Հայաստանի 10 ամենաագրեսիվ ու ոչ ադեկվատ աստղերը (Լուսանկարներ)

15 July, 2015 10:43

Աստղերին սիրում են, աստղերին ատում են, աստղերին քննադատում են, աստղերին գովաբանում են… Այս ցուցակը կազմելիս ես չեմ առաջնորդվել անձնական համակրանքով, նրանց մատուցած մշակութային պրոդուկտի իմ անձնական ընկալմամբ, ոչ էլ այլ չափորոշիչներով, այլ միայն օբյեկտիվ դիտարկումներով, որոնք արել եմ՝ հետևելով ներքոնշյալ աստղերի հրապարակային ելույթներին ու հրապարակումներին։ Եվ այսպես, ձեզ ենք ներկայացնում 10 աստղերի, որոնք ամենից հաճախ են աչքի ընկնում ագրեսիվ ու ոչ ադեկվատ խոսքով ու վարքով։

10. Շպռօտ

Ի տարբերություն շատ այլ աստղերի՝ Շպռօտին պետք չէ սադրել կամ էլ ինչ-որ սուր հարց տալ, որպեսզի նա դառնա ագրեսիվ կամ էլ ոչ ադեկվատ վարք դրսևորի։ Շպռօտը մյուսներից տարբերվում է նրանով, որ նա միշտ զայրացած է և միևնույն ժամանակ ուրախ, ու որ ավելի ուշագրավ է այս թեմայի կոնտեքստում՝ առանց որևէ պատճառի կարող է ինչ-որ ցենզուրայից դուրս բան անել տեսախցիկի առջև կամ էլ սոցցանցի իր էջում։

9. Հակոբ Հակոբյան (Սիլվա Հակոբյանի հայրը)

Սկանդալային վարքով աչքի է ընկնում նաև Սիլվա Հակոբյանի հայրը՝ Հակոբ Հակոբյանը, ով նաև Սիլվայի պրոդյուսերն է։ Իհարկե, զուտ պատահականություն է, որ Հակոբ Հակոբյանը տխրահռչակ Ճոյտի անվանակիցն է։ Իհարկե, կարելի է ըմբռնումով մոտենալ նրա հայրական զգացմունքներին, եթե դիտարկում ենք նրան զուտ որպես երգչուհու հայր, բայց չի կարելի ըմբռնումով մոտենալ նրա՝ պարբերաբար կրկնվող ագրեսիվ արձագանքներին, քանի որ նա հայր լինելուց բացի նաև պրոդյուսեր է, իսկ դա նշանակում է, որ պետք է քննադատների ու նույնիսկ ոչ ադեկվատ քննադատների ասածներին ու գրածներին մոտենալ հանդուրժողականությամբ կամ էլ արհամարհել, այլ ոչ թե փողոոցային վերջին հայհոյանքները գրել սոցիալական ցանցերում և ասել հեռախոսով, որովհետև նման վարքը հարիր է Ճոյտ մականունով Հակոբ Հակոբյանին։

8. Լիանա Զուրաբյան

Ցուցակում ենք ընդգրկել բոլորովին վերջերս հասարակության լայն շերտերին «հայտնի» դարձած ասմունքող Լիանա Զուրաբյանով։ Այս երկու օրը նրան ակտիվորեն քննարկում են սոցիալական ցանցերում և էլեկտրոնային կայքերում՝ Վիտամին Ակումբի մարտիության համերգի նրա «բենեֆիսի» համար, բայց ագրեսիվությամբ ու ոչ ադեկվատ վարքով նա աչքի էր ընկել և լայն քննարկումների առարկա էր դարձել քիչ ավելի վաղ՝ «Երևանն է խոսում» թոք շոուի փետրվարյան հաղոորդումներից մեկի ժամանակ։ Նրա խոսքին ու վարքին գնահատական տալուց զերծ մնալով՝ թողնում ենք, որ դա անեք դուք, եթե դեռ չեք տեսել այդ «փառահեղ» շոուն։

7. Շուշան Պետրոսյան

Անկասկած, մեր էստրադայի ամենատաղանդավոր երգչուհիներից մեկն ունի խնդիր, որը բավականին տարածված է ու անգլերեն տերմինաբանությունում կոչվում է Anger Management, այսինքն՝ զայրույթի կառավարում։ Քանիցս է եղել, երբ Շուշան Պետրոսյանն առաջին հայացքից լրագրողի անմեղ, իսկ երբեմն էլ սադրող հարցից անմիջապես հետո գրեթե կորցրել է ինքնատիրապետումը և ագրեսիայով գերհագեցած պատասխաններ ու ակնարկներ է արել։ Լրագրողները քաջատեղյակ են Շուշան Պետրոսյանի այս գծին, ու դա հաճախ բերում է նրան, որ նրանք դիտավորությամբ հրահրում են այնպիսի մի իրավիճակ, երբ Շուշանը պայթում է, և արդյունքում օրվա «սենսացիան» ապահովված է։

6. Մերի Մակարյան

«Դժվար ապրուստի» հերոսներից Մերի Մակարյանը մի քանի իսկական դժվար ապրուստ էր ապահովել Միհրան Ծառուկյանի համար։ Սերիալային դերասանուհին իր նախկին սիրեցյալի վրա իսկական տեղեկատվական գրոհ էր ձեռնարկել, որին բացի իրենից մասնակցում էին նաև Մերիի մայրը և մորը պատկանող լրատվամիջոցներից մեկի անձնակազմի ներկայացուցիչները։ Պատմությունը որքան տգեղ էր, այնքան հագեցած էր անհավասարակշիռ վարքով ու ագրեսիվությամբ, իսկ սկանդալը դեռ երկար էր շարունակում մնալ հանրային քննարկումների ակտուալ թեմատիկ դաշտում։

5. Միհրան Ծառուկյան

Ոչ ադեկվատ վարքով ու ագրեսիվությամբ աչքի է ընկնում նաև վերոնշյալ պատմության հակադիր բևեռը՝ Միհրան Ծառուկյանը, ընդ որում, եթե Մարի Մակարյանին դեռ կարելի է որոշակի առումով հանդուրժողաբար վերաբերվել, քանի որ նա վիրավորված կին է, ապա Միհրանին հասկանալն ու առավել ևս ըմբռնելը պարզապես անհնար է։ Հայտնի չէ, թե ինչ սև կատու էր անցել Միհրանի ու Մերիի միջև, բայց ինչ-որ մի պահ Միհրանը հայտարարեց, որ իբր իր երկրպագուները դեմ են, որ նա դերեր խաղա ու ընդհանրապես առնչվի Մերիի հետ ու այնպես արեց, որ Մակարյանին զրկեցին դերից։ Այս ողջ հակամարտության ընթացքում ու դրանից հետո Միհրանը կայուն ագրեսիվ կեցվածք էր որդեգրում լրագրողների առջև և հեռուստաեթերում, երբ խոսքը որևիցե կերպ անդրադառնում էր իր ու Մերի Մակարյանի հարաբերություններին։

4. Սյուզի Մելիքյան

Սյուզի Մելիքյանը հաճախ աչքի է ընկնում իր բռնկուն և իմպուլսիվ խառնվածքով։ Բազմաթիվ են միջադեպերը, երբ Սյուզին անակնկալ բռնկվել է ու սկսել է սպառնալիքներ հնչեցնել։ Երբեմն մի փոքր ակնարկն էլ բավարար է, որ երգչուհին հունից դուրս գա։

3. Սոնա

Սոնա… մարդ-ֆենոմեն, ով, մի պահ անհետանալով մեր տեսադաշտից, շռնդալից վերադարձավ տարիներ անց, բայց ոչ այնքան որպես երգչուհի, այլ որքան «Հայաստանի Ձայնը» շոուի ժամանակ մեգասկանդալներ հրահրող։ Ու իրոք, ռետրոսպեկտիվ նայելով վերջին երկու տարիներին՝ կարելի է արձանագրել, որ նույն «Հայաստանի ձայնի» երկու եթերաշրջաններին ոչ այնքան հիշվում է այն, որ իր մասնակցած երկու եթերաշրջաններում էլ հաղթեցին Սոնայի մասնակիցները կամ էլ վերջիններիս հետագա հաջողություններն ու անհաջողությունները, որքան Սոնայի գրանդիոզ սկանդալները։ Առաջին եթերաշրջանից մենք հիշում ենք Սոնայի ու Արտո Թունջբոյաջյանի էպիկական լեզվակռիվը, որտեղ Սոնան պարզապես հարձակվեց Արտայի վրա՝ մոռանալով տեսախցիկների մասին, իսկ վերջին եթերաշրջանում՝ Եվա Ռիվաս-Սոնա տուրուդմփոցը, որը կրկին անգամ ծագեց Սոնայի ոչ կոռեկտ ու պահին ոչ ադեկվատ ակնարկի պատճառով։

2. Նադեժդա Սարգսյան

Հայկական շոուբիզնեսում «վառոդով լի տակառի» համբավ ունի նաև տիկին Նադեժդա Սարգսյանը, ով կես բառից կարողանում է պայթել ավելի ուժեղ, քան Հիրոսիմա ու Նագասակի քաղաքների վրա նետված ատոմային ռումբերը։ Նադեժդա Սարգսյանի թիրախում հայտնվում է ցանկացած ոք, ով համարձակություն ունենա նույնիսկ ծուռ միտք ունենալ իր և իր դստեր էստրադային գործունեության վերաբերյալ։ Միանգամից սկսվում է վիրավորանքների ու մեղադրանքների տարափը։ Ընդ որում, էական չեն մասշտաբները, որովհետև տիկին Նադեժդան նույն պատրաստակամությամբ կարող է մոխրացնել իր ագրեսիայով ինչպես շարքային ֆեյսբուքյան օգտատիրոջ, այնպես էլ հարյուրավոր մարդկանց միասին, եթե այդ հարյուրավոր մարդիկ համարձակություն են ունեցել քվեարկելու ոչ իր դստեր՝ Եվրատեսիլի մասնակցի թեկնածության օգտին։ Դե իսկ ամենադաժան ճակատագիրը սպասվում է Նադեժդայի այն «չուզողներին», ովքեր հայտնվում են նրա տեսադաշտում հեռուստաեթերում…

1. Սոնա Շահգելդյան

Ինչ խոսք, ագրեսիայի ու ոչ ադեկվատ վարքի հայաստանյան էստրադայի չեմպիոնը Սոնա Շահգելդյանն է, ով պատրաստ է ծվեն-ծվեն անել իր ցանկացած քննադատի, անգամ եթե քննադատությունը տեղին է։ Սոնան պարբերաբար հայտնվում է նման սկանդալների կիզակետում, ու շատ լրագրողներ և խմբագիրներ կարող են ձեզ պատմել Շահգելդյանի հետ ունեցած ոչ այնքան հաճելի նամակագրության ու հեռախոսազրույցների փորձի մասին, եթե նրանք համարձակություն են ունեցել հրապարակելու այնպիսի մի բան, որ դուր չի եկել Սոնային։ Սա էլ հերիք չէ, Սոնան միայնակ գործելով չի սահմանափակվում ու ունի վիրտուալ տիրույթի մի զորավար մորաքույր, ում չարացած և վիրավորանքներով հեղեղված մեկանաբանությունները մշտապես կարելի է գտնել Սոնայի մասին քննադատական հոդվածների և հոլովակների տակ։