Բժիշկները զգուշացնում են մալարիա տարածող վտանգավոր մոծակի տարածման մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մալարիա տարածող ինվազիվ Anopheles stephensi մոծակը, որն արդեն ցուցաբերել է դիմադրողականություն ներկայում կիրառվող բոլոր հայտնի միջատասպանների նկատմամբ, արագորեն տարածվում է Աֆրիկայում՝ լուրջ վտանգ ստեղծելով հատկապես խոշոր քաղաքների բնակչության համար։ Այդ մասին հայտնում է Past.am-ը՝ վկայակոչելով The New York Times-ը և Science գիտական ամսագրում հրապարակված նոր հետազոտությունը։

Գիտնականների գնահատմամբ՝ այս տեսակի տարածման արագությունը գերազանցել է անգամ ամենահոռետես կանխատեսումները։ Ի տարբերություն մալարիա փոխանցող բազմաթիվ այլ մոծակների՝ Anopheles stephensi-ն հեշտությամբ հարմարվում է ոչ միայն գյուղական, այլև խիտ բնակեցված քաղաքային միջավայրին, որտեղ մինչ այժմ մալարիայի տարածման վտանգը համեմատաբար ցածր էր գնահատվում։

Հետազոտության շրջանակում ուսումնասիրվել են Աֆրիկայի տասը երկրներից հավաքված մոծակների նմուշներ։ Վերլուծության արդյունքները ցույց են տվել, որ այս տեսակի աֆրիկյան պոպուլյացիաները գենետիկ մակարդակով դիմացկուն են ներկայում օգտագործվող բոլոր հիմնական միջատասպան միջոցների նկատմամբ, ինչը զգալիորեն բարդացնում է դրանց դեմ պայքարը։

Մի շարք մասնագետներ արդեն կարծում են, որ այս միջատի հետագա տարածումը կանգնեցնելը գործնականում անհնար է։ Հետազոտության գլխավոր հեղինակ, Քվինսլենդի համալսարանի գիտաշխատող Թրիստան Դենիսի խոսքով՝ այժմ մասնագետներն այլևս չեն քննարկում ներխուժումը զսպելու հնարավորությունը, քանի որ դրա համար արդեն չափազանց ուշ է։

Ըստ հրապարակման՝ Anopheles stephensi-ն նախ հայտնաբերվել է Ջիբութիում, այնուհետև արագ տարածվել դեպի արևմուտք՝ հասնելով Գանա, դեպի հարավ՝ Քենիա, ինչպես նաև ներթափանցել Եմեն։

Գիտնականները զգուշացնում են, որ եթե այս գործընթացը շարունակվի, լուրջ վտանգի տակ կարող են հայտնվել Աֆրիկայի բազմամարդ քաղաքները, այդ թվում՝ Նիգերիայի Լագոսը և Կոնգոյի Դեմոկրատական Հանրապետության մայրաքաղաք Կինշասան։

Քենիայի բժշկական հետազոտությունների ինստիտուտի միջատաբանության բաժնի ղեկավար Էրիկ Օչոմոն ընդգծել է, որ նախկինում մալարիան հիմնականում չէր դիտարկվում որպես քաղաքային խնդիր։ Նրա խոսքով՝ քաղաքների բնակիչների մեծ մասը հիվանդության նկատմամբ բավարար իմունիտետ չունի, իսկ այն փաստը, որ այս մոծակը կարող է վարակը փոխանցել տարվա գրեթե բոլոր եղանակներին, զգալիորեն մեծացնում է մալարիայի դեմ պայքարի բարդությունը։

Հետևեք մեզ՝ այստեղ