Սև կոնը, ցարին մատուցած ծառայություններն ու բացառիկ գինին. «Փաստ»

«Փաստ» օրաթերթը գրում է.

Գինու միջազգային տարբեր մրցույթներում ու համտեսներում բազմիցս է հաղթող ճանաչվել սպիտակ լիկյորային «Պինո–Գրի Այ-Դանիլ» գինին: Այն ունի բավականին հետաքրքրաշարժ պատմություն, որն սկսվել է 19-րդ դարի սկզբին: Պինո– Գրի խաղողը (ֆրանսերենից թարգմանաբար նշանակում է «սև կոն»), որից պատրաստվում է այս գինին, աճում է Ղրիմի հարավային ափին՝ ԱյԴանիլ հունական անվամբ տարածքում։

Այ-Դանիլի հողերում գինեգործության հիմնադիրն իշխան Միխայիլ Վորոնցովն էր, որն այնտեղ կալվածք ստացավ ցարին մատուցած ծառայությունների համար: Հաստատվելով իր նոր վայրում՝ նա սկսեց արտասահմանից ներմուծել խաղողների լավագույն տեսակները և մեղմ լեռնալանջերը վերածեց խաղողի ծաղկուն այգիների: Նրա ղեկավարությամբ Ղրիմի ափին կառուցվեց առաջին գինու մառանը: Գործը ծաղկեց, զարգացավ, և բերրի հողերը առատաձեռնորեն պարգևատրեցին Վորոնցովին իրենց բերքով:

Հայտնի գեներալ-նահանգապետի մահից հետո նրա տնկարկներն ու կալվածքն անցան կայսերական արքունիքին: Վորոնցովի բիզնեսը հանձնվեց իշխան Լև Գոլիցինին, որը համարվում էր երկրի լավագույն գինեգործը: Նա իր առջև նպատակ դրեց ստեղծել բացառիկ բարձրորակ գինիներ: Դրան հասնելու համար Գոլիցինը պետք է պահպաներ խաղողի արդեն իսկ հաստատված տեսակների ընտրանին, այդ թվում՝ Պինո–Գրի տեսակը: Առաջին «Պինո–Գրի Այ-Դանիլ» գինին թողարկվել է 1880 թվականին, իսկ ներկայում արտադրվում է Ղրիմի հայտնի Մասանդրա գինեգործարանի կողմից։

Պինո–Գրի խաղողը հասունանում է Ֆրանսիայում և Ղրիմի այլ շրջաններում, սակայն միայն Ալ-Դանիլի հողերում են հասունանում վարդագույն-ծխագույն ողկույզներ՝ պահանջվող շաքարի պարունակությամբ (30 %), ինչը նրանց հաղորդում է յուրահատուկ բուրավետ փունջ, մուգ սաթե գույն՝ ոսկեգույն երանգներով և նուրբ, ամբողջական համով։

Ստացված գինին երկու տարի հասունանում է կաղնե տակառներում շշալցվելուց առաջ: Գինու գիտակները գիտեն, որ ինչքան երկար է գինին հասունանում, այնքան ավելի է զարգանում նրա համը, և «Պինո– Գրի Այ-Դանիլը» բացառություն չէ: Այդ գինին բնութագրվում է յուրահատուկ յուղայնությամբ և թարմ հացի բույրով՝ սերկևիլի և ընկույզի դառնության նուրբ երանգներով: Միաձուլվելով՝ դրանք ստեղծում են ապրանքանիշի համային փունջը՝ նուրբ ու հմայիչ։

«Պինո–Գրի Այ-Դանիլի» լիարժեք համը կարելի է զգալ թեթև կումեր անելով։ Իսկական գիտակները գինին լցնում են բարակ պատերով, կակաչի ձև ունեցող բաժակի մեջ, բռնում են այն ցողունից, մի քիչ թեքում և թեթևակի բացված շուրթերով մի փոքր կում գինի քաշում բերանը՝ այն միանգամից կուլ չտալով, այլ վայելելով համերի փունջը։

Այդ սպիտակ գինին մատուցվում է սառեցված և լավ է համադրվում ձկան, թռչնամսի, պանիրների և մրգերի հետ, բայց երբեք չպետք է այն համադրել տավարի կամ խոզի մսի հետ։ Բացի դա, այդ վինտաժային, լավ հասունացած գինին հաճելի է վայելել նաև առանց որևէ ուտելիքի։

ԿԱՄՈ ԽԱՉԻԿՅԱՆ 

Մանրամասները՝ «Փաստ» օրաթերթի այսօրվա համարում