Վարչապետն այցելել է Հայաստանում Ֆրանսիայի դեսպանություն (ֆոտո)

Վարչապետ Հովիկ Աբրահամյանը Ֆրանսիայի Հանրապետության Ազգային տոնի առթիվ այսօր այցելել է Հայաստանի Հանրապետությունում Ֆրանսիայի Հանրապետության դեսպանություն: Վարչապետը ՀՀ կառավարության եւ անձամբ իր անունից շնորհավորել է դեսպան Ժան-Ֆրանսուա Շարպանտիեին, դեսպանության անձնակազմին եւ Ֆրանսիայի բարեկամ ժողովրդին՝ Ֆրանսիայի Ազգային տոնի առթիվ: Կառավարության ղեկավարը, մասնավորապես, նշել է. «Հպարտությամբ եմ նշում, որ մեր երկու երկրների միջեւ փոխադարձ վստահության վրա կերտված հարաբերություններն այսօր արդարացիորեն բնորոշվում են որպես առանձնաշնորհյալ, իսկ հայ եւ ֆրանսիացի ժողովուրդներն իրար հետ կապված են պատմամշակութային բազմադարյա կապերով: Մեր երկրների միջեւ այսօր առկա է բարձր մակարդակի քաղաքական երկխոսություն, որի վառ դրսեւորումն են հանդիսանում մեր Նախագահների միջեւ հաստատված ընդգրկուն երկխոսությունը եւ ինտենսիվ փոխշփումները: Հայ-ֆրանսիական օրինակելի համագործակցության հերթական ապացույցն էր նաեւ  վերջերս Ֆրանսիա կատարած իմ աշխատանքային այցը, որի ընթացքում մեր պատվիրակությունն արժանացավ ամենաջերմ ընդունելության, ինչի համար ցանկանում եմ վերստին անկեղծ  երախտագիտություն հայտնել Ֆրանսիայի վարչապետին եւ իշխանություններին:

Հայ-ֆրանսիական բազմաոլորտ օրակարգում առաջնային նշանակություն ունի առեւտրատնտեսական կապերի ընդլայնումը։ Շուրջ 23 տարվա դիվանագիտական հարաբերությունների ընթացքում  էլ ավելի են սերտացել միջխորհրդարանական կապերը, նշանակալիորեն ընդլայնվել է  ապակենտրոնացված համագործակցությունը Հայաստանի եւ Ֆրանսիայի վարչատարածքային միավորների միջեւ,  Լիոնում եւ  Մարսելում բացվել  են Հայաստանի գլխավոր հյուպատոսություններ, աշխույժ համագործակցություն է ծավալվում մշակութային եւ   գիտակրթական ոլորտներում,  երկու տարի առաջ Հայաստանում իր գործունեությունն է մեկնարկել Զարգացման ֆրանսիական գործակալությունը: Հայ-ֆրանսիական արդյունավետ համագործակցության  լավագույն հարթակներից է հանդիսանում նաեւ Ֆրանկոֆոնիան, որին Հայաստանն անդամակցում է արդեն երեք տարուց ի վեր:

Նշված  ձեռքբերումների մեջ, անկասկած, իրենց ծանրակշիռ ավանդն ունեն նաեւ ավելի քան երկու տասնամյակ Հայաստանում եւ Ֆրանսիայում գործող երկու երկրների դիվանագիտական ներկայացուցչությունները: Օգտվելով առիթից` ցանկանում եմ իմ շնորհակալությունը հայտնել Ձեզ, պարոն դեսպան, եւ Ֆրանսիայի դեսպանության անձնակազմին ձեր պատասխանատու առաքելության համար` միտված հայ-ֆրանսիական համագործակցության էլ ավելի  ընդլայնմանը:

Չեմ կարող չնշել նաեւ այն կարեւորությունը, որ հատկացնում է Հայաստանը  Ֆրանսիային` որպես ԵԱՀԿ Մինսկի խմբի համանախագահ երկրի եւ նրա ներգրավվածությունը Լեռնային Ղարաբաղի հակամարտության խաղաղ կարգավորման գործընթացին: Մենք  բարձր ենք գնահատում  Ֆրանսիայի կողմից ներդրվող հետեւողական ջանքերը`  ի նպաստ տարածաշրջանում խաղաղության եւ կայունության ամրապնդման:

Համոզված եմ, որ Հայաստանը եւ Ֆրանսիան միավորող կապերը կհարատեւեն` ի շահ մեր երկու ժողովուրդների բարօրության: Օգտվելով առիթից՝ ցանկանում եմ նաեւ շնորհավորել Ֆրանսիայում բնակվող մեր հայրենակիցներին, ովքեր ոչ միայն իրենց ներդրումն են ունենում Ֆրանսիայի Հանրապետության քաղաքական, տնտեսական եւ մշակութային կյանքում, այլեւ յուրովի կամուրջ են մեր բարեկամության ամրապնդման գործում:  Եզրափակելով խոսքս` մեկ անգամ եւս շնորհավորում եմ այս գեղեցիկ տոնի առթիվ` Ֆրանսիայի բարեկամ ժողովրդին մաղթելով խաղաղություն եւ բարեկեցություն, իսկ հայ-ֆրանսիական հարաբերություններին՝ նորանոր ձեռքբերումներ»: