Իտալիան ուժեղացնում է Իսպանիայից ժամանողների սահմանային հսկողությունը. ի՞նչ է փոխվում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իտալիան Սեուտայի ճգնաժամից հետո վերականգնել է ստուգումները Իսպանիայից ժամանողների համար։ Նավահանգիստներում և օդանավակայաններում փաստաթղթեր են ստուգվում ԵՄ-ին չանդամակցող երկրների քաղաքացիներից։

Սեուտայի միգրացիոն ճգնաժամը քաղաքական հակամարտություն է առաջացրել Իտալիայի և Իսպանիայի միջև։ Իսպանական անկլավ հազարավոր միգրանտների ժամանման մասին լուրերից հետո Ջորջա Մելոնիի կառավարությունը հայտարարեց Իսպանիայից ծովով և օդով ժամանողների սահմանային հսկողության ուժեղացման մասին։

Ուրբաթ օրը մի շարք լրատվամիջոցներ հայտնեցին, որ Հռոմը դադարեցնում է Շենգենյան համաձայնագրի գործողությունն Իսպանիայի նկատմամբ, քանի որ վարչապետ Մելոնին X-ի իր գրառման մեջ նշել էր, թե «կառավարությունը որոշել է ժամանակավորապես կասեցնել Շենգենով նախատեսված ազատ տեղաշարժի ռեժիմը Իսպանիայի հետ ծովային և օդային հաղորդակցությունում՝ կրկին մտցնելով սահմանային հսկողություն»։

Այուամենայնիվ, Շենգենյան համաձայնագիրն արդեն իսկ նախատեսում է հսկողության վերականգնման հնարավորություն «հասարակական կարգին կամ ներքին անվտանգությանը սպառնացող լուրջ վտանգի դեպքում»․ մեխանիզմ, որն Իտալիան արդեն ավելի քան մեկ տարի կիրառում է Սլովենիայի հետ սահմանին՝ երրորդ երկրների քաղաքացիների նկատմամբ։ Ներքին գործերի նախարար Մատեո Պիանտեդոզին այս միջոցը որակել է որպես «կարևոր, բայց կանխարգելիչ»։

Այսպիսով, Իտալիան Իսպանիայի հետ սահմանին վերսկսել է սահմանային հսկողությունը՝ որպես Շենգենյան կանոնների բացառություն, քանի որ ոչ մի երկիր չի կարող միակողմանիորեն մյուսին դուրս հանել ազատ տեղաշարժի գոտուց։

Ինչպես են գործում Իսպանիայից ժամանողների ստուգումները

Ավելի ուշ նախարար Պիանտեդոզին հստակեցրել է, որ խոսքը Իսպանիայի հետ ծովային և օդային սահմաններին մեկ ամիս ժամկետով հսկողության վերականգնման մասին է, և սա միջոցառում է, «որն ուղղված է նախևառաջ ստուգելու շենգենյան գոտում գտնվելու օրինականությունը ԵՄ-ին չանդամակցող երկրների քաղաքացիների համար»։

Շաբաթ օրը վաղ առավոտից ոստիկանությունն ընտրողական ստուգումներ է անցկացրել Հռոմի Ֆյումիչինո, ինչպես նաև Միլանի Մալպենսա և Լինատե օդանավակայաններում։ ԵՄ քաղաքացիների համար բավարար է եղել ներկայացնել անձը հաստատող փաստաթուղթ, մինչդեռ ոչ ԵՄ երկրների քաղաքացիները ստիպված են եղել ցույց տալ ոչ միայն անձը հաստատող փաստաթուղթ, այլև կացության վավեր թույլտվություն կամ վիզա։

Իտալիայից Իսպանիա մեկնող քաղաքացիների համար ոչինչ չի փոխվում. նրանք նախկինի պես կարող են ազատորեն մուտք գործել երկիր։

Հռոմի և Մադրիդի դիմակայությունը դուրս է գալիս ԵՄ մակարդակ

Ստուգումները վերականգնելու Հռոմի որոշումը խիստ արձագանք է առաջացրել Իսպանիայի իշխանությունների կողմից։ Վարչապետ Պեդրո Սանչեսը նամակ է հղել Եվրոպական խորհրդի նախագահ Անտոնիու Կոշտային և Եվրոպական հանձնաժողովի ղեկավար Ուրսուլա ֆոն դեր Լյայենին՝ խնդրելով Բրյուսելի միջամտությունը՝ Իսպանիային աջակցելու և միգրացիոն ճգնաժամը զսպելու ԵՄ երկրների ռազմավարությունները վերահամաձայնեցնելու համար։

Զուգահեռաբար, Իտալիայի վարչապետ Ջորջա Մելոնին և Դանիայի վարչապետ Մետե Ֆրեդերիկսենը եվրոպական իշխանություններին նամակ են հղել, որի տակ ստորագրել են նաև անդամ պետությունների ևս 22 առաջնորդներ՝ խնդրելով գումարել հանդիպում՝ անօրինական ներգաղթի դեմ հրատապ միջոցները քննարկելու համար։

Շաբաթ օրը կեսօրին ֆոն դեր Լյայենը սոցցանցերում գրել էր, որ բանակցություններ է վարել հանձնակատարներ Մագնուս Բրումների և Մարիբ Շույցայի հետ՝ քննարկելով Սեուտայի ճգնաժամը, և նշել, որ անկլավ անօրինական կերպով ժամանած միգրանտների մեծ մասն արդեն արտաքսվել է հայրենիք։

Եվրահանձնաժողովի ղեկավարն ավելացրել է, որ Մարոկկոյից ժամանած միգրանտներից ոչ ոք չի հասել ոչ Իսպանիայի մայրցամաքային մաս, ոչ էլ ԵՄ այլ երկրներ՝ ևս մեկ անգամ ընդգծելով Եվրոպայի դիմակայունությունն ամրապնդելու անհրաժեշտությունը, և հայտնել է իր պատրաստակամությունը՝ մասնակցելու եվրոպական առաջնորդների խնդրած տեսակոնֆերանսին։ Այն նախատեսված է առաջիկա երեքշաբթի օրը և կկազմակերպվի ԵՄ Խորհրդում նախագահող Իռլանդիայի վարչապետ Միխոլ Մարտինի կողմից։

Իրենց նամակում Մելոնին և Ֆրեդերիկսենը կոչ են արել համատեղ գործողությունների՝ «ամրապնդելու արտաքին սահմանները, հակազդելու անօրինական ներգաղթին, պայքարելու մարդկանց թրաֆիքինգով զբաղվողների դեմ, դարձնելու արտաքսումներն ավելի արդյունավետ և վերացնելու ցանկացած գործոն, որը կարող է խրախուսել նոր անօրինական մուտքերը»։

Հետևեք մեզ՝ այստեղ