«Երրորդ տարին էր, որ հայտ էի ներկայացնում, երբեք չեմ հանձնվել». Ալբերտ Արմենակյանի երազանքի ճանապարհը՝ դեպի «Մանկական Եվրատեսիլ»

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

12-ամյա Ալբերտ Արմենակյանն, ով  Ֆրանսիայի «Մանկական Ձայնը» նախագծում Պատրիկ Ֆիորիի հետ կատարեց «Դլե Յաման» երգը՝ հուզելով ժյուրիի անդամներին, այս տարի Հայաստանը կներկայացնի «Մանկական Եվրատեսիլ» մրցույթին։  Tert.am Life-ը երգի պրեմիերայից առաջ զրուցել է Ալբերտի հետ ու պարզել նրա երազանքին հասնելու անցած ճանապարհը:

Երգի և տեսահոլովակի մանրամասները դեռ շատ չեն բացահայտվում, սակայն Ալբերտը վստահ է՝ բեմում ամենակարևորն է վայելելը։

«Սկսել եմ երգել հինգ տարեկանից։ Առաջին տեղը, որտեղ երաժշտական կրթություն եմ ստացել, Երգի պետական թատրոնն էր։ Զուգահեռ ընդունվեցի նաև Ալեքսանդր Սպենդիարյանի երաժշտական դպրոց՝ դաշնամուրի բաժին։ Մինչև հիմա էլ այնտեղ եմ սովորում»,-պատմեց Ալբերտը։

Երգի պետական թատրոնը ավարտելուց հետո նա սկսել է հաճախել Զարուհի Բաբայանի երգի ստուդիա։
«Զարուհի Բաբայանն ինձ հետ շատ լավ է աշխատում։ Մենք իրար շատ լավ ենք հասկանում։ Կարևոր ելույթներից առաջ նա միշտ ինձ ոգևորում է և շատ կարևոր խորհուրդներ է տալիս։ Իսկ այս անգամ նրա առաջին խորհուրդը այն էր, որ ես պետք է վայելեմ բեմը, վայելեմ մրցույթի ամբողջ ընթացքը։ Սա շատ մեծ հնարավորություն է, և պետք է ներկայանամ իմ հնարավորությունների սահմաններում՝ ամենակարևորը՝ սրտով»։

Ալբերտը պատմում է, որ «Մանկական Եվրատեսիլ»-ին մասնակցելու երազանք վաղուց է ունեցել։
«Այս անգամ երրորդ տարին էր, որ հայտ էի ներկայացնում։ Սա իմ երազանքն էր։ Շատ եմ աշխատել, երկար ճանապարհ եմ անցել։ Եթե չէր ստացվում, չէի հանձնվել։ Միշտ գնում էի դեպի երազանքս»։

Եզրափակիչ փուլին հրավիրված հարցազրույցի ժամանակ Ալբերտին սպասվում էր անակնկալ.
«Ինձ կանչեցին հարցազրույցի Հանրային հեռուստաընկերություն։ Ասացին, թե հարցազրույց են անում մասնակիցներին ավելի լավ ճանաչելու համար։ Բայց պարզվեց՝ դա անակնկալ էր։ Ինձ հենց այնտեղ տնօրեն Հովհաննես Մովսիսյանը հայտնեց, որ ընտրվել եմ՝ մաղթելով հաջողություն։ Էմոցիաներս անհնար է բացատրել։ Երբ երազանքը իրականանում է, դա բառերով պատմել հնարավոր չէ»։

Այժմ ընթացքի մեջ են երգի և տեսահոլովակի նախապատրաստական աշխատանքները։
«Շատ փակագծեր չեմ կարող բացել։ Բայց կասեմ, որ այս տարի ձևաչափը մի փոքր այլ է և «Մանկական Եվրատեսիլ»ում նման ժանր վերջին տարիներին Հայաստանում չի եղել։ Շուտով ամեն ինչ կտեսնեք»,- նշեց մեր զրուցակիցը:

Երաժշտությունից բացի, Ալբերտը սիրում է նաև նկարել և ստեղծագործել արհեստական բանականության միջոցով։
«Ես պրոֆեսիոնալ չեմ նկարում, բայց երբ տանը մենակ եմ, սկսում եմ նկարել այն, ինչ զգում եմ այդ պահին։ Շատ եմ սիրում նաև արհեստական բանականության գործիքներով երաժշտություն ստեղծել ու պատկերներ գեներացնել: Դա իմ երկու սիրելի զբաղմունքներն են»,- պատմեց Ալբերտը:

Դպրոցում այս ընթացքում Ալբերտին բոլորն աջակցում են։
«Դասընկերներս շատ ուրախացան, երբ իմացան, որ ես եմ ընտրվել։ Դպրոցում էլ ըմբռնումով են մոտենում, որ երբեմն բացակայում եմ փորձերի պատճառով։ Շատ շնորհակալ եմ իրենց աջակցության համար: Շնորհակալ եմ Հանրային հեռուստաընկերության ամբողջ թիմին ինձ աջակցելու համար»։

Իսկ նրանց, ովքեր այս տարի չեն ընտրվել՝ Ալբերտն ունի մի պարզ, բայց կարևոր խորհուրդ.
«Երբեք չհանձնվել։ Երազանքը պետք է դարձնել նպատակ։ Եթե հավատան և աշխատեն, մի օր անպայման կկատարվի:

Ես կանեմ ամեն ինչ, որպեսզի պատվով ներկայացնեմ Հայաստանը և ամենակարևորը՝ վայելեմ այս ամբողջ ճանապարհը, քանի որ սա իմ երազանքն է»,- անկեղծացավ Ալբերտը:

Հիշեցնենք, Հայաստանի այս տարվա պատվիրակն ընտրվել է Հանրային հեռուստաընկերության նախապես հայտարարած մրցույթի արդյունքում, որին 80-ից ավելի հայտ էր ստացվել: Տեղի և միջազգային լավագույն մասնագետներից բաղկացած փորձագիտական խմբի որոշմամբ լավագույնն է ճանաչվել 12-ամյա Ալբերտը։

«Մանկական Եվրատեսիլ 2025» երգի մրցույթն այս տարի անցկացվելու է Վրաստանի մայրաքաղաք Թբիլիսիում` դեկտեմբերի 13-ին, «Միավորված երաժշտությամբ» կարգախոսի ներքո։ Ալբերտը հանդես կգա 5-րդ համարի ներքո, իսկ երգի պրեմիերան նախատեսվում է շուտով: 

Լուսանկարները՝ Էլեն Գասպարյանի

Հետևեք մեզ՝ այստեղ