա տրամադրություն կհաղորդի դեռևս տոնական օրերից շատ առաջ։

Ռեժիսոր Գոռ Կիրակոսյանը լսարանին հայտնի է կատակերգական և ընտանեկան ժանրի ֆիլմերով, որոնք մեծ մասսայականություն են վայելում: Նրա աշխատանքներից են՝ «Մեծ պատմություն փոքր քաղաքում», «Կորած մոլորվածը Հայաստանում», «Քայլ ձիով», «Ազնիվ գողերը», «Սևազգեստ կանայք» և այլն:

«Mallորվածը» ֆիլմում նկարահանվել են Գրիգոր Դանիելյանը, Ռոզի Ավետիսովան, Դիանա Մալենկոն, Արման Նավասարդյանը, Ռաֆայել Երանոսյանը, Ներսես Ավետիսյանը, Անի Խաչիկյանը, Գարիկ Սեփխանյանը, Իննա Խոջամիրյանը, Լեո Մկրտչյանը և այլք:

Նախագիծը դեռ պրեմիերայից առաջ մեծ քննարկումներ է առաջացրել։ Շատերը համեմատել են այն լեգենդար «Տանը մենակ» ֆիլմի հետ՝ ենթադրելով, թե «Mallորվածը» դրա ռիմեյքն է։ Սակայն ստեղծողները շեշտում են՝ հիմքում օրիգինալ սցենար է։

Tert.am Life-ը ֆիլմի բովանդակության և նկարահանման ընթացքի մասին զրուցել է դերասան Ռաֆայել Երանոսյանի հետ, ով մարմնավորում է գլխավոր կերպարներից մեկին։

Գաղափարն ու սցենարը

«Երեխան մնում է մոլում, գողերը գալիս են գողություն անելու… Հեծանիվ չենք հայտնագործել, բայց շատ սիրուն, ամանորյա ընտանեկան կինո է ստացվել։ Առաջարկը ստացա Գոռ Կիրակոսյանի կողմից։ Մտահղացումը Գարիկ Սեփխանյանինը և Գրիգոր Դանիելյանինն էր, ապա այս ամենին միացավ նաև Գոռը։ Արդյունքում՝ սցենարը գրեցին Գոռ Կիրակոսյանը և Նարեկ Մարգարյանը («Armcomedy»):

Ի դեպ, երբ դեռ աշխատում էինք սցենարի վրա և հայտնի չէր՝ ովքեր պետք է նկարահանվեն, Գոռն ասաց՝ ուզում ենք կինո նկարել։ Իմ սովորության համաձայն պատասխանեցի՝ «էս կինոն չի վաճառվելու»։ Հետո ասաց, որ ես էլ եմ խաղալու, ես էլ ավելացրի՝ «ուրեմն՝ կվաճառվի»,– կատակելով պատմեց դերասանը։

Կերպարի մասին

«Մարմնավորում եմ գողերից մեկին՝ Եզնիկին, ում ֆիլմում Եղնիկ են ասում, քանի որ խաղավարներից գողանում է եղնիկի զգեստը։ Կերպարս մի քիչ հիմարիկ է, կատակային, բայց հետաքրքիր։ Նկարահանումները տեղի ունեցան «Դալմա Գարդեն Մոլում»՝ գիշերային ժամերին՝ 22:00-ից մինչև առավոտյան 10:00: Թեև բարդ գրաֆիկ էր, բայց արդյունքը շատ լավ ստացվեց»։

Լեոյի մասնակցությունը

«Շնորհակալ եմ Գոռին, որ իմ առաջարկով համաձայնեց Լեոյին նկատի ունենալ այս դերի համար: Կար հարց՝ արդյո՞ք նա կկարողանա խաղալ։ Ու արդյունքում՝ Լեոն կարողացավ: Շատ էներգիա ու կրակ ունի։ Երբեմն Գոռը նույնիսկ ասում էր՝ «Լեո, մի քիչ զուսպ»։ Դժվար էր, բայց այդ էներգիան ֆիլմին շատ բան տվեց»։

Մթնոլորտն ու աշխատանքը

«Իմ կյանքում ամեն ինչ պատահական է լինում, ու հենց դա է ինձ երջանկացնում։ Նկարահանումների ընթացքում բոլորս շատ նվիրված էինք։ Ձմեռ էր, սառնամանիք, գիշերային նկարահանումներ, բայց բոլորը սիրով ու էնտուզիազմով աշխատում էին, որ ամեն բան հասցնենք»։

Ինչ սպասի հանդիսատեսը

«Թող սպասեն հետաքրքիր ընտանեկան իրավիճակների։ Բոլորս էլ կարող ենք հայտնվել նման իրավիճակներում։ Սա գեղեցիկ ֆիլմ է, որը հանդիսատեսի համար դառնալու է նախատոնական նվեր»։

Հետևեք մեզ՝ այստեղ