Կառավարությունը համապարժեք չի արձագանքում առկա խնդիրներին. Միքայել Մելքումյան

ԲՀԿ-ն պատրաստվում է 2017 թ. խորհրդարանական ընտրություններին և պատկառելի ներկայացվածությամբ հանդես կգա որպես առանձին քաղաքական ուժ: «Առաջարկելու ենք բազմաթիվ օրենսդրական նախաձեռնություններ և բազմաթիվ ծրագրային բարեփոխումներ»,-ասաց ԲՀԿ պատգամավոր Վահան Բաբայանը: Նա նշեց, որ շրջանառվող լուրերն այն մասին, թե կուսակցությունը պատրաստվում է համագումարի, իրականությանը չեն համապատասխանում, և նման քննարկումներ դեռ չկան:

Պատգամավորը խոստովանեց, որ «Բարգավաճ Հայաստան» կուսակցությունը մեկ տարվա ընթացքում հաղթահարել է ներքին ճգնաժամեր և վստահ է, որ առաջիկա ընտրությունների ընթացքում հաջողության կհասնեն: «Փաստորեն տեղի են ունենում քաղաքական վերադասավորումներ, և իշխանական համակարգում կունենանք նոր քաղաքական մեծամասնություն ու նոր ձևաչափ: Հետևաբար, ոչ իշխանական ուժերում ևս սպասվում են փոփոխություններ, որոնք, ցանկալի է, որ լինեն ծրագրային և գաղափարական ընհանրությունների հիման վրա»,- ավելացրեց ԲՀԿ պատգամավոր Միքայել Մելուքմյանը: Նա հարկ համարեց նշել, որ քանի դեռ երկրում առկա է ծանր սոցիալ-տնտեսական իրավիճակ, այդ քաղաքական վերադասավորումները, Հայաստանի ապագա զարգացումն ու տնտեսական խնդիրների լուծումը ժողովրդի համար կմնան առաջնային հարց:

Քաղաքական ուժերի գործունեությունից բացի՝ Մելքումյանը կարևորեց ժողովրդին աշխատանքով ապահովելու հարցն ու քաղաքացիական նախաձեռնություններին աջակցությունը: Մելքումյանը նաև նշեց, թե պետք է թույլ չտալ, որ գյուղատնտեսության ոլորտում կրկնվեն խաղողի և այլ գյուղատնտեսական մշակաբույսերի մթերումերի հետ կապված խնդիրները: Ըստ նրա, գյուղատնտեսության ոլորտում գրանցվել է համեմատաբար բարձր վիճակագրական աճ, բայց գյուղացին դրանից շահութաբերություն չի զգում: ԲՀԿ պատգամավորի խոսքով, կան մոտ 158.000 գյուղացիական վարկեր, որոնցից 88.000-ը բանկերն են տրամադրել, իսկ 70.000-ը` վարկային կազմակերպություները` բարձր տոկոսադրույքներով:

«Կառավարությանն առաջարկում ենք կենտրոնական բանկի հետ լուծումներ առաջարկել` գյուղացիների համար շահութաբեր տնտեսություն ստեղծելու ուղղությամբ: Գյուղացին պարտաճանաչ կատարում է իր վճարումները, սակայն մնում է դատարկաձեռն կամ նույնիսկ կորուստներ է ունենում»,- նշեց Մելքումյանը:

Գյուղատնտեսությունը ստեղծված ծանր իրավիճակից հանելու համար նա առաջարկեց մայիսի վերջից մինչև հուլիսի կես ՌԴ արտահանել մոտ 7-8 հազար տոննա վաղահաս կարտոֆիլ: Ըստ նրա, հարկավոր է նաև արտահանել հայկական գինին ու պանիրը: Նա նշեց, որ հայկական գինին ռուսական շուկայում մրցունակ չէ, քանի որ ինքնարժեքը 2 անգամ ավելի բարձր է, քան չիլիական կամ բուլղարական գինիներինը: Ծախսերը չափազանց ուռճացված են, և նմանատիպ լուրջ խնդիրները կառավարության պատասխանատուների հետ պետք է քննարկել: «Միայն «Ռեժի՛մ, հեռացի՛ր» ասելով՝ ոչինչ չենք փոխի»,- ավելացրեÖ Միքայել Մելքումյանը:

Պատգամավորը նշեց, որ այս տարի ամբողջ աշխարհում գազի գինը կտրուկ նվազում է: Եվրոպային գազի 31%-ը մատակարարում է Ռուսաստանը, 20 %-ը՝ Նորվեգիան, 11%-ը՝ Նիդեռլանդները և 4%-ը` Ալժիրը: Գինը 400 դոլարից իջել է՝ հասնելով մոտ 200-220 դոլարի 1000 խմ-ի համար: Նա ասաց, որ մեզանում գազի գինը պետք է որ իջնի, և դրա կարևորագույն գործոններից մեկը կարող է լինել Հայաստան-Իրան հարաբերությունների զարգացումը, այդ թվում՝ նաև էներգետիկ ոլորտում: «Խնդիրներ շատ կան, դրանց մի մասը կապված է գյուղացիական կոոպերատիվների, արդյունաբերության զարգացման հետ և այլն: Կառավարությունն այս փուլում դանդաղեցրել է իր գործունեությունը. այն համարժեք չի արձագանքում խնդիրներին, այլ լուծում է «փոքր հրդեհներ հանգցնելու» խնդիրը, ինչը կարող է հանգեցնել իրավիճակի բարդացմանը»,- ասաց Մելքումյանը:

Վահան Բաբայանն ավելացրեց, որ Սահմանադրությունը փոխվել է, և կան բազում խնդիրներ, որոնք պետք է հստակեցվեն: Պատգամավորները պետք է անցնեն օպերատիվ աշխատանքի, որովհետև այս Խորհրդարանն իր լիազորություններն ավարտում է 2017 թ.: «Տարբեր մարդիկ ունենում են նման հայացքներ, բայց հասկանալի պատճառներով չեն ցանկանում որևէ կուսակցության մեջ ներգրավվել, քանի որ կա վստահության և հավատի պակաս: Պետք է կարողանալ աշխատել և՛ ընդդիմության հետ, և՛ իշխանության, հանուն ծրագրերի իրականացման»,- նշեց Բաբայանը: Պատագամավորի խոսքով, իրենք հանդիպում են տարբեր ք աղաքացիների հետ, ովքեր մեծ ցանկություն ունեն համախմբվելու և լուծելու առկա բազմաթիվ խնդիրները: