Երազանքը՝ բեմում. Լիլիթ Թոխատյանը հուզվեց, երբ Հրանտ Թոխատյանը մոտեցավ շնորհավորելու. «Կառավարական համերգը» վերադարձել է նոր երիտասարդ շնչով

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Երևանի կամերային թատրոնի բեմ է վերադարձել «Կառավարական համերգ» ներկայացումը՝ այս անգամ նոր, երիտասարդ կազմով։ Ներկայացումը, որը տասնամյակներ շարունակ դարձել է դերասանների երազանքն ու հանդիսատեսի սիրելին, վերադարձել է նոր էներգիայով, նոր բացահայտումներով և նույն խորքային ասելիքով։

Նոր բեմադրության մեջ ներգրավված են երիտասարդ դերասաններ՝ Սուրեն Պողոսյանը, Ժորա Մարտիրոսյանը, Լիլիթ Թոխատյանը, Ավետ Զոհրաբյանը, Վիկտորյա Սահակյանը, Էրմինա Զախարովան, Մոհանան, Մարիամ Բաբայանը, Դավիթ Աբրահամյանը, Նարեկ Ալեքսանյանը, Ռաֆայել Թալասյանը և այլք։ Ներկայացումը բեմադրել է Արա Երնջակյանը։

Նոր կազմի համար այս նախագիծը պարզապես հերթական ներկայացում չէ, այլ տարիներով սպասված երազանքի իրականացում։

Tert.am Life-ը ներկա է եղել ներկայացման առաջնախաղին ու պրեմիերայից առաջ զրուցել դերասանների հետ:

«Տարիներով կուտակված էմոցիաներ են». Լիլիթ Թոխատյան 

Դերասանուհի Լիլիթ Թոխատյանի համար այս ներկայացումը երկար սպասված երազանք է եղել. «Չեմ կարող բառերով արտահայտել, թե ինչ եմ զգում հիմա։ Սրանք միայն այսօրվա էմոցիաները չեն, այլ տարիներով կուտակված սպասումն ու հավատը։ Մի քանի անգամ փորձել եմ ընդգրկվել ներկայացման մեջ, բայց տարբեր պատճառներով չի ստացվել։ Այս անգամ էլ գալիս էի պարզապես սովորելու, բայց երբ հասկացա, որ ընտրվել եմ, դա իսկական երջանկություն էր»։ 

Նրա խոսքով՝ ներկայացումը գրավում է ոչ միայն երաժշտականությամբ, այլև խորքային ասելիքով.

«Սա պարզապես երաժշտական ներկայացում չէ։ Հումորի ու երգերի տակ շատ լուրջ ասելիք կա, որը զգում են ուշադիր դիտողները»։ Դերասանուհին նաև խոստովանում է, որ ներկայացման հետ կապված մանկության «փոքր ցավ» ունի. «16 տարի նայել եմ այս ներկայացումը, ու երբեք ինձ փուչիկ չի հասել։ Հիմա խոստանում եմ՝ ինչ երեխա տեսնեմ, անպայման փուչիկ եմ տալու»։

«Սա փորձություն է յուրաքանչյուր դերասանի համար». Ժորա Մարտիրոսյան

Ժորա Մարտիրոսյանի խոսքով՝ այս ներկայացումը յուրահատուկ տեղ ունի դերասանների կյանքում. «Յուրաքանչյուր դեր կարևոր է, բայց սա առանձնահատուկ է։ Ես խաղացել եմ նաև ավագ սերնդի հետ, հիմա՝ երիտասարդների։ Ներկայացման էներգետիկան այնպիսին է, որ անկախ դերից՝ հաճույք ես ստանում բեմում լինելուց»։ Նա ընդգծում է, որ փորձերը անցել են թեթև ու ստեղծագործ մթնոլորտում. «Բոլորը շատ էին ուզում խաղալ այս ներկայացումը, և այդ ոգևորությունը փոխանցվում էր փորձերի ժամանակ։ Աշխատել ենք շատ հանգիստ, սիրուն ու հումորով»։

«Սա ամենամեծ տրամպլինն է». Դավիթ Աբրահամյան

Դավիթ Աբրահամյանը ներկայացումը համարում է դերասանական լուրջ փորձություն. «Եթե կարողանում ես խաղալ այս ներկայացումը, հետագայում շատ բան ավելի հեշտ է դառնում։ Այստեղ մենք վայրկյանների ընթացքում փոխվում ենք, երգում ենք, պարում, անում ենք ամեն ինչ։ Սա դերասանի համար մեծ դպրոց է»։ Նա նաև ընդգծում է ներկայացման առանձնահատուկ կապը հանդիսատեսի հետ. «Հանդիսատեսի հետ ստեղծվում է յուրահատուկ քիմիա։ Սա այն ներկայացումն է, որտեղ մարդիկ իրենց էլ են տեսնում»։

«Երկու ժամով կտրվում ես իրականությունից». Ավետ Զոհրաբյան

Ավետ Զոհրաբյանի խոսքով՝ «Կառավարական համերգ»-ը հանդիսատեսին տալիս է հենց այն, ինչ այսօր շատերին է պետք. «Սա այն ներկայացումներից է, որը մարդկանց երկու ժամով կտրում է առօրյա խնդիրներից, ծիծաղ է պարգևում, լավ էներգիա ու նոր լիցքեր»։

Նա նշում է նաև, որ նոր սերնդի առջև մեծ պատասխանատվություն կա. «Մինչ մեզ այս ներկայացումը խաղացել են շատ հայտնի դերասաններ։ Մենք ուզում ենք, որ հանդիսատեսը սիրի նաև մեզնով և գա նորից ու նորից»։

«Կառավարական համերգը» տարիներ շարունակ եղել է Կամերային թատրոնի այցեքարտերից մեկը՝ միավորելով տարբեր սերունդների դերասանների։ Նոր բեմադրությունը ոչ միայն պահպանում է այդ ավանդույթը, այլև տալիս է նոր շունչ և նոր բացահայտումներ։

Ներկայացման պրեմիերայից առաջ դերասանների հուզմունքը նույնն է՝ արդարացնել հանդիսատեսի սպասումները և շարունակել այն պատմությունը, որը սկսվել է տարիներ առաջ։

Հ.Գ. Ներկայացման պրեմիերային ներկա էր նաև Հրանտ Թոխատյանը, վերջում, երբ մոտեցավ դստերը շնորհավորելու, ծաղիկներ նվիրեց, Լիլիթը չկարողացավ զսպել հուզմունքը:

 

Լուսանկարները՝ Աքսաննա Ոսկանյանի

Հետևեք մեզ՝ այստեղ