Տրանսպորտային հեղափոխությո՞ւն Երևանում․ շրջանառվում են խոշոր նախագծերի մանրամասներ

«Ուժեղ Հայաստան» դաշինքի առաջնորդ Սամվել Կարապետյանը, գտնվելով տնային կալանքի պայմաններում, շարունակում է ակտիվ քաղաքական և ծրագրային գործունեությունը։ Մեր տեղեկություններով՝ վերջին շաբաթների ընթացքում նրա տանը պարբերաբար կազմակերպվում են հանդիպումներ ոչ միայն կուսակցության անդամների ու համակիրների, այլև տարբեր ոլորտների մասնագետների մասնակցությամբ։

Աղբյուրների փոխանցմամբ՝ Կարապետյանն այժմ կենտրոնացած է մի շարք խոշոր ենթակառուցվածքային և քաղաքաշինական նախագծերի մշակման վրա։ Մասնավորապես, նա հայաստանյան և արտասահմանյան տրանսպորտային ուրբանիստիկայի մասնագետների հետ աշխատում է Երևանի և հարակից բնակավայրերի տրանսպորտային համակարգի արմատական բարեփոխումների ծրագրի վրա։

Past.am-ի տեղեկություններով՝ վերջին օրերին Կարապետյանի հրավերով Երևան են ժամանել տրանսպորտային նախագծերով զբաղվող մի շարք օտարերկրյա հեղինակավոր ընկերությունների ներկայացուցիչներ։ Նրանց դեռ ամիսներ առաջ առաջարկվել էր մշակել հայեցակարգային նախագիծ՝ ուղղված մայրաքաղաքի երթևեկության բեռնաթափմանը և ժամանակակից տրանսպորտային համակարգի ձևավորմանը։

Ըստ շրջանառվող տեղեկությունների՝ Կարապետյանի հետ առնչվող ընկերությունները նախկինում արդեն մասնակցել են նմանատիպ նախագծերի իրականացմանը աշխարհի տարբեր երկրներում, ինչը, ըստ աղբյուրների, հիմք է տալիս ավելի լայնածավալ ծրագրերի մշակման համար։

Նախնական ուսումնասիրությունների արդյունքները, որոնք իրականացվել են հայ և օտարերկրյա մասնագետների կողմից, գնահատվում են բավական խոստումնալից։ Քննարկվող ծրագրերից մեկը վերաբերում է Երևանի շուրջ շրջանաձև ավտոմայրուղու կառուցմանը՝ այնպիսի խոշոր քաղաքների օրինակով, ինչպիսիք են Լոնդոնը, Փարիզը, Բեռլինը, Տոկիոն ու Մոսկվան։

Հայեցակարգով նախատեսվում է նաև փուլային անցում էկոլոգիապես մաքուր տրանսպորտի։ Մասնավորապես, քննարկվում է մի քանի տարվա ընթացքում Երևանում արտաքին այրման շարժիչներով աշխատող հասարակական տրանսպորտի փոխարինումը էլեկտրոբուսներով։ Բացի այդ, նախագծում ներառված է Երևանը մարզկենտրոններին կապող ժամանակակից երկաթուղային և ավտոբուսային ցանցի ձևավորումը, ինչպես նաև նոր ավտոկայանների կառուցումը։

Ծրագրի կարևոր ուղղություններից մեկը վերաբերում է նաև Երևանի մետրոպոլիտենի ընդլայնմանը։ Ըստ քննարկվող տարբերակների՝ նախատեսվում է կառուցել 9 նոր կայարան և 2 նոր ճյուղավորում՝ դեպի Աջափնյակ, Դավթաշեն, Մալաթիա-Սեբաստիա, Էրեբունի, Նոր Նորք, Ավան և Քանաքեռ-Զեյթուն վարչական շրջաններ, ինչպես նաև առանձին գիծ դեպի Զվարթնոց միջազգային օդանավակայան։

Ըստ նախնական հաշվարկների՝ նախագծի իրականացումը չի ազդելու հասարակական տրանսպորտի սակագների վրա։ Քննարկումների փուլում է նաև թոշակառուների, ուսանողների և դպրոցականների համար արտոնյալ կամ անվճար երթևեկության տարբերակների ներդրումը։

Past.am-ը փորձել է լրացուցիչ մեկնաբանություններ ստանալ «Ուժեղ Հայաստան» կուսակցության մամուլի ներկայացուցիչներից, սակայն նրանք հրաժարվել են մանրամասնել օտարերկրյա մասնագետների ներգրավման վերաբերյալ տեղեկությունները՝ միայն նշելով, որ Սամվել Կարապետյանը շարունակում է ամենօրյա ձևաչափով հանդիպումներ անցկացնել տարբեր ոլորտների մասնագետների հետ։