Աղմկահարույց ձայնագրությունն ու իշխանության քար լռությունը․ ի՞նչ են փորձում թաքցնել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Հայաստանում ընտրություններից առաջ ձևավորված քաղաքական մթնոլորտը գնալով ավելի լարված և անհավասար է դառնում։ Թեև իշխանությունները շարունակաբար հայտարարում են «ժողովրդավարության», «ազատ ընտրությունների» և «օրինականության» մասին, իրականության մեջ ավելի հաճախ են ի հայտ գալիս ընտրովի արդարադատության մասին մտահոգություններ։

Արդեն մի քանի օր է, ինչ Հայաստանի նախկին ՄԻՊ Արման Թաթոյանը հրապարակել է Արմավիրի մարզի կրթական հաստատություններից մեկում արձանագրված ենթադրյալ իրավախախտման վերաբերյալ ձայնագրություն, որտեղ խոսվում է մարդկանց հանրահավաքի մասնակցության հարկադրելու մասին։ Ձայնագրությունը լուրջ հարցեր է առաջացրել ոչ միայն քաղաքական, այլև իրավական հարթությունում։ Խոսքը վերաբերում է ընտրական գործընթացների վրա հնարավոր ազդեցությանը, վարչական ռեսուրսի կիրառման և քաղաքացիների ազատ կամարտահայտման սահմանափակման վտանգներին։

Սակայն առավել ուշագրավը ոչ թե բուն հրապարակումն է, այլ դրան հաջորդած արձագանքի բացակայությունը։ Առայժմ տեղեկություններ չկան որևէ քրեական վարույթի, պաշտոնական պարզաբանման կամ իրավապահների օպերատիվ գործողությունների մասին։ Հանրությունը չի տեսնում այն արագ և ցուցադրական ակտիվությունը, որը նախկինում բազմիցս արձանագրվել է ընդդիմադիր շրջանակների վերաբերյալ դեպքերում։

Այս իրավիճակում բնականաբար առաջանում է հարց՝ արդյո՞ք Հայաստանում օրենքը կիրառվում է բոլորի նկատմամբ հավասար սկզբունքով։ Քաղաքական դիտորդների մի մասի համոզմամբ՝ եթե նմանատիպ պատմության մեջ ներգրավված լիներ որևէ ընդդիմադիր ուժ, հատկապես իշխանության հիմնական մրցակիցներից մեկը, ապա պետական ամբողջ համակարգն արդեն ակտիվ փուլում կլիներ՝ ուղեկցվելով աղմկոտ հայտարարություններով, տեղեկատվական արշավներով և իրավապահ գործողություններով։

Հայաստանի հասարակությունը վերջին տարիներին բազմիցս ականատես է եղել, թե որքան արագ կարող են նախաձեռնվել քրեական վարույթներ և տեղեկատվական արշավներ, երբ խոսքը վերաբերում է ընդդիմադիր շրջանակներին։ Այդ ֆոնին ներկայիս լռությունը շատերի համար արդեն ոչ միայն տարօրինակ, այլ նաև քաղաքականապես խոսուն է թվում։

Ընտրություններից առաջ նման իրավիճակները վտանգավոր են նաև այն պատճառով, որ հասարակության մեջ ձևավորում են ընկալում, թե երկրում գործում է ոչ թե հավասար մրցակցություն, այլ տարբեր քաղաքական բևեռների համար տարբեր մոտեցումներով իրավական համակարգ։ Նույն գործողությունը մի դեպքում կարող է ներկայացվել որպես ծանր խախտում, իսկ մեկ այլ դեպքում պարզապես անտեսվել։

Past.am-ի դիտարկմամբ՝ սա արդեն դուրս է զուտ քաղաքական դաշտից և վերաբերում է պետական ինստիտուտների նկատմամբ վստահության խնդրին։ Երբ քաղաքացին սկսում է կասկածել օրենքի հավասար կիրառմանը, վտանգվում է արդարության համակարգի նկատմամբ հանրային վստահությունը։ Իսկ ամենաուշագրավն այն է, որ իշխանությունը, որը տարիներ առաջ խոստանում էր վերականգնել արդարությունն ու հավասարությունը, այսօր ավելի հաճախ է քննադատվում երկակի ստանդարտների և ընտրովի մոտեցումների համար։

Եթե ընտրություններից առաջ հրապարակված նման աղմկահարույց նյութերը չեն ստանում իրավական գնահատական և հստակ արձագանք, ապա հասարակությունն ունի լիարժեք իրավունք հարցնելու՝ ինչպե՞ս են ապահովվելու ազատ, թափանցիկ և հավասար մրցակցային ընտրություններ։ Ի վերջո, ժողովրդավարության իրական չափանիշը ոչ թե հայտարարություններն են, այլ այն, թե որքան հավասար է օրենքը բոլորի համար, այդ թվում՝ հենց իշխանության ներկայացուցիչների նկատմամբ։

Մանրամասները՝ «Փաստ» օրաթերթի այսօրվա համարում

Հետևեք մեզ՝ այստեղ