Խոցելիության նոր ճակատ. ինչպես է Հորմուզի նեղուցը կապված համաշխարհային թվային տնտեսության հետ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Հորմուզի նեղուցը ոչ միայն նավթի տեղափոխման առանցքային երթուղի է, այլև համաշխարհային ինտերնետային ենթակառուցվածքի կարևոր հանգույց։ Այս տարածաշրջանով անցնում են տասնյակ ստորջրյա օպտիկամանրաթելային մալուխներ, որոնք կապում են Ասիան, Եվրոպան և Արևմտյան Ասիան, գրել է իրանական Fars գործակալությունը։

Դրանք ապահովում են տվյալների փոխանցումը, ամպային ծառայությունների, բանկային գործարքների և միջազգային հաղորդակցությունների աշխատանքը։ Այս գծերից որևէ մեկի վնասումը կարող է առաջացնել ինտերնետի և թվային տնտեսության մասշտաբային խափանումներ։

Վերջին օրերին այս թեման ակտիվորեն քննարկվում է միջազգային լրատվամիջոցներում և վերլուծական կենտրոններում։

Հնդկական պարբերականներն ընդգծել են, որ երկրի ինտերնետային թրաֆիկի զգալի մասն անցնում է Պարսից ծոցի և Հորմուզի նեղուցի շրջանում գտնվող երթուղիներով։

Այդ մալուխները փոխանցում են Եվրոպայի, Պարսից ծոցի երկրների և Ասիայի միջև համաշխարհային ինտերնետային ու ֆինանսական թրաֆիկի մոտ 15–20 տոկոսը։

Իրանը կարող է պահանջ մտցնել, ըստ որի՝ մալուխային ենթակառուցվածքը կառավարող օտարերկրյա ընկերությունները պարտավոր կլինեն թույլտվություններ ստանալ, վճարել տուրքեր և պահպանել Իրանի օրենսդրությունը, ընդգծել է Fars-ը։

Նրանց գնահատմամբ՝ մալուխների հնարավոր վնասումը կարող է խաթարել առցանց ծառայությունների, թվային բանկինգի և հեռահաղորդակցության աշխատանքը։ Նշվել է, որ AAE-1 և Falcon-ի նման մայրուղային գծերն առանցքային դեր են խաղում Հնդկաստանը Եվրոպայի և Արևմտյան Ասիայի հետ կապելու գործում, և դրանց խափանումը կազդի ոչ միայն տարածաշրջանի, այլև համաշխարհային թվային գործընթացների վրա։

Ռուսական և ասիական լրատվամիջոցներն ուշադրություն են հրավիրել թվային ենթակառուցվածքի աշխարհաքաղաքական խոցելիության վրա։ Մասնավորապես, ընդգծվել է, որ մի քանի խոշոր ինտերնետային մալուխներ անցնում են Հորմուզի նեղուցով, և դրանց վնասումը կարող է կաթվածահար անել բանկային գործարքները, ամպային ծառայությունները և մայրցամաքների միջև կապը։ Որոշ վերլուծաբաններ սա դիտարկում են որպես ռազմավարական խոցելիության նոր տեսակ, երբ տվյալների ենթակառուցվածքը դառնում է ճնշման գործիք միջազգային հակամարտություններում։

Արևմտյան վերլուծական կենտրոններն ու լրատվամիջոցները նույնպես նախազգուշացրել են համաշխարհային ինտերնետային համակարգի փխրունության մասին։ Ընդգծվել է, որ համաշխարհային ինտերնետային թրաֆիկի շուրջ 99 տոկոսն անցնում է ստորջրյա մալուխներով, և դրանց նորոգումը չափազանց բարդ ու թանկ է։ Հորմուզի շրջանում ցանկացած միջադեպ կարող է ազդել ամպային ծառայությունների, թվային տնտեսության և միջազգային կապի վրա։

Հետևեք մեզ՝ այստեղ