«Ոսկե ծիրան» միջազգային կինոփառատոնը ներկայացնում է միջազգային համագործակցության լայնածավալ ծրագրեր

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Երևանի «Ոսկե ծիրան» միջազգային կինոփառատոնը շարունակում է սերտ համագործակցությունը ՀՀ-ում գործող արտասահմանյան դեսպանությունների, մշակութային ինստիտուտների և միջազգային կազմակերպությունների հետ՝ համատեղ ձևավորելով կինոյի միջոցով մշակութային երկխոսության և համագործակցության հարթակ։ Այս մասին փառատոնի ներկայացուցիչները հայտարարեցին հուլիսի 8-ին կայացած մամուլի ասուլիսի ընթացքում։

Նշվեց, որ այս տարվա՝ 23-րդ «Ոսկե ծիրան» միջազգային կինոփառատոնի ծրագրում առանձնահատուկ տեղ են զբաղեցնում Ֆրանսիայի, Կանադայի և Գերմանիայի հետ համագործակցությամբ իրականացվող կինոծրագրերը, որոնք հանդիսատեսին կներկայացնեն հեղինակային կինոյի լավագույն նմուշները, իսկ Երևան կբերեն միջազգային կինոաշխարհի ճանաչված ռեժիսորների, դերասանների, կինոօպերատորների, ոլորտի առաջատար մասնագետների։ Ֆրանսիական ծրագիրը կբացվի Անտոնեն Բոդրիի «Դը Գոլի մարտը» ֆիլմի երևանյան պրեմիերայով։

Ծրագրում ընդգրկված են նաև Թամարա Ստեփանյանի «Արտոյի երկիրը» ֆիլմը, Ժան-Պիեռ Ժյոնեի հանրահայտ «Ամելին», Արթուր Հարարիի «Անծանոթուհին», Սերուժ Հովսեփյանի «Մեկուսի երկխոսությունները», որը կմրցի «Կորիզ» միջազգային մրցութային ծրագրում, Էմիլ Փարսեղյանի «Նրանց համար» ֆիլմը՝ «Կորիզ» մրցույթում, Ժասմին Ռազարյանի «Պարտէզը որ քեզ երազեց»՝ «Երևանյան պրեմիերաներ» ծրագրում, ինչպես նաև Լիլիթ Գրասմուգի «Ձեզնից ոմանք պառկել են Իվայի հետ» վավերագրական ֆիլմը, որը կներկայացվի Doc Alliance հատուկ ծրագրում։

Ֆրանսիական ծրագրի շրջանակում Երևան կժամանեն բազմաթիվ հեղինակավոր հյուրեր։ Փառատոնի հատուկ հյուրն է դերասան Սիմոն Աբգարյանը։ Փառատոնին կմասնակցեն նաև ֆիլմի ռեժիսոր Անտոնեն Բոդրին, «Արտոյի երկիրը» ֆիլմի ռեժիսոր Թամարա Ստեփանյանը, աշխարհահռչակ կինոօպերատոր Բրունո Դելբոնելը, որը GAIFF Pro մասնագիտական հարթակի շրջանակում կանցկացնի վարպետության դաս, տարածաշրջանային ժյուրիի անդամ Դոմինիկ Վելինսկին և ռեժիսոր Էմիլ Փարսեղյանը։

Կանադայի դեսպանության հետ համագործակցության շրջանակում փառատոնի տարբեր մրցութային ծրագրերում կներկայացվեն ժամանակակից կանադական կինոյի մի շարք նշանակալի աշխատանքներ։

Միջազգային մրցույթում ընդգրկված է Հյուբեր Կարոն-Գուայի «Սահմանների մեխանիկան» ֆիլմը, տարածաշրջանային մրցույթում՝ Սանազ Սոհրաբիի «Անավարտ օրացույցը», Մարլեն Էդոյանի «Այնտեղ կրակ կա» և Գիլդա Փուրջաբարի « Արևմտամետները» ֆիլմերը։

Գյոթե ինստիտուտ Հայաստանի հետ համագործակցությամբ գերմանական ծրագիրը ևս ներկայացնում է ժամանակակից եվրոպական կինոյի բազմազանությունը։ Ծրագրի բացումը տեղի կունենա Վալեսկա Գրիզեբախի «Երազված արկածը» ֆիլմով։ Միջազգային լիամետրաժ մրցույթում կներկայացվի Յոշա Բոնգարդի «Մանուկ աստղ» ֆիլմը, «Երևանյան պրեմիերաներ» ծրագրում՝ Պավել Պավլիկովսկու «Հայրենիք» և Աբոլֆազլ Սաֆարիի «Մայրուղու եղջերուն» ֆիլմերը, տարածաշրջանային մրցույթում՝ Ալեքսանդր Քոբերիձեի «Չորացած տերև» ֆիլմը, Doc Alliance հատուկ ծրագրում՝ Վիվ Լիի «Երկու լեռ է ծանրացել կրծքիս» և Շտեֆանի Շրյոդերի «Սառը զանգ» ֆիլմերը։ «Ծուռ Ծիրան» ծրագրում կցուցադրվի Կարիմ Այնուզի «Վարդաթփերի էտումը» ֆիլմը, իսկ Ջեսիկա Հաուսների «Հյուրանոց» և «Սիրելի Ռիտա» ֆիլմերը կընդգրկվեն փառատոնի հատուկ ցուցադրություններում։

Գերմանիայից փառատոնը կհյուրընկալի նաև կինոոլորտի հեղինակավոր ներկայացուցիչների։ Ժյուրիի կազմում կընդգրկվի Բեռլինի միջազգային կինոփառատոնի նախկին գլխավոր ծրագրավորողներից Մարկ Պերսոնը։ Երևան կժամանի նաև Բեռլինի Մաքսիմ Գորկու թատրոնի երկարամյա գեղարվեստական ղեկավար Շերմին Լանգհոֆը, որը մեծ ներդրում է ունեցել Գերմանիայում հայկական արվեստի ճանաչման գործում։

Փառատոնի հյուրերի թվում են նաև ռեժիսորներ Յենս Գայգերը, Նորիկ Քեշիշյանը և Տոբիաս
Նյոլեն, ինչպես նաև DOK Leipzig միջազգային կինոփառատոնի DOK Industry հարթակի ղեկավար Նադյա Թենշտեդտը։ «Ոսկե ծիրան» միջազգային կինոփառատոնը տարիներ շարունակ հանդիսանում է մշակութային դիվանագիտության կարևոր հարթակ՝ ամրապնդելով Հայաստանի կապերը աշխարհի առաջատար կինոկենտրոնների հետ։ Ֆրանսիայի, Կանադայի և Գերմանիայի հետ այս տարվա համագործակցային ծրագրերը ևս մեկ անգամ ընդգծում են փառատոնի միջազգային հեղինակությունը և նրա դերը համաշխարհային կինոհանրության միջև ստեղծագործական երկխոսության և նոր գործընկերությունների ձևավորման գործում։

Հետևեք մեզ՝ այստեղ