Ինչպես է շոգը թելադրում մենյուն. Ֆրանսիայում կտրուկ նվազել են սուրճի, շոկոլադի և նրբերշիկների վաճառքները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ֆրանսիայում ուժեղ շոգը զգալիորեն ազդել է սպառողական վարքագծի վրա․ որոշ ապրանքների պահանջարկը աճել է, մինչդեռ մյուսների վաճառքները կտրուկ նվազել են։ Հունիսի 22-ից 28-ն ընկած շաբաթը, երբ երկիրը տարվա ընթացքում վերապրում էր շոգի երկրորդ ալիքը, ցույց տվեց գնումների կառուցվածքի էական փոփոխություններ, հայտնում է Le Figaro-ն։

NielsenIQ վերլուծական ընկերության տվյալներով, ամենաշատը շահել են հովացման և շոգի դեմ պայքարի հետ կապված կատեգորիաները՝ աճել են պաղպաղակի, օդափոխիչների, արևապաշտպան միջոցների, ջրի և սառը ըմպելիքների վաճառքները։

Միևնույն ժամանակ շատ ավանդական մթերքներ դարձել են պակաս պահանջված։ Վաճառքի ծավալով ամենից նկատելի անկում գրանցած ապրանքների առաջին տասնյակում հայտնվել են այն մթերքները, որոնք սովորաբար այնքան էլ հարմար չեն շոգ եղանակի համար։ Ապուրների վաճառքը նվազել է 16%-ով, թեյինը՝ 12%-ով, իսկ սուրճինը՝ 11%-ով։

Ֆրանսիացիները նաև ավելի հազվադեպ են սկսել գնել քաղցրավենիք․ շաքարի վաճառքը կրճատվել է 20%-ով, շոկոլադե սալիկներինը՝ 20%-ով, իսկ շոկոլադե մածուկներինը՝ 11%-ով։ Շոկոլադի դեպքում նվազումը կապված էր ոչ միայն պահանջարկի անկման հետ․ որոշ առևտրային ցանցեր բարձր ջերմաստիճանի պայմաններում վնասվելու ռիսկի պատճառով ժամանակավորապես դադարեցրել էին այդ ապրանքների առաքումը։

Շոգը հարվածել է նաև այլ կատեգորիաների։ Circana-ի տվյալներով, շաբաթվա ընթացքում քաղցր մթերքների վաճառքներն ընդհանուր առմամբ նվազել են 12,2%-ով։ Հատկապես նկատելի է եղել կոնֆետների (-19%) և աղանդերների (-14,2%) վաճառքների անկումը։

Որոշ ալկոհոլային խմիչքներ նույնպես կորցրել են իրենց ժողովրդականությունը․ բացառությամբ վիսկիի, թունդ խմիչքների վաճառքները նվազել են 25,5%-ով, իսկ լիկյորային գինիներինը՝ 30,6%-ով։ Ֆրանսիացիները նաև սկսել են ավելի քիչ գնել պատրաստում պահանջող մթերքներ․ դրանց վաճառքները նվազել են 18%-ով, քանի որ շոգին սպառողներն ավելի հաճախ ընտրել են սառը ուտեստներ, ինչպիսիք են աղցանները, թաբուլեն և գասպաչոն։

Անակնկալ կերպով վաճառքների անկում գրանցած ապրանքների ցանկում հայտնվել են անգամ բարբեքյուի համար նախատեսված ապրանքները։ Վառման միջոցների վաճառքները նվազել են 30%-ով, իսկ նրբերշիկներինը՝ 12%-ով։

Մանրածախ առևտրի փորձագետ Օլիվիե Դովերը դա բացատրել է նրանով, որ որոշ ամառային ապրանքների պահանջարկն աճում է միայն մինչև ջերմաստիճանի որոշակի մակարդակ։ «Բարբեքյուն, ինչպես և գարեջուրը, սպառվում է այնքան ավելի շատ, որքան բարձր է ջերմաստիճանը, սակայն որոշակի շեմից հետո յուրաքանչյուր հավելյալ աստիճան սկսում է հակառակ ազդեցություն ունենալ։ Պետք է համարձակություն ունենալ, որպեսզի ստվերում 40 աստիճանի պայմաններում նրբերշիկ խորովես», — նշել է նա։

Հետևեք մեզ՝ այստեղ