Կառավարության աջակցությունը՝ միրգ վաճառողներին․ ծիրանի 1կգ-ի համար՝ 200 դ․

ECONOMICS 11 June, 2026 12:57

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ծիրանի, սալորի, բալի, հանքային ջրի, գինու և կոնյակի արտահանողները ՀՀ կառավարությունից սուբսիդիա կստանան՝ արտահանման շուկաների դիվերսիֆիկացման նպատակով։ Համապատասխան որոշումն ընդունվել է կառավարության հինգշաբթի օրվա նիստում։

Ավելի վաղ նման աջակցություն նախատեսվել էր նաև ջերմոցային լոլիկի, պղպեղի, ելակի և ծաղիկների արտահանողների համար։

Որոշումը ներկայացնելիս էկոնոմիկայի փոխնախարար Արման Խոջոյանը տեղեկացրեց, որ սուբսիդիաները կտրամադրվեն հունիս ամսվա ընթացքում իրականացված արտահանման համար։ Մասնավորապես՝ ծիրանի յուրաքանչյուր կիլոգրամի դիմաց կտրամադրվի 200 դրամ, սալորի, դեղձի և նեկտարինի համար՝ 250 դրամ, բալի համար՝ 400 դրամ, հանքային ջրի յուրաքանչյուր լիտրի համար՝ 150 դրամ, գինու յուրաքանչյուր լիտրի համար՝ 350 դրամ, իսկ 100 տոկոսանոց սպիրտի յուրաքանչյուր լիտրի համար՝ 830 դրամ։ Սա նշանակում է, որ 40 տոկոս թնդությամբ կոնյակի մեկ լիտրի համար աջակցությունը կկազմի ավելի քան 2000 դրամ։

Աջակցությունից օգտվելու համար ընկերությունները պետք է ներկայացնեն արտահանումը հավաստող հաշիվ-ապրանքագրեր։

Խոջոյանի խոսքով՝ հունիսի սկզբից Հայաստանից արդեն արտահանվել է 257 տոննա բալ և 64,9 տոննա ծիրան։ Նա նաև նշել է, որ այս տարի հիմնական կորիզավոր մրգերի բերքահավաքը կսկսվի սովորականից ավելի ուշ՝ հունիսի 15-ին՝ մայիսի վերջին օրերի փոխարեն։

Հունիսի 1-ից արտահանվել է նաև շուրջ 961 հազար հատ ծաղիկ։ Արտադրանքն ուղարկվել է Արաբական Միացյալ Էմիրություններ, Ռումինիա, Բուլղարիա, Լատվիա, Կիպրոս և Նիդեռլանդներ։ Փոխնախարարի խոսքով՝ նոր առաքումները կնպաստեն արտասահմանյան գործընկերների հետ նոր գործարար կապերի ձևավորմանը։

Նա տեղեկացրել է նաև, որ հայկական ընկերություններից մեկն արդեն գրանցվել է Նիդեռլանդներում գործող Royal FloraHolland ծաղկի աճուրդային հարթակում, որը վերջերս հնարավորություն է ստեղծել նաև հայկական ընկերությունների մասնակցության համար։

Իր հերթին վարչապետ Նիկոլ Փաշինյանը հայտնել է, որ Նիդեռլանդների վարչապետ Ռոբ Ջեթենը խոստացել է հատուկ ուշադրություն և աջակցություն ցուցաբերել հայկական ընկերություններին։

«Ութ տարի շարունակ մենք կոչ ենք արել բիզնեսին իր արտադրանքը համապատասխանեցնել միջազգային որակի չափանիշներին։ Նրանք, ովքեր դա ժամանակին արել են, այսօր էական խնդիրներ չպետք է ունենան», – նշել է վարչապետը։

Փաշինյանի խոսքով՝ արտահանման լոգիստիկան որոշ չափով պարզեցվել է Ախալքալաք-Կարս երկաթուղու հնարավորությունների օգտագործման շնորհիվ։

Վարչապետը նաև հանձնարարել է աջակցել մեծածախ գնումների և լոգիստիկ կենտրոնների ստեղծմանը, ինչը հնարավորություն կտա արտասահմանյան գնորդների համար ձևավորել ավելի խոշոր ապրանքային խմբաքանակներ։

Հիշեցնենք, որ մայիսի 15-ին «Ռոսսելխոզնադզորը» հայտարարեց մի շարք հայկական ընկերությունների ստուգումներ իրականացնելու մտադրության մասին։ Խոսքը վերաբերում էր այն ձեռնարկություններին, որոնց արտադրանքի մատակարարումները Ռուսաստան նախկինում կասեցվել էին՝ եվրոպական ծագման հնարավոր կեղծ ձկնամթերքի ներմուծման կասկածների պատճառով։

Մայիսի 22-ին ռուսական կողմը սահմանափակումներ մտցրեց նաև հայկական ծաղիկների ներմուծման նկատմամբ։ Հետագայում Հայաստանի սննդամթերքի անվտանգության տեսչական մարմնի հետ համատեղ իրականացված ստուգումների արդյունքում երկու ընկերությունների նկատմամբ սահմանված սահմանափակումները հանվեցին, իսկ մյուսների վերաբերյալ ուսումնասիրությունները շարունակվում են։

Մայիսի 30-ին «Ռոսսելխոզնադզորը» ժամանակավոր սահմանափակումներ կիրառեց Հայաստանից Ռուսաստան թարմ լոլիկի, վարունգի, պղպեղի, կանաչեղենի և ելակի ներմուծման նկատմամբ՝ դա հիմնավորելով բուսասանիտարական անվտանգության պահանջներով և արձանագրված խախտումների աճով։

Հունիսի 2-ից սահմանափակումներ կիրառվեցին նաև կորիզավոր մրգերի՝ բալի, կեռասի, ծիրանի, սալորի, դեղձի, նեկտարինի և խաղողի ներմուծման նկատմամբ, իսկ հունիսի 3-ից՝ խնձորի, տանձի, սմբուկի, կարտոֆիլի և չրերի։

Նշենք, որ Հայաստանի գյուղատնտեսական արտահանման ավելի քան 90 տոկոսը բաժին է ընկնում ռուսական շուկային։

Հետևեք մեզ՝ այստեղ