Ի՞նչ է կարելի անել Երևանում, եթե փող չունես ու զբոսաշրջիկ ես

Զբոսաշրջությունը Հայաստանում բավական գրավիչ կարող է լինել խնայողության տեսանկյունից, moya-planeta.ru-ն ներկայացնում  է այն վայրերը, որտեղ հնարավոր է Երևանում գերազանց ժամանակ անցկացնել առանց փողի: 

Առաջինը, որ նշում է կայքը, մթերքի ու հասարակական տրանսպորտի մատչելի լինելն է, իսկ եթե ավելին եք ցանկանում իմանալ, ապա հարկավոր է ծանոթանալ վերոնշյալ 7 խորհրուրդների հետ:

1. Սովորել պարել ազգագրական պարեր

Հայկական պարերի գիտակ դժվար թե կարողանաք դառնալ մի քանի օրում, սակայն մի քանի շարժում սովորելը միանգամայն իրատեսական է: Կայքը տեղեկացնում է, որ հայկական պարեր սովորելն անվճար է ամեն ամսվա վերջին շաբաթ օրերին: Գարնան ու ամռան ամիսներին դասերը տեղի են ունենում Կասկադում, իսկ ցուրտ ամիսներին՝ «Նարեկացի» արվեստի կենտրոնում:

2. Տեսնել լավաշի պատրաստման պրոցեսը

Հացաթխման սիրահարները կարող են այցելել լավաշի փուռ: Լավաշի պատրաստումը նման է ծեսի: Լավաշն ու դրա հետ կապված ամեն ինչ ՅՈՒՆԵՍԿՕ-ն անցած տարի ճանաչեց մարդկության ոչ նյութական մշակութային ժառանգություն: Լավաշը թխվում է գրեթե այնպես, ինչպես հազարավոր տարիներ առաջ՝ 2 կամ 3 կին (հախաճ՝ սպիտակ խալաթներով) խմորը ամրացնում են հողում փորված վառարանի պատերին ու դուրս բերում «նորածին» հացը: 

3. Զբոսնել Վերնիսաժում

Վերնիսաժում ցուցադրված է ամեն ինչ: Այստեղ կարելի է գնալ ոչ միայն գնումների համար, այլև պարզապես հայ արվեստագետների ու արհեստավորների գործերով հիանալու համար: Այստեղ, ի տարբերություն թանգարանների, կարող եք ձեռք տալ ու անգամ լուսանկարել ցուցանմուշները: Սակայն զգոն եղեք՝ Վերնիսաժում գնումներ կատարելու ցանկությանը դիմակայելը մեծ գայթակղություն է:

Ի դեպ, Վերնիսաժը լիարժեք աշխատում է հանգստյան օրերին: 

4. Այցելություն Պանթեոն

Պանթեոնում հանգչում են հայ հայտնի արվեստի ու քաղաքական գործիչները: Այստեղ մարդիկ գալիս են հարգանքի տուրք մատուցելու: Կոմպոզիտոր Արամ Խաչատրյան, ռեժիսոր Սերգեյ Փարաջանով, գրող Վիլյամ Սարոյան, դերասան Մհեր Մկրտչյան...

Որքան մեծ անուններ են թաղված այդ հիանալի մահարձանների տակ: Կարևոր է հիշել՝ անունները գրված են միայն հայերեն, այդ իսկ պատճառով ցանկալի է Պանթեոն գնալ թարգմանչի կամ գիդի ուղեկցությամբ: 

5. Անվճար այցելել թանգարաններ

Յուրաքանչյուր ամսվա վերջին շաբաթ օրը Երևանի թանգարանների մեծ մասը գործում է անվճար: Ցանկացած ժամի կարող եք առանց տոմսի հայտնվել Ցեղասպանության թանգարանում, Զինվորական թանգարանում, Երկաթուղային թանգարանում (Երևանի կենտրոնական կայարանի շենքում), Ալեքսանդր Թամանյանի ու Ճարտարապետության ազգային թանգարանում (երկուսն էլ Վերնիսաժի մոտ են): Անվճար է միայն «Գաֆէսճեան» արվեստի կենտրոնի որոշ ցուցասրահներ:

6. Հայտնվել Իրանում

Իրանական շունչը Երևանում կարող եք զգալ՝ այցելելով 1766թ. կառուցված Կապույտ մզկիթը, որը ամենագեղեցիկներից մեկն է տարածաշրջանում: Մզկիթում գեղեցիկ է ամեն բան՝ ճիշտ պլանավորում, լազուրե ներկերով ներկված գմբեթ, սլացիկ մինարեթ: Կարող եք հաճախել նաև պարսկերենի անվճար դասերի, եթե երկար ժամանակով եք:

Այցելուները կարող են մզկիթ այցելել ժ. 10:00-13:00-ը ու 15:00-18:00-ն: 


7. Ուսումնասիրել դալանները

Երևանի դալանները կամարաձև անցումներ են, որոնք ուրախացնում են իրենց գունագեղ նկարներով: Բանն այն է, որ մի քանի տարի առաջ դալանները ներկվեցին գեղարվեստական քոլեջների ուսանողների կողմից:

Երևանյան դալանների նկարները յուրատեսակ տեսարժան վայր են, որոնք քաղաքը դարձնում են ավելի կենսուրախ: