Հայաստանի տարբեր մարզերում սոցիալական նոր բնակարաններ են կառուցվում. ո՞ւմ համար են դրանք

Հայաստանի սոցիալական բնակարանային ֆոնդը թարմացվում է. տարբեր մարզերում այս պահին 7 նոր շենքերի կառուցման կամ վերափոխման աշխատանքներ են ընթանում։ Sputnik Արմենիայի հետ զրույցում տեղեկությունը հայտնել է ՀՀ աշխատանքի և բարեկեցության նախարարի տեղակալ Լուսինե Քոչարյանը։

Նրա խոսքով՝ երկար ժամանակ Հայաստանի սոցիալական բնակարանների ֆոնդը ընդգրկել է ընդամենը 5 նախկին հանրակացաններ, որոնք որոշակիորեն վերափոխվել և հարմարեցվել էին։ Ընդհանուր առմամբ, խոսքը շուրջ 280 բնակարանների մասին է Երևանում և մարզերում, այդ թվում՝ Սպիտակում, Մարալիկում։

«Հիմա արդեն այն, ինչ մենք կառուցում ենք, կառուցում ենք նոր մոտեցումներով, օրինակ՝ ոչ միայն մեկ սենյականոց բնակարաններ են կառուցվում, այլև բազմանդամ ընտանիքների համար, հաշմանդամություն ունեցող անձանց համար հարմարեցված, ավելի հեշտ կառավարվող և համատեղ ժամանակ անցկացնելու միջանցքներ և այլն»,- նշել է Քոչարյանը։

Նրա խոսքով՝ նոր շենքերը կառուցվում են այնպես, որ շահառուներին հնարավոր լինի ավելի լավ պայմաններ առաջարկել։

Այս պահին շենքերը տարբեր փուլերում են՝ նախագծման, կառուցման և այլն։ Դրանց շինաշխատանքներն ավարտին հասցնելու արդյունքում ակնկալվում է սոցիալական բնակարանային ֆոնդը հասցնել շուրջ 700-ի։ Նախարարի տեղակալի խոսքով՝ մտադիր չեն դրանով սահմանափակվել. նպատակն է այդ թիվը հասցնել 1000-ի։

«Մենք շարունակում ենք նաև փնտրել նոր շենքեր։ Օրինակ, կան շենքեր, որոնք կիսակառույց են եղել կամ այլ նպատակով են ծառայել։ Մենք դիտարկում ենք դրանք վերափոխելու և սոցիալական բնակարան դարձնելու հնարավորությունը»,- նշել է Լուսինե Քոչարյանը։

Սոցիալական նոր բնակարանները կառուցվում են Գորիսում, Հրազդանում, Գավառում, Վանաձորում և այլն։

Նրա խոսքով՝ սոցիալական բնակարանների ոլորտում հիմա նոր կոնցեպտներ են ներդրվում, օրինակ` Գորիսում բնակելի շենքի վերին հարկում են բնակարաններ կառուցվում։ Պիլոտային մի ծրագիր էլ իրագործվում է Արտաշատում։ Շինարարությունն ընթացքի մեջ է, որտեղ բնակարանները տրամադրվելու են սիմվոլիկ վարձով՝ ամսական 8000 դրամով։

«Այստեղ հաջողելու դեպքում ծրագիրը շարունակական կլինի»,- նշել է Քոչարյանը։

Այս պահին առկա սոցիալական բնակֆոնդում մի քանի ազատ բնակարան կա Մարալիկում։ Փոխնախարարի խոսքով՝ այստեղ բնակարանները բավականին փոքր են, ինչի պատճառով մեծ ընտանիքներ չի հաջողվում տեղավորել։

Սոցիալական բնակարանների ծրագիրը կապվել է ընտանիքների անապահովության գնահատման ծրագրի հետ։

Սոցիալական բնակարան ստանալու համար ընտանիքը երրորդ մակարդակի անապահովություն ունենալուց բացի պետք է բավարարի հետևյալ պայմաններից որևէ մեկին` ունենա կենսաթոշակառու կամ հաշմանդամություն ունեցող անդամ, լինի բազմազավակ կամ երեխաները լինեն միակողմանի ծնողազուրկ։

Այս տարի իրավական ակտում փոփոխություններ են կատարվել և ներառվել են նաև Արցախից բռնի տեղահանված մեր հայրենակիցները։ Փոխարենը հանվել է այսպես կոչված «աշխատանքի վետերան» հասկացությունը, քանի որ նման շահառուներ այլևս չկան։

Ինչ վերաբերում է Արցախից բռնի տեղահանված հայրենակիցներին, ապա ինչպես դեռ նախորդ տարեվերջին հայտարարել էր նախարար Արսեն Թորոսյանը, այլընտրանք է առաջարկվում այն ընտանիքներին, որոնք բաղկացած են մինչև 3 անդամից և ունեն խոր կամ ծանր հաշմանդամության կարգ կամ 60 և ավելի բարձր տարիքի են։

Եթե այս ընտանիքները հավաստագիր ստանալու համար բավարարում են կառավարության առաջարկած բոլոր պայմաններին (որոնք հիմնականում վերաբերում են ՀՀ քաղաքացիություն ունենալուն), սակայն նրանց գումարը չի բավարարում տուն ձեռք բերելու համար, հնարավորություն է ընձեռվում գրանցվելու նախարարության սոցիալական բնակարանային ֆոնդի ծրագրում։

Սոցիալական բնակարանների համար շահառուի հետ պայմանագիրը կնքվում է 3 տարի ժամկետով, որից հետո կա հնարավորություն երկարաձգելու ժամկետը ևս 3 տարով, եթե ընտանիքն այդ ընթացքում դուրս չի եկել իր անապահովության կարգավիճակից, չի կարողանում կարգավիճակի հարց լուծել։

«Նախկինում տարբեր կարգավորումներ են եղել՝ 5, 10 տարի ժամկետով և այլն։ Հիմա այդ մարդկանց համար մենք զրոյացրել ենք ժամկետը, որ անհավասար պայմաններ չլինեն։ Եթե իրավական հիմքերը կան սոցիալական բնակարանում մնալու, այդ 3 տարին հաշվվում է»,- նշել է Քոչարյանը։

Եթե իրավական հիմքը բացակայում է, չեն համապատասխանում պայմաններին, միևնույն է՝ պետությունը ժամանակ է տալիս կացարանի հարց լուծելու համար։

Քոչարյանի խոսքով՝ այդ 3 տարիների ընթացքում գործում է, այսպես ասած, սոցիալական միջամտության ծրագիր, սոցաշխատողն է աշխատանք տանում, զբաղվածության ապահովման ուղղությամբ են ջանքեր գործադրվում, ինչը պետք է օգնի ընտանիքին տարիներ անց դուրս գալ սոցիալական բնակարանից։