Գիտնականները զգուշացնում են. նույնիսկ գերվերամշակված մթերքի փոքր քանակությունը վատթարացնում է ուշադրության կենտրոնացումը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին            

Գիտնականների նոր հետազոտությունը ցույց է տվել, որ սննդակարգում գերվերամշակված մթերքի քանակի նույնիսկ չնչին ավելացումը կարող է վատթարացնել կենտրոնանալու ունակությունը և մեծացնել դեմենցիայի ռիսկի գործոնները։

Աշխատությունը հրապարակվել է Alzheimer's & Dementia: Diagnosis, Assessment & Disease Monitoring ամսագրում։ Հետազոտությունն ընդգրկել է միջին և ավագ տարիքի ավելի քան 2100 ավստրալացու, որոնք դիտարկման պահին դեմենցիա չեն ունեցել։

Գիտնականները վերլուծել են մասնակիցների սնունդը և այն համադրել կոգնիտիվ թեստերի արդյունքների հետ։ Պարզվել է, որ գերվերամշակված սննդի մասնաբաժնի նույնիսկ համեմատաբար փոքր ավելացումը կապված է ուշադրության և տեղեկատվության մշակման արագության զգալի նվազման հետ։

Ըստ աշխատության առաջատար հեղինակ, դոկտոր Բարբարա Կարդոզուի, նման սննդի մասնաբաժնի ավելացումն ընդամենը 10%-ով մոտավորապես համապատասխանում է օրական սննդակարգին մեկ ստանդարտ տուփ չիպս ավելացնելուն։

Հետազոտողները հայտնաբերել են, որ յուրաքանչյուր նման ավելացման դեպքում ուշադրության կենտրոնացման ցուցանիշները վատացել են։ Դա արտացոլվել է տեսողական ուշադրության և տեղեկատվության մշակման արագության թեստերի ավելի ցածր արդյունքներում։

Հետազոտության միջին վիճակագրական մասնակիցն իր օրական էներգիայի մոտ 41%-ը ստացել է գերվերամշակված մթերքներից. գրեթե այնքան, որքան միջինում սպառում են Ավստրալիայի բնակիչները։ Այս կատեգորիային են դասվում քաղցր գազավորված ըմպելիքները, փաթեթավորված սնեքները, կիսաֆաբրիկատները, պատրաստի կերակրատեսակները և արդյունաբերական արտադրության բազմաթիվ այլ մթերքներ։

Հետազոտողների ուշադրությունը հատկապես գրավել է այն փաստը, որ բացասական ազդեցությունը նկատվել է նույնիսկ ընդհանուր առմամբ առողջ սնվող մարդկանց մոտ, ներառյալ՝ միջերկրածովյան սննդակարգին հետևողներին։ Սա մատնանշում է, որ կարևոր դեր է խաղում ոչ միայն սննդի բաղադրությունը, այլև դրա արդյունաբերական վերամշակման աստիճանը։

Հեղինակները բացատրում են, որ խորը վերամշակման ժամանակ մթերքները կորցնում են բնական կառուցվածքը, ինչպես նաև կարող են պարունակել արհեստական հավելումներ և քիմիական նյութեր, որոնք առաջանում են արտադրության ընթացքում։ Հավանաբար հենց այս փոփոխություններն են ազդում ուղեղի աշխատանքի վրա։

Թեև հետազոտությունը ուղղակի կապ չի հայտնաբերել գերվերամշակված սննդի և հիշողության վատթարացման միջև, գիտնականներն ընդգծում են՝ ուշադրությունը ուղեղի բազային ֆունկցիան է, որն անհրաժեշտ է սովորելու, որոշումներ կայացնելու և բարդ խնդիրներ լուծելու համար։

Բացի այդ, գերվերամշակված մթերքների սպառման բարձր մակարդակը կապված է եղել դեմենցիայի ռիսկի գործոնների ավելացման հետ՝ նախևառաջ ճարպակալման և բարձր զարկերակային ճնշման։

Հետազոտողները կարծում են, որ արդյունքները ևս մեկ անգամ փաստում են սննդակարգում արդյունաբերական վերամշակման ենթարկված սննդի մասնաբաժնի կրճատման կարևորությունը, հատկապես միջին և ավագ տարիքում։

Հետևեք մեզ՝ այստեղ